Isra 7 - Udél Dwata: Gna Kesfasad ne Lomi Kesfasad

Kegdek Isra bè Jirusalim

¹ Timbow deng hilu halayen miwes bè yó bè yóm igoen tolo mogot bè Pérsya Artasérksis, wen sotu tau boluyen Isra semfu gu bè yóm tehe Aron, yóm hol tanay tau blóng ebè Dwata. Ni se kmò kesektol yó kem gónón gu semfu Isra. Yóm Isra ngà Siraya. Yóm Siraya ngà Asariya. Yóm Asariya ngà Hilkaya.

² Yóm Hilkaya ngà Syalum. Yóm Syalum ngà Sadok. Yóm Sadok ngà Ahitub.

³ Yóm Ahitub ngà Amariya. Yóm Amariya ngà Asariya. Yóm Asariya ngà Mirayut.

⁴ Yóm Mirayut ngà Sirahiya. Yóm Sirahiya ngà Usi. Yóm Usi ngà Buki.

⁵ Yóm Buki ngà Abiswa. Yóm Abiswa ngà Finihas. Yóm Finihas ngà Ilisar. Yóm Ilisar ngà Aron yóm hol geta bè yó kem tau blóng ebè Dwata.

^6-7 Nim Isra ni, tey temngón, gotu tngónen yóm kdê hlau tehe hsulat Dwata ke Musis, yóm hlau yóm kul Dwata yó kem tau Israél. Lemwót bè yóm któbóngen ke Isra yóm sana kun Dwata hol gónó mogot, tódô gotu blay Artasérksis du yó kem kdê hnihen wen muhen du bè yóm kuléken ebè Jirusalim. Bè yóm ghituhen halay mogot benwu Artasérksis, kewót Isra bè yó bè Babilun mógów ebè Jirusalim mung du yó kem dumu tau Israél. Wen kem tau gel blóng ebè Dwata mung du ne wen se kem sfu Libay ne yó kem tau gel semngal lem Gónô Dwata ne yó kem tau fen gel mentey bè Gónô Dwata ne yó kem tau gel mò nmò lemen, gotu le mung ke Isra ebè Jirusalim.

^8-9 Lemwót le bè Babilun bè yóm tanay kdaw bè yóm tanay bulón. Mlan bè yóm któbóng Dwata kul gefet le bè Jirusalim bè tanay kdaw bè yóm glimuhen bulón.

¹⁰ Nim Isra monen ni, tódô hotuhen nawahen hemnagì du yó kem hlau Dwata, lelen mimón du ne gotu toloken yó kem tau Israél yóm kdê deng hlolò Dwata kul.

Yóm sulat blay Artasérksis ke Isra

¹¹ Wen sulat hwit Artasérksis ke Isra yóm tau gel blóng ebè Dwata, alì temngón du yóm kdê hlau Dwata yó kem tau Israél. Yó lem yóm sulaten, monen,

¹² “Nim sulat ni lemwót bè Artasérksis yóm tau hol geta senta yó kem dumu tau hol geta. Smulate ebè Isra yóm tau blóng ebè Dwata, yóm tau hulung tmolok du yóm kun hlau yóm Dwata nô bè longit.

¹³ Ni hol udélu ebè kdê yó kem tau Israél bè klamang yóm benwu nogotu dalang se ebè yó kem tau gel blóng ebè Dwata ne ebè yó kem sfu Libay, ke móyô le mung kóm mulék ebè Jirusalim, hol le mung.

¹⁴ Ni se dou udél ne udél yó kem hitu smugung béléu. Hógów me uu ebè Jirusalim anì nam e hnénég ke tedu mò kmoen ditu bè Jirusalim ne bè Juda. Hol hnénégem ke nimón le yó kem hlau yóm sana kuy Dwata, yó kem hlau deng sigang Dwata tahem.

¹⁵ Wen kem tahu blówón ne blówón bukay lemwót bélê me mò blay me ebè yóm kuy Dwata kem tau Israél yóm Dwata gmónô lem blóng ye bè Jirusalim. Hol nwitem nim blay me ni bè yóm kulékem ebè Jirusalim.

¹⁶ Bud nwitem snéen yó kem kdê blówón bukay ne tahu blówón blay le kuy yó kem tau bè klamang prubinsya Babilun, dalang se yóm kul blay yó kem tau Israél ne yó kem tau blóng ebè Dwata, yóm blay le ebè yóm Gónô Dwata bè Jirusalim.

¹⁷ Hol ten-gamahem nim filak monu ni. Són olo muhen mò bli ye safì tudu ne kem ubiha logi ne kem ngà ubiha ne mò bli ye halay ne yóm gel ninum ye mò mung bè yóm gel dsù ye bè yóm gónó demsù bè yóm Gónô Dwata bè Jirusalim.

¹⁸ Ke wen lukasen yóm filak yó, gbek ye bemli du yóm knóyô benli ye syan ke deng ssotu nawa ye du ne ke lemwót bè kun kóyô yóm kuy Dwata.

¹⁹ Okóm gotu nwitem ebè Dwata bè Jirusalim yóm kdê ngom deng sigang me ta ye, yóm wen mu ye du bè yóm ktaba ye ebéléen bè Gónóen.

²⁰ Ne ke wen dumuhen yóm wen mu ye du lem yóm Gónô Dwata, hol nwahem bè yóm tau fen gel mogot filak bè fsinau yóm mò bli ye du.

²¹ Ni udélu ebè yóm kdê tau genlal mogot filak bè prubinsya fi desdef Él Yufratis, hol géhél blay ye ke Isra nô kihu hnihen, yakà du du yóm tau gel blóng ebè Dwata gel tmolok yóm kun hlau yóm Dwata nô bè longit.

²² Ke wen blówón bukay hnihen bélê ye, gbek ye bemlay du gefet bè 3,400 kilu ne ke mni bélê ye halay, gbek ye bemlay du gefet bè 10,000 kilu ne ke mni bélê ye yóm gel ninum ye, gbek ye bemlay du gefet bè 2,000 litru ne ke mni bélê ye hnolo ulib, gbek ye bemlay du gefet bè 2,000 litru. Ne nô kbong kahì hnihen bélê ye, hol blay ye du snéen.

²³ Kóyóu ke hol blay ye bè yóm Dwata nô bè longit yóm wen muhen du bè yóm kun Gónô, abay se là móyóe du ke wen gónón lembut do bè yóm kogotu benwu dalang se yó kem ngau.

²⁴ Hol bê ye se abay ma bwis bè yó kem tau gel blóng ebè Dwata ne bè yó kem sfu Libay ne bè yó kem tau gel semngal lem Gónô Dwata ne bè yó kem gel mentey bè yó ne bè yó kem tau gel mò nmò bè yó lemen, dalang se yó kem dumu tau wen gel nmò le bè Gónô Dwata, hol bê ye abay ma bwis bélê le.

²⁵ Ne uu, Isra, lemwót bè yóm tey khulung hedem blayen kóm yóm kóm Dwata, uu fen mélék kul yó kem tau mò fen mogot du yó kem fsinà ye ne mò fen kmukum yóm kdê ye nô fi desdef Él Yufratis. Nélékem yó kem tau temngón du yó kem kun Hlau yóm kuy Dwata. Hol bud tolokem yó kem Hlau Dwata yó bè yó kem tau là deng temngón du he.

²⁶ Ke wen tau là mimón du yó kem Hlau yóm kuy Dwata duhen ke là nimónen du yó kem udin lem nim benwu nogotu ni, hol kendel tnafak ye. Kihu ke tódô hnatay ye duhen ke tódô hdó ye bè yóm benwu yó, duhen ke gotu nwa ye yóm kdê nfunen, duhen ke tódô heblanggù ye.” Yó se yóm udél snulat Artasérksis yóm tau hol geta bè Pérsya.

Kdóyón Isra ke Dwata

²⁷ Yó mon Isra, “Hol dóyón tekuy Dwata yóm sana Dwata hol gónó le mogot yó kem tehe fù tekuy. Tódô lemwót béléen nim nmò nim tau hol geta ni, yóm tey kadaten yóm Gónô Dwata bè Jirusalim.

²⁸ Lemwót bè któbóngen do Dwata se gónóhu gmuta du nawa yóm tau hol geta yó, dalang se yó kem smugung béléen ne yó kem dumu genlalen alì wen kfasang le. Tey ketgelen nawahu yóm sana Dwata gónóhu mogot, yó gónón dê gwitu mulék ebè Jirusalim bè yó kem gel malak bè ket tbong Israél.”