Isra 8 - Udél Dwata: Gna Kesfasad ne Lomi Kesfasad

Kni le Isra bè Dwata gu laan le là deng mulék ebè Jirusalim

²¹ Gu laan me là deng lemwót he, gotu sentifunu lu ditu bè Kanal Ahaba yóm kdéen tau mung do. Yó hmou kul, gotu me fasting yóm kdê me mò gónó me hegfan du yóm keheglaan me bè Dwata. Yó hni me béléen anì du tukô gna kum ne kenlungen mi anì laen dù hemen me bè lan dalang se yó kem ngà me ne yó kem tey nwit me.

²² Là mlose mni du bè yóm tau hol geta ke wen sendalù ne kem sendalù smakay kudà hmungen kum mò mentey kum bè yó kem hohon me bè lan. Yakà deng gegna tulón me du, mon me, “Yóm kum Dwata, tey kofinen yó kem tau tmaba ebéléen, okóm bè yó kem tau kmogol du tey sidek kebuten kul.”

²³ Yó gónóm mon, gotu me fasting bè yóm tey kni me béléen anì kenlungen mi bè lan. Tahu se, hnungol Dwata yóm kni me béléen yó. Là gomongen bè nili bérs 24 kól bè 36. Yó tulónen yóm tey ketgama le du yó kem tey ngom tahu blówón ne blówón bukay deng hwit yóm tau hol geta ne yó kem genlalen ne yó kem tau Israél mò ngom yóm Gónô Dwata bè Jirusalim. Tahu se, timbow le kól bè Jirusalim na le na hegnô tlu kdaw, bà mon yóm tey kliteg le bè yóm tey nógów tahà. Bè gfaten kdaw, lemwót yó kem ngom blówón nwit le yó, gotu blay le bè yó kem tau blóng ebè Dwata bè yóm Gónô Dwata bè Jirusalim. Kogolen bè yó, omin Isra demsù yóm dsù hkekeb ebè Dwata mò gónó le hegfan yóm tey kdóyón le du bè yóm klaen dù hemen le bè lan. Ke móyói temngón du yóm keblat yó kem tahu blówón nwit le yó, hol tenngelem bè Udél Dwata bè Bsayà ne bè Ingglis. Tonem bè yó snéen yóm tey kwen yó kem ógóf dsù le. Ke nawa te hemdem du nim ngom blówón nwit le ni, tey tennga bong. Là gomongen bè nili yóm tsaptér 9 ne 10. Yó tulónen bè ni kem tsaptér ni yóm tey ksidek kegnóm Isra du yóm deng kyehen yó kem tau Israél bè yó kem tólóng libun hmilol kul. Balù yó kem tau gel blóng le ebè Dwata, sana kegbót le myehen bélê le. Okóm yóm Isra bè yóm ketngónen du, deng mom du alì hemgsel mni du bè Dwata yóm salà nmò yó kem dumuhen. Ngangen botong le hegsel se kul yó kem tau mò du efet le hkukum bè yó kem tau kmukum bélê le. Yó ukum le du, gotu hulék le yó kem tólóng libun deng yehen le, mung kul kem ngà le. Yó gónó le mò du nim ni abay se là móyóen Isra ke wen tólóng tau sembool du yóm kmò ktaba le ebè Dwata yó kem tau Israél.