Isikél 47 - Udél Dwata: Gna Kesfasad ne Lomi Kesfasad

Yóm él hlowil

¹ Lemwót yóm tau hógów Dwata mit do yó, bud nwiten ou semfulék ebè bak dól yóm Gónô Dwata. Wen él tonu bè yó mlel laan yóm bak dól bè Gónô Dwata, bede mlel fi leged yóm bak dól yó ne hlós mlel etu fi dmata kdaw, loloen yóm gónón e smolu yóm Gónô Dwata. Niusen yóm gónó demsù, bede mlel fi legeden.

² Ominen bud lemwót yóm tau yó, nwiten ou e tekwang yóm beng Gónô Dwata, mlan me bè yóm bak tikeb fi bwak omin me lemibut etu bè yóm bak tikeb fi dmata kdaw. Bè yó bud tonu sfu yóm él mlel, mlan fi leged bè kilil yóm tikeb fi dmata kdaw.

³ Yó nmò me yóm tau mit do yó, nool me yóm él bede wen btes nwiten. Yóm igò me mool bentesen yóm deng lan me efet kól bè limu latu mitru klayuk me. Yóm él bè yó, tek són bè sokil me.

⁴ Kewót me bè yó bud bemtes limu latu mitru emool. Ne yóm él bè yó, deng kól bè bukol me. Bud kewót me bè yó bud bemtes limu latu mitru emool ne yóm él bè yó deng kól bè ówók me.

⁵ Bud kewót me bè yó bud bemtes limu latu mitru emool. Ne yóm él bè yó, là bud gbek me mifal du ke là kmohung me, abay se deng nelem ne laen dù tau bud gembek mifal du.

⁶ Ne yó monen mò do yóm tau yó, “Ó Tau Tonok, tódô suem bè nawam yóm deng tonem ni.” Ominen bud mit dou semfulék, snubô me yóm él lan me tmubé.

⁷ Bè yóm bud kesfulék me tey ketngahu, tey wen kem koyu tonu mteg sfatà tmubé yóm él yó.

⁸ Ne yó udélen ebéléu yóm tau yó, monen, “Nim él ni, mlel etu fi dmata kdaw elem yóm benwu là hyu menwu du efet kól bè Datal Jurdan, hlós elem Mohin Héét. Yóm kkólen elemen, tódô gotu kóhen khéét yóm él mohin yó, henbalingen él hyu.

⁹ Balù kihu gónón e mlel nim él ni, angat le gotu mowil lemen yóm kdéen kay mowil gel nô lem él. Ne tey wen utón él nô lemen, yakà mlelen elemen nim él ni, henbalingen él hyu yóm él sidek khééten. Yó gónóm mon, balù kihu gónón e mlel nim él ni, angat gotu hlowilen yóm kdéen.

¹⁰ Yó kem tau gel hmuket, angat le gotu sedà hilol kilil yóm Mohin Héét ni. Lemwót bè In-gidi tau mdà efet kól etu fi bwak bè yóm benwu In-iglaim, tódô sotu kun mbot byalahen. Angat tódô hnok byala mngal bè kdaw hilol kilil yóm mohin yó. Tódô ket kay utón angat nô lemen, lómón yóm alì kwen utón lem Mohin Miditiranyan.

¹¹ Okóm yó kem tonok lebu bè hilol kilil él, tódô senflósen héét mò gónó le gel ma kahì.

¹² Tódô kdéen koyu mungu, angat le gotu mteg sfatà kilil yóm él yó. Là kô le mékéng yó kem doun le ne là kô le tbó. Tódô senflós le mungu yó kem koyu yó, tódô ket le bulón bud mungu, yakà tendo le méfê bè yóm él mlel lemwót gu bè Gónô Dwata. Yóm bungu le mò gel ken ne yóm doun le mò gel hkó des.” Là gomongen bè nili yóm bérs 13 kól bè bérs 23. Yó tulónen bè ni kem bérs ni yóm kmò keblóng Dwata du yóm klamang benwu Israél. Là gomongen bè nili yóm tsaptér 48. Yó tulónen bè yóm tsaptér ni yóm kmò kólól Dwata du bè sfolò lewu ból Israél yóm tonok bè benwu Israél, ne yóm kmoen boluy yó kem sfolò lewu bak tikeb yóm syudad Jirusalim, bede hewóten bè boluy yó kem sfolò lewu ngà Jakub.