Isikél 37 - Udél Dwata: Gna Kesfasad ne Lomi Kesfasad

Yóm datal tódô hono tiol

¹ Omin Dwata bud mogot do, yóm sana Dwata hol gónó mogot. Yó nmò yóm Tulusen, nwiten ou etu bè yóm datal tódô hono tiol.

² Nwiten ou hlalak lem yóm tey tiol deng legen, tódô tfeng datal. Tódô hgasà bè yóm datal yó yóm tey tiol wen.

³ Omin Dwata smólók do, monen, “Ó Tau Tonok, gbek le bud baling tau kô ni kem tiol nii?” Bnalau se, monu, “Ó Dwata, yóm hol dandónen geta, tek són uu temngón du balaen yóm snólókem yó.”

⁴ Omin Dwata bud mon du mò do, “Mudéli ebè ni kem tiol nii, monem mò kul, ‘Ó kem tiol deng legen, hnungol ye yóm udél Dwata ebélê ye.

⁵ Ni se udél yóm sana Dwata hol dandónen geta, yó monen, Ngem, wen nawa suu bélê ye anì bud ye mowil.

⁶ Bud nmou ulat ye ne unged ye ne bud nmou kulit ye. Wen nawa suu bélê ye anì bud ye mowil. Omin ye yó he temngón du ou se yóm sana Dwata hol gónó mogot.’ ”

⁷ Tahu se, mudéle ebè yó kem tiol yó lómón yóm deng mon Dwata mò do. Unihu mudél, tódô gungolu se yóm uni stitik, tódô le gotu kendel sogot yó kem tiol bè ket sotu lówó

⁸ Yóm igou temngel kul, tódô wen ulat le ne unged le yó kem tiol yó. Ominen lengeb lówó le kulit, okóm là mnawa le.

⁹ Omin Dwata mon du mò do, “Ó Tau Tonok, mudéli ebè lenos, monem, ‘Ó lenos, ni se udél yóm sana Dwata hol dandónen geta. Mbel ye edini gu bè yóm fat kem gónó ye gu mbel ne ye e myuf ebè ni kem lówó deng matay nii anì bud le mowil.’ ”

¹⁰ Tahu se, udélu yóm mon Dwata mò do yó ne tódô wen lenos husek elem yó kem lówó yó koni ne baling le mnawa. Gotu le mowil omin le gotu mdà, ya tey kwen le.

¹¹ Yó bud udél Dwata ebéléu, monen, “Ó Tau Tonok, ni kem tiol nii hnigaden yóm kdéen tau Israél. Yó tendo gel mon le, ‘Yóm klowil tekuy yóm kmoen ni, hol lómón ke tiol deng legen, laen dù bud nefet nawa tekuy ne, ne laen dù bud gónón e kól yóm klowil tekuy elem hulin kdaw.’

¹² Duhen ni, hol tulónem kul yóm udél lemwót bè yóm sana Dwata hol dandónen geta, yó monen, Ó kem dou tau, lemwót bè yóm deng kegef le kuy, lómón ke deng ye lebeng. Okóm angat bud nokolu yu ne bud hlowilu yu, ominu bud mit kuy semfulék ebè benwu Israél.

¹³ Ke deng nmou bélê ye nim ni kem dou tau, yó he angat ketngón ye du ou se yóm sana kuy Dwata hol gónó mogot.

¹⁴ Suu bélê ye yóm dou Tulus ne angat ye bud mowil ne bud hesfuléku yu ebè yóm hol kuy benwu. Omin ye yó he temngón du ou se yóm sana kuy Dwata. Angat ton ye kdohoen yóm kdê deng fasadu kuy ni. Ou se yóm sana kuy Dwata hol gónó mogot yóm mudél ni.”

Bud kessotu le benwu Israél yóm benwu Juda

¹⁵ Yó bud udélen ebéléu yóm sana Dwata hol gónó mogot,

¹⁶ monen, “Ó Tau Tonok, mahi ngà hanga koyu snulatem du yóm udél nii, ‘Ke Juda ne ból yó kem dumuhen setwoli deng mung béléen.’ Ominem bud ma gewuhen snulatem du yóm udél nii, ‘Ke Israél ne ból yó kem dumuhen setwoli deng mung béléen.’Tódô sensotuhem kmò kogotem kul yóm lewu ngà hanga koyu yó.

¹⁷ Tódô sensotuhem kmò kogotem kul yóm lewu ngà hanga koyu yó.

¹⁸ Ke snólók le u yó kem dumuhem Israél tedu lanen yóm nmoem ni,

¹⁹ tulónem kul, monem, ‘Ni se udél yóm sana Dwata hol dandónen geta, monen, Yóm benwu Israél fi bwak, bud tnuu bè Juda anì bud le ssotu yóm lewu le.’

²⁰ Hegfanem bè yó kem tau yóm lewu hanga koyu nogotem.

²¹ Tulónem kul yóm udél yóm sana Dwata hol dandónen geta, yó monu, Gotu bud sentifunu lu yó kem tau Israél deng nô bè yó kem tólóng benwu. Bud nwitu lu mulék gu bè yó kem benwu deng gónó le e sekla, nwitu lu mulék ebè yóm hol kul benwu.

²² Bud sensotuhu lu bè benwu le. Tek sotu tau mogot kul ne là bud le sólól ne.

²³ Là bud nmò le du yóm là mólósen ke tmaba le ebè yó kem dwata kéng ne ke nmò le yó kem dumu sidek tehe gel nmò le, yakà angat lenwau kul bè yóm gónó le gel teklé. Nolobu lu. Omin le yó he baling mò dou tau ne ou se mò kul Dwata.

²⁴ Yó angat geta bélê le, duhen Dabid yóm tau tóbóng lówóhu. Tek sotuhen yóm semgyok kul. Ne tey kimón le du yó kem hlau ne yó kem dou hlolò kul.

²⁵ Angat le nô bè benwu Israél, yóm benwu tehe gónó le nô yó kem tehe fù le, yóm benwu tehe blayu ke Jakub, yóm sotu tau tóbóng lówóhu. Laen kô dù sónen yóm knô le bè yó, dalang se yó kem ngà le kkólen bè yó kem angat lugod le elem hulin kdaw. Ne Dabid yóm tau tóbóng lówóhu, angat laen kô dù sónen yóm kegetahen bélê le.

²⁶ Yó fasadu kul yóm kenek kbenwu le, hol fasad laen dù sónen. Bud blayu kul yóm kul benwu ne angat tey kehbólu kul. Bud hdau lem blóng le yóm dou Gónô ne laen kô dù sónen yóm knóen lem blóng le.

²⁷ Tódóe nô lem blóng le. Ou se mò kul Dwata ne lu se mò dou tau.

²⁸ Lemwót bè yóm klaen dù sónen yóm knóen lem blóng le yóm dou Gónô, bè yó gónó le temngón du yó kem dumu tau hmilol kul yóm deng kehetfingu kul yó kem tau Israél mò hol dou tau laen dù belen le. Ou se yóm sana kuy Dwata hol gónó mogot nim mudél ni.” Là gomongen bè nili yóm tsaptér 38 kól bè tsaptér 46. Yóm ktafak Dwata ke Gog lanen mled yóm benwu Israél. Yó kmò Dwata du, hlanen bè yóm hol són gida bong talak tonok.Ne yóm bud kehgulék Dwata yó kem tauhen. Bud ketlob Dwata yóm kun Gónô ne yóm bud kesfuléken elemen, mung du yóm tey klóónen. Kessólól le yóm tonok bè Israél ne yóm bud kmò le du yóm gel kedsù le ebè Dwata ne yó kem dumu gel kehligal le.