Istér 1 - Udél Dwata: Gna Kesfasad ne Lomi Kesfasad

Là kimón Boi Basti ke Sérksis

^1-2 Wen sotu tau tehe hol geta mogot yóm benwu Pérsya boluyen Sérksis. Yó kwen prubinsya nogoten, botong lematu lewu folò hitu. Lenwóten bè benwu Indya yóm benwu fi dmata kdaw efet kól etu bè benwu Sudan yóm benwu fi leged. Bè yó bè syudad Susa yóm yê yó kem syudad snakuf Pérsya, gónón myón kmamal Sérksis.

³ Bè yóm getluhen halay myón, wen tey ken bong nmoen bè kdê yó kem genlalen ne bè kdê yó kem tau wen hogoten kul. Gotu le nô bè yó se kul yóm kdê genlal bè yó kem sendalù bè Pérsya ne bè Midya. Dalang se yó kem gubérnor bè yó kem prubinsya nogoten ne yó kem dumu genlalen, gotu le stifun ebè yó se kul.

⁴ Botong nem bulónen hegfan du bè yó kem tau tinoken yó, yó kem tey kendengenen bè yóm kkamalen ne yóm tey keheklóónen.

⁵ Kogolen bè yó, bud wen sotu ken bong nmò yóm tau hol geta yó bè kdê yó kem tau gel dóken bè yóm gónô bongen ne bè kdê yó kem tau genlalen bè yó, lemwót bè yóm geta kólen bè glaan. Botong sotu fedyanen kegenen mò du yóm ken bong yó bè yó talak lósól yóm gónô bongen.

⁶ Bè yó bè lósólen, wen kem tey nes newel ginggung ne bukay tléwéng le bè yó mò klóónen. Yó kem nes yó, benkes le yóm nes megem ginggung ne lahu le bè yó kem legiling nmò le bè blówón bukay deng eles sù le bè yóm hehek botu smilà bukay. Wen kem bangkù tahà sù le bè yó, nmò le bè tahu blówón ne bè blówón bukay. Yóm lósól yó, sneel le yó kem botu smilà alì mebtes segkay beteken. Wen se bnetek bukay ne hulô ne lemnaw ne ginggung ne dê kmò kesegfi le du.

⁷ Kdê yó kem basù gónó le hinum tau, hono tahu blówón ne ket basù sal stólóng danà beteken. Ne tey bong yóm tifas grép yóm tifas kun gel ninum yóm tau hol geta nô bè yó, mò ninum yó kem tau sbung.

⁸ Ke wen se bélê le là móyô minum, là hyuhen ke nubug le lu. Okóm yó kem tau móyô minum, balù nô kbongen yóm ninum le abay se deng mon yóm tau hol geta bè yó kem tau gel mkay ninum, bayà ye kul nô kihu nóyô le.

⁹ Ne bè yóm kdaw yó, bud wen se kun ken bong nmò Boi Basti, yóm yehen Sérksis, nmoen bè yó kem libun mò nmò lem yóm gónô bong yó.

¹⁰ Bè yóm ghituhen kdaw kmoen ken bong Sérksis, ya tey kligalen lemwót bè yóm deng kinumen. Ominen htaba yóm hitu kem logi kafun hol tóbóng lówóhen. Yó boluy le, Mihuman ne Bista ne Harbuna ne Bigta ne Abagta ne Sitar ne Karkas.

¹¹ Hangayen kul Boi Basti, bede monen hol suuben bè kuluhen yóm kuruna yóm kboihen. Uma kóm yóm libun boi yó, tey knóón libun ne kóyô yóm tau hol geta ke hegfanen bè yó kem genlalen ne bè yó kem tau tinoken yóm tey ktilob yehenen.

¹² Okóm timbow tulón yó kem tau dók Sérksis ke Boi Basti yóm tinok yóm tau hol geta yó, mom là kóen dog móyô mógów. Ne ya tey sidek kebut Sérksis.

¹³ Yó kun gel adat yóm tau hol geta yó, nahen na gel smólók bè yó kem tau temngón du yó kem udin bélê le ke tedu yóm hyu bang nmoen. Yó gónón htaba yó kem tau gel hmau du anì tngónen yóm nmoen.

¹⁴ Yó boluy yó kem tau gel hmau du yó, Karsina ne Sitar ne Admata ne Tarsis ne Mérés ne Marsina ne Memukan. Yó se yóm hitu kem genlal geta bè yó bè Pérsya ne bè Midya.

¹⁵ Yó mon Sérksis bè ni kem tau ni, “Deng hógówu yó kem tau tóbóng lówóhu anì na le e nangay Boi Basti, okóm là kóen dog móyô mógów. Tedu se monen bè yóm udin tekuy gbak bè yóm libun boi là nimónen du yóm tinoken ebéléen yóm tau hol geta igoen tey mdengen ktinoken du mlan bè yó kem hol tóbóng lówóhen?”

¹⁶ Omin Memukan mudél ebè Sérksis ne ebè yó kem dumu genlal nô bè yó, monen, “Là són uu du henyaken yóm Boi Basti yó, okóm gomong se yó kem genlalem. Bè ktahuhen, tódô kdéen tau bè nim benwu nogotem gomong myak.

¹⁷ Ke gungol yóm kdéen libun bè klamang nim benwu knamalem nim deng nmò Boi Basti ni, kaem dnalang le. Angat mon le, ‘Deng tinok Sérksis Boi Basti, okóm là kóen dog móyô mógów.’

¹⁸ Ke gungol yó kem yehen me, mi kem genlalem bè Pérsya ne bè Midya nim adat Boi Basti ni, ngem kà dnalang le du se kul. Ne tódô kdê yó kem libun bè klamang yóm benwu knamalem, là kô bud nadat le du ne yó kem kul tuha logi ne bè yó angat gónó le lembut kul yó kem logi yehen le.

¹⁹ Duhen yó, ke yó dum hyu béléem, hsulati udin anì là buden mdà bè soluhem Boi Basti. Homongem nim lomi udin ni bè yó kem dumu udin deng hsulatem bè ni bè Pérsya ne bè Midya yóm udin là bud wen gembek temles du. Ominem yó bud mebel libun hyu mkay sentahen mò tles yóm kboihen.

²⁰ Ke gungol le bè klamang yóm benwu nogotem nim udin ni, ngem tódô kdéen libun gotu madat yóm kul tuha logi, tau wen boluyen duhen ke tau hkawang.”

²¹ Tahu se, móyô Sérksis ne yó kem genlalen bè yóm atul Memukan yó ne tódô hmoen kul.

²² Bè ket prubinsya knamal Sérksis gónón e hemwit sulat, bede hsulaten bè kul udél ne bè kul kmò ksulat bè ket prubinsya. Yó udélen lem yóm sulaten, monen, “Ket logi, du se hol kulu bè kun gónô.”