Isra 6 - Udél Dwata: Gna Kesfasad ne Lomi Kesfasad

Bud kton le yóm tehe snulat Sirus gbak bè kehdaen yóm Gónô Dwata

¹ Duhen yó lemwót Daryus yóm tau hol geta bè Pérsya, bè yóm kdaw yó gotu hfebelen yóm tehe snulat Sirus ekni, yóm tehe gel henyu le bè Babilun.

² Okóm song ton le yóm sotu sulat lenulun bè syudad Ikbatana bè prubinsya Midya. Yó snulat lemen,

³ “Bè yóm hol tanay halay kogot Sirus bè Pérsya, wen snulaten gbak ebè yóm Gónô Dwata bè Jirusalim. Bud hefdaen yó kem tau Israél yóm Gónô Dwata bè yóm sana tehe gónón mdà, bè yóm tehe gónó le gel demsù ebè Dwata. Yó kegetahen yóm Gónô Dwata hefdaen, lewu folò hitu mitru ne lewu folò hitu mitru se klamangen.

⁴ Yó kmò le du yóm bengen, bè ket tlu sodò botu sal wen koyu blóng le du. Tódô kdê yó kem deng gamà bè yóm Gónô Dwata yó, fen bnayad yóm tau mogot filak bè fesinà yóm tau hol geta.

⁵ Sotuhen, wen yó kem kimu tehe nuku Nibukadnisar lem yóm Gónô Dwata bè Jirusalim ne nwiten ebè Babilun, hono kem kimu nmò le bè tahu blówón ne bè blówón bukay. Ne ni, gotu bud hulék Sirus lu ebè Jirusalim anì bud hulék le lu bè yóm sana tehe gónó le nô lem yóm Gónô Dwata.” Ni se udél tehe hsulat Sirus.

Keheflós kehmò Daryus yóm Gónô Dwata

⁶ Bè yóm kton Daryus du yóm tehe snulat Sirus yó, wen udél hwiten ebè yó kem tau smulat ebéléen yó koni, monen, “Nim sulat ni, hwitu ebéléem, Tatinay yóm gubérnor bè yóm benwu fi desdef Él Yufratis ne ebéléem Sitar Businay ne ebè yó kem dumu genlal ye bè yó fi desdef Él Yufratis. Hol bê ye hloni edu yóm Gónô Dwata hdà le bè yó

⁷ ne bê ye tlek hnala yóm kehdà le du. Tódô bayà ye bè yóm gubérnor bè Juda ne bè yó kem tau gel malak yó kem Ju anì bud hdà le bè yóm sana tehe gónón mdà.

⁸ Ni mò hol hlauhu kuy, hol tnóbóng ye lu bè yóm bud kehdà le du yóm Gónô Dwata yó. Yó kem deng gamà le, gotu bnayad ye lemwót bè yó kem bwis yó kem dou tau nô fi desdef Él Yufratis anì henlel yó kem Ju mò du yóm nmò le.

⁹ Ket kdaw, hol blay ye bè yó kem tau gel blóng ebè Dwata bè Jirusalim yóm wen mu le du bè yóm gel kedsù le ebè Dwata. Benlay ye lu kem ngà safì tudu ne yó kem ubiha logi ne kem ngà ubiha mò dsù hkekeb le ebè yóm Dwata nô bè longit. Bè yóm gel kedsù le, ke wen mu le du halay duhen ke kahì duhen ke yóm gel ninum le duhen ke hnolo ulib, hol blay ye kul ket kdaw.

¹⁰ Yó gónóhu hmò du kuy nim ni anì gbek le demsù du bè yóm Dwata bè longit yó kem dsù hol nóyóen, anì yó homong hni le o bè yóm kul Dwata dalang se yó kem ngau logi anì nuyagen mi.

¹¹ Yó mò hol hgetu du nim monu ni, ke wen tau smonol du yóm kmò ye du nwa ye yóm koyu hlekel lem gónóen ne hendlà tnelem ye mò tool ye du yóm tau là mimón yó. Dalang se yóm gónóen, gotu genbà ye.

¹² Ke wen tau hol geta duhen ke wen sotu but tau tô là mimón du nim monu ni, duhen ke genbaen yóm Gónô Dwata bè yó, Dwata he gemlà du yóm tau yó yóm Dwata deng mélék yóm benwu Jirusalim, mò gónó le tmaba ebéléen. Ou se Daryus gónóhen lemwót nim udél ni. Hol béen abay wen tau tô smonol du.”

Kehfun le du ke Dwata yóm Gónóen

¹³ Tahu se, lemwót Tatinay yóm gubérnor bè yóm benwu fi desdef Él Yufratis, dalang se ke Sitar Businay ne yó kem dumu le genlal, tódô kendel nmò le yó kem hmò Daryus kul.

¹⁴ Ne yó kem tau gónó le gel galak yó kem Ju, tey wen gendeng le bè yóm kehdà le yóm Gónô Dwata lemwót bè yóm tey kegduf le kul yóm lewu kem tugod Dwata Hagay ne Sikaraya. Botong deng yóm Gónô Dwata tehe hmoen kul yóm kul Dwata yó kem tau Israél, dalang se yó kem tau hol geta bè Pérsya le Sirus ne Daryus ne Artasérksis.

¹⁵ Deng gotu deng yóm Gónô Dwata hdà le yó bè yóm getluhen kdaw bè yóm bulón Adar bè gnemen halay kogoten benwu Daryus.

¹⁶ Ominen yó, gotu le hligal yó kem tau Israél bè yóm kehfun le du ebè Dwata yóm Gónóen, lenwóten bè yó kem tau gel blóng ebè Dwata ne yó kem sfu Libay kkólen bè yó kem dumu tau tehe negef deng bud kól, gotu le hligal.

¹⁷ Bè yóm kehfun le du ebè Dwata yóm Gónóen, tey kedsù le. Yó kwen safì tudu dsù le, botong lematu ne lewu latu se ubiha logihen ne fat latu ngà ubihahen. Ne sfolò lewu kambing logi dsù le mò hkó salà, ket sotu kambing bè ket ból ngà Israél.

¹⁸ Omin le gotu mólól kul yó kem tau gel blóng ebè Dwata ne yó kem sfu Libay mò fen semtufì mò du yó kem nmò bè yóm Gónô Dwata bè Jirusalim. Tódô lolò le yóm deng tehe snulat Musis bè boken.

Kehligal le yóm Kdaw Khius

¹⁹ Bè yóm halay tmodol, bè yóm gesfoloen fat kdaw bè yóm tanay bulón tódô kdê yó kem tau tehe negef deng bud mulék, gotu hnigal le yóm Kdaw Khius.

²⁰ Kdê yó kem tau gel blóng ebè Dwata ne yó kem sfu Libay, deng gotu hfólós le knô le anì mólós kton Dwata kul. Lemwót yó kem sfu Libay, lu fen hmatay kul yó kem ngà ubiha mò utón le bè yóm Kdaw Khius yóm kdéen tau tehe negef deng bud mulék, gomong lemen yó kem tau blóng ebè Dwata ne yó kem kun kwen Libay.

²¹ Són gbót mken bè yó, són yó kem tau Israél tehe negef deng bud mulék ne yó kem tau Israél deng knogol le yóm gel nmò yó kem tólóng tau hmilol kul yóm kenbê Dwata bélê le, ne deng le bud semfulék tmaba ebè Dwata yóm sana kul Dwata hol gónó le mogot yó kem tau Israél.

²² Tikóng deng kken le yó kem yó, bud hitu kdaw le mò du yóm Kehligal le Mken yóm Mambang Laen Dù Bulung Henoken. Ya tey kehligal le abay se deng tenles Dwata kehedem yóm tau hol geta bè Asirya boluyen Sirus, botong tnóbóngen lu bè yóm kehdà le du yóm Gónô Dwata yóm sana kul Dwata yó kem tau Israél.