Isra 1 - Udél Dwata: Gna Kesfasad ne Lomi Kesfasad

Khulék Sirus yó kem Ju ebè yóm kul benwu bè Jirusalim

¹ Bè yóm hol tanay halay kogot Sirus yóm tau hol geta bè Pérsya, hdohò Dwata yóm tehe eles htulónen yóm sotu tehe tugoden ekni boluyen Jirimaya. Yó nmò Dwata, wen hefedemen ke Sirus anì wen snulaten mò hwiten ebè klamang yóm benwu snakufen. Yó kóyô Sirus bè nim sulaten ni ke hgel le semfala du bè gónón wen bè klamang yóm benwu nogoten. Yó snulaten, monen,

² “Ni se udél Sirus ebélê ye, yóm tau hol geta bè Pérsya. Yóm sana Dwata hol gónó mogot yóm Dwata nô bè longit, deng gotu hkamalen do yóm klamang benwu. Deng fen sigangen tahu bud hemdà du yóm kun Gónô bè Jirusalim yóm syudad glem lem Juda.

³ Yóm kdê ye kem kun tau Dwata tehe negef, hol ye bud mulék ebè Jirusalim bè benwu Juda na ye e bud hdà yóm kun Gónô Dwata yóm sana kuy Dwata hol gónó mogot kem tau Israél, yóm Dwata nô bè Jirusalim. Yó hem sana kuy Dwata tendo nô bélê ye.

⁴ Bè yóm bud kulék le ebè Jirusalim ni kem tau ni, yó mò fen tmóbóng kul, duhen yó kem dumu le negef tolo tebel. Hol benlay le lu, kem blówón bukay ne tahu blówón, ne yó kem wen mu le du bè lan ne yó kem ógóf mò fen lemulón, hol néen yóm mò blay le bè yóm kun Gónô Dwata bè Jirusalim.” Yó se yóm udél snulat Sirus.

⁵ Tahu se, gotu le htifes yó kem tau fen malak bè ket tbong yó kem tau semfu gu bè Juda ne bè Bindyamin kkólen bè yó kem tau blóng ebè Dwata ne yó kem sfu Libay ne kdê yó kem dumu tau tendól Dwata lem hendem le. Tódô kdê le gotu htifes anì bud le mulék ebè Jirusalim na le e bud hdà yóm Gónô Dwata.

⁶ Tódô kdê yó kem dumu le sebét gotu tmóbóng kul mlan bè yó kem tey dê blay le kul. Benlay le lu yó kem tukung blówón bukay ne kem tukung tahu blówón. Bud blay le kul snéen yó kem kdê wen mu le du bè lan. Ne wen kem ógóf lemulón blay le kul ne wen se kem dumu kimu mebtes ne wen se yóm blay le kul mò bud blay le ebè Gónô Dwata.

⁷ Sotuhen, wen kem ngom mebtes tehe nuku Nibukadnisar lem yóm Gónô Dwata bè Jirusalim ne suen lem yóm gónô yó kem kun dwata bè Babilun. Yó nmò Sirus, gotu bud hwiten mulék ebè Jirusalim ni kem ngom mebtes ni.

⁸ Gotu hsóhen ke Mitridat, yóm tau fen gel mogot filak bè Pérsya, anì gotu listahen. Lemwót se ke Mitridat kun, gotu bud blayen ke Sisbasar yóm kdéen yóm tau fen malak yó kem tau tehe negef bud mulék ebè Juda.

^9-10 Ni se lista yó kem ngom blay Sirus yó koni: huyów tahu blówón 30 huyów blówón bukay 1,000 gónó mit ofi nmò bè blówón bukay 29 tukung tahu blówón 30 tukung blówón bukay 410 yó kem dumu ngom 1,000

¹¹ Yó kwen yó kem ngom bud hwit Sirus kul le Sisbasar, 5,400 kwenen, hono ngom nmò bè tahu blówón ne bè blówón bukay. Nim kdéen ni, gotu nwit le Sisbasar ne yó kem dumuhen tehe negef bud mulék ebè Jirusalim gu bè Babilun. Là gomongen bè nili yóm tsaptér 2. Yó tulónen yóm gotu ksó le yóm kdê yó kem tau Israél tehe negef bud mulék ebè benwu le mò tmóbóng bud hemdà yóm Gónô Dwata. Yó kmò ksó le kul, nsó le lu mlan bè ket tbong le bede olo le lista yó kem tuha gónó le gu semfu. Bud tulónen bè ni snéen yóm tey keblat yó kem tahu blówón ne blówón bukay blay le mò klóón yóm Gónô Dwata.