Isra 3 - Udél Dwata: Gna Kesfasad ne Lomi Kesfasad

Bud kehdà le yóm gónó demsù ebè Dwata

¹ Bè yóm ghituhen bulón, deng le tódô henek bè benwu le yó kem tau Israél deng mulék. Ominen yó, gotu le stifun bè Jirusalim yóm kdê le.

² Lemwót Jéswa yóm ngà Jihusadak, mung du yó kem dumuhen blóng ebè Dwata ne Sirubabél yóm ngà Syatil, mung du yó kem kun dumu setwoli, gotu sentóbóng hdà le yóm gónó le gel demsù ebè yóm sana kul Dwata yó kem tau Israél. Yó gónó le mò du anì bud dsù le bè yó yóm dsù hkekeb le ebè Dwata, tódô lolò le yóm hlau tehe snulat Musis yóm tau Dwata.

³ Balù yóm tey klikò le bè yó kem tólóng tau hmilol kul ewenem yó, tódô bud hdà le yóm gónó demsù ebè Dwata bè yóm sana tehe kun gónó mdà. Unin deng kehdà le du, tódô le kendel demsù bè yó tahen yóm dsù hkekeb le ebè Dwata yóm sana kul Dwata hol gónó mogot. Tódô ket hlafus le ne ket kifu le mò du nim ni.

⁴ Bud nmò le se yóm Kehligal bè Slung, tódô lolò le yóm hlau tehe snulat Musis. Tódô ket kdaw bè yóm kehligal le yó, wen kem dsù hkekeb le ebè Dwata.

⁵ Bud nmò le se yó kem dumu gel dsù le ket kdaw dalang se yóm dsù bè yóm kehligal le bè ksut yóm Lomi Bulón. Ne bud nmò le se yó kem dsù bè yóm kehligal gel nmò le sulék sfalay. Ne bud wen se yó kem dumu dsù tódô lemwót bè kul nawa yó kem tau.

⁶ Balù yóm là deng kbut kehdà le du he yóm Gónô Dwata, tódô nbut le bè yóm tanay kdaw bè yóm ghituhen bulón yóm kedsù le ebè Dwata.

Kbut kehdà le yóm Gónô Dwata

⁷ Bè yóm kbut kehdà le du yóm Gónô Dwata, yó nmò yó kem tau Israél, wen filak blay le mò mayad yó kem tau hulung kemleng botu ne yó kem tau hulung hemdà gónô. Ne wen kem koyu sidar nwa le bè yó kem tau bè syudad Tayal ne bè syudad Sidon. Yó wa le du bélê le, lenuluk le ken ne yóm gel ninum le ne hnolo ulib. Hono kem koyu sidar lemwót bè bulul yóm benwu Libanun. Yó lan le mit du hetów le te Mohin Miditiranyan, dmuung bè yóm syudad bè kilil mohin boluyen Jupa. Kdê ni kem nmò le ni, hono lemwót bè kun kóyô Sirus yóm tau hol geta bè Pérsya.

⁸ Duhen yó, deng lewu halay bud lewu bulón le deng kól bè Jirusalim, omin le yó mbut hemdà du yóm Gónô Dwata. Tódô kdê yó kem tau tehe negef deng bud mulék gotu semtóbóng mò nmò, gomong lemen le Sirubabél yóm ngà Syaltil, ne Jéswa yóm ngà Jihusadak kkólen bè yó kem dumuhen gel blóng ebè Dwata ne yó kem sfu Libay. Yó fen mogot du yóm bud kehdà le yóm Gónô Dwata yó, duhen yó kem sfu Libay deng lewu folò halayen duhen ke deng mukas.

⁹ Yó kem sfu Libay yó, duhen le Jéswa ne yó kem ngaen logi gomong kem dumuhen setwoli ne Kadmiyél ne yó kem ngaen logi lemwót bè tbong Hudabiya, gotu stóbóng smolu du yóm bud kehdà le du yóm Gónô Dwata yó. Bud le tmóbóng snéen yó kem sfu Libay lemwót bè tbong Hinadad.

¹⁰ Timbow deng gotu deng kmò le begelen yóm Gónô Dwata yó, lemwót yó kem tau gel blóng ebè Dwata lesek le yóm nes gel lesek le bè yóm keseblóng le tau ebè Dwata, mogot le féw ne mdà le bè yóm kul gónó mdà mféw. Lemwót se kul yó kem sfu Libay lemwót bè tbong Asaf, bud le mdà bè yó snéen, sendofì le yóm kul gel nuni. Tey kdóyón le ke Dwata, tódô lolò le yóm hlolò bè yóm tehe kun kdaw Dabid.

¹¹ Sngal le yóm sngal dmóyón ke Dwata, bud gel sensulit le yóm korosen, mon le, “Tey hyu yóm Dwata. Yóm kbong nawan yó kem tau Israél, laen kô dù nan e són.” Tódô kdê le gotu hemsag dmóyón ke Dwata, abay se deng gotu deng kmò le du begel yóm Gónô Dwata hdà le.

¹² Okóm tey dê bè yó kem tuha gel blóng ebè Dwata ne yó kem tuha bè yó kem sfu Libay ne yó kem tuha bè yó kem tau malak bè ket tbong yó kem tau Israél, deng gotu tehe gmafit mton du yóm gna Gónô Dwata tehe hdà le ne gotu le mkik bè yóm kton le du yóm nmò le ni. Okóm yó kem dumu nô bè yó, tey kehligal le botong le mensag.

¹³ Laen dog gemtukul du ke wen hligal mensag bélê le duhen ke wen mkik, bà mon yóm tey kehebnes le botong gungolem mayuk. Là gomongen bè nili yóm tsaptér 4 ne 5. Yó tulónen yóm kehdà kem tau Israél du yóm Gónô Dwata efet wen kem hohon le bè yó kem benwu hmilol kul hemseng du yóm nmò le. Yó nmò ni kem hohon le ni, smulat le ebè yóm tau hol geta bè Babilun anì hensengen yóm kehdà le yóm Gónô Dwata. Ne tahu se, hensengen. Botong sfolò nem halay kegen le là tagad bud mò nmò yó kem tau Israél efet hógów Dwata Hagay ne Sikaraya elem blóng le yó kem tau tugoden mò temgel nawa le. Bè yóm bud kmò le nmò, lemwót yó kem hohon le yó, bud le smulat ebè yóm tau hol geta bè Babilun, hentukul le béléen ke tahu lemwót bè yóm tehe Sirus yóm kehdà le Gónô Dwata yó kem tau Israél.