Istér 2 - Udél Dwata: Gna Kesfasad ne Lomi Kesfasad

Kbaling Istér libun boi

¹ Kogolen bè yó, deng tnaw ne yóm kebut Sérksis bede là dengen mkó bè nawahen he Basti. Hendemen yóm nmò Basti béléen ne bud hendemen snéen yóm udin deng fenmahen.

² Yó gónóm mon, mógów le ebéléen yó kem tau gel hmau du, yó kem tau alì moni béléen. Yó hlau le du, mon le, “Yake hfebeli kem hanà sawang libun alì tilob.

³ Yó kmoem du, méléki kem tau genlal bè ket prubinsya knamalem mò mebel ne mò mit kul edini béléem bè syudad Susa ne suem lu bè yóm gónô deng htólóngem bè yó kem dweyem. Hesgifaem lu ke Higay yóm tau kafun deng snaligem bè yó kem libun nfunem. Gotu blayem kul yóm kdê wen mu le du bè yóm kehtilob le.

⁴ Ominem mélék bélê le yóm libun hol nóyóem mò tles yóm kboi Basti.” Ya tey kehyu nawa Sérksis bè yóm atul le yó ne tódô kendel hmoen kul.

⁵ Bè yó bè Susa, wen sotu Ju menwu bè yó boluyen Murdikay ngà yóm tehe Jair. Nim Murdikay ni, lemwót bè ból Bindyamin, semfu gu bè Kis ne Simi.Bè yóm tehe kundugen ebè Jirusalim Nibukadnisar yóm tau hol geta mogot yóm benwu Babilun, negefen Jihuyakin yóm tau hol geta bè Juda, gomong lemen yóm kun fù Murdikay ne tey dê kem dumu Ju snéen mung lemen.

⁶ Bè yóm tehe kundugen ebè Jirusalim Nibukadnisar yóm tau hol geta mogot yóm benwu Babilun, negefen Jihuyakin yóm tau hol geta bè Juda, gomong lemen yóm kun fù Murdikay ne tey dê kem dumu Ju snéen mung lemen.

⁷ Nim Murdikay wen libunen boluyen Hadasa ngà yóm tehe mà dien. Yó boluy le du bè Pérsya, Istér. Hol libun knóón ne tey tilob klówóhen. Bè yóm katay kem tuhahen nim ngà libun ni, Murdikay fen hmikit du ne hol lómón ke kun ngà mò kmoen du.

⁸ Timbow deng glalag yóm lomi atul yóm tau hol geta, ya tey dê ngà libun nwit le ebè Susa ne Istér sotu bélê le. Gotu sentnù le lu bè yóm gónô bong deng htólóng le bélê le ne Higay fen semgifà kul yóm tau fen snalig yóm tau hol geta, mò fen semgifà yó kem libun nfunen.

⁹ Tey kehyu nawa Higay ebè Istér ne tey ketdofen du. Tódô kendel blayen du yóm wen muhen du bè kehtiloben, bud blayen du yóm ken hyu béléen snéen. Wen hitu kem ngà libun néléken bè yó bè gónô bong mò tmóbóng du ne wen tey mdengen dfél htólóngen bélê le.

¹⁰ Là kô tulón Istér du yóm ke Juhen abay se yó se yóm deng hlau Murdikay du.

¹¹ Tódô ket kdaw Murdikay mógów ebè lósól yóm gónô gónóhen nô Istér nan e hnungol yóm kmò Istér ne ke tedu deng gefet béléen.

¹² Yóm kdéen libun deng nélék le, botong sfalay le mò du tendo htilob. Botong nem bulón le lemunol du bè lówó le yóm hnolo alì tilob boohen boluyen mira ne bud nem bulón le se lemunol yóm sotu kayen alì tilob boluyen balsam. Kogolen bè yó, omin le gotu semtufì mit kul ket kul na sotu ebè Sérksis.

¹³ Sok kól bè yóm kdaw kwit le du ebè yóm tau hol geta yóm sotu libun, tódô hélék le du yóm nes nóyô leseken ne yóm ngom leketen.

¹⁴ Uma kóm kifu yóm kwit le du ebè yóm tau hol geta ne hayahen bè yó, omin le bud mit du ebè yóm sotu gónô gónó le nô yó kem libun nmuhen. Ne wen sotu tau semgifà du bè yó boluyen Sasgas sotu tau kafun bud snalig yóm tau hol geta bè yó kem dweyen. Yóm libun yó, tódô hlós nô bè yó efet katayen ne là kóen gógów ebè yóm tau hol geta ke là nóyóen du ne ke là htabahen du mlan bè boluyen.

¹⁵ Hók na a hto yóm kdaw kwit le ke Istér se kun ebè yóm tau hol geta yó, yóm Istér ngà tehe Abihail yóm mà dì Murdikay, yóm Istér hnikit Murdikay. Bè yóm kdaw kwit le du, laen dù hnihen són leseken yóm nes nélék Higay béléen yóm tau snalig yóm tau hol geta. Tódô kdê yó kem libun mton ke Istér, ya tey kóyô le du.

¹⁶ Duhen yó, bè yóm ghituhen halay kkamal Sérksis bè yóm gesfoloen bulón, yóm bulón boluy le du Tébét, nwit le Istér ebè Sérksis bè gónô bongen.

¹⁷ Yóm kton Sérksis ke Istér, tódô kendel gmung nawahen du mkay senta yó kem dumu libun deng nwit le ebéléen. Tey kehyu nawahen ebéléen. Tódô suuben bè kulu Istér yóm kuruna libun boi mò tles Basti.

¹⁸ Yó gónóm mon, wen tey ken bong nmò Sérksis bè Istér, gotu tinoken kdê yó kem tau genlalen ne kdê yó kem tau wen hogoten kul. Gotu heglalagen bè yó kem prubinsya nogoten anì gbót le hligal béléen bè yóm kdaw yó ne wen tey kem basa blayen snéen.

Ktulón Murdikay yóm tô khatay le yóm tau hol geta

¹⁹ Bè yóm kdaw yó, wen hogoten ke Murdikay bè gónô bongen yóm tau hol geta.

²⁰ Okóm ke Istér kun efet bè yóm kdaw yó, là kô deng tulónen du he yóm kedyuhen lómón yóm deng mon Murdikay mò du. Tódô loloen yóm hlau Murdikay du, lómón yó sem gel nmoen bè yóm hanà kudien tehe knóen béléen bè kun gónô.

²¹ Sotu kdaw bè yóm igò Murdikay tolo mò nmò bè yóm gónô bong, wen sentulón yóm lewu kem tau kafun gel mentey bè bak dól yó kem dfél yóm tau hol geta, boluy le Bigtana ne Térés. Wen lenbut le bè yóm tau hol geta ne tô natul le yóm khatay le du.

²² Bè yóm kungol Murdikay du yóm atul le tódô kendel seben ke Boi Istér. Lemwót se ke Istér kun, kendel tulónen bè yóm tau hol geta. Ne bud tulónen bè yóm tau hol geta snéen bè Murdikay gónón temngón du yóm tulón yó.

²³ Timbow tngón le ktahuhen yóm deng tulón Istér yó ne yó kmò le kul yóm lewu kem tau yó, tléwéng le lu. Tódô kdê ni kem ni, gotu hsulat yóm tau hol geta bè yóm bok gónó le gel smulat yóm nmò le ket kdaw bè yóm benwu knamalen.