Isikél 34 - Udél Dwata: Gna Kesfasad ne Lomi Kesfasad

Yó kem tau sidek kesegyok le ubiha

¹ Ominen wen bud udélen ebéléu yóm sana Dwata hol gónó mogot, monen,

² “Ó Tau Tonok, eles tugodem do yóm udélu ebè yó kem tau semgyok yó kem dou ubiha, duhen yó kem tau malak yó kem dou tau Israél. Tulónem kul yóm udélu, udél yóm sana Dwata hol dandónen geta, monem mò kul, Yu kem tau malak bè Israél, deng ye golu elem hatay ne. Són olo sen-gyok ye són yóm kuy knô, là kô dog olò sen-gyok ye kul yó kem dou ubiha nalak ye.

³ Mom yu fen gel minum gatas le ne yóm nes ye nmò ye gu bè bul le. Gel nétê ye yóm ubiha alì mabù bè kdéen, okóm mom fen hbitil ye lu yó kem ubiha nalak ye.

⁴ Là kô dog ten-gel ye kul yó kem lunog. Là se kô bnulung ye kul yó kem wen desen. Là kô dog bnaus ye kul yó kem tfok bélê le. Là se kô hnebel ye kul yó kem deng tabag dalang se yó kem deng tlas. Deng mom yó nmò ye, tendo danda dók ye lu ne lel ye hemsidek kul.

⁵ Yó gónóm mon, tódô le gotu sekla yó kem dou ubiha lanen laen dù tau semgyok kul. Tey mahil bè yó kem ógóf lem bnes msék kul.

⁶ Deng le gotu tabag gu lem bulul ne. Deng le gotu sekla bè klamangen ne laen kô dù tau mebel kul.

⁷ Yó gónóm mon, yu kem tau tehe hesegyoku yó kem dou ubiha, hol hnungol ye yóm udél yóm sana Dwata hol gónó mogot.

⁸ Safau bélê ye hlanu bè yóm là katayu, ou se yóm sana Dwata hol dandónen geta ne ni se yóm dou udél. Yó kem dou ubiha, deng tódô bayà hsék ye lu bè yó kem ógóf lem bnes. Igoen yu yó kem tau hesegyoku kul, moen de ke là hnebel ye kul yó kem dou ubiha deng lana? Són kuy knô yóm sen-gyok ye, fen mom henus ye yó kem dou ubiha.

⁹ Yó gónóm mon, kem tau hesegyoku ubiha hol hnungol ye yóm udélu ebélê ye,

¹⁰ udél yóm sana Dwata hol dandónen geta. Yó kem tau hesegyoku ubiha yó baling hohonu lu, ntuku bélê le yóm gfà yó kem dou ubiha. Là bud hesegyoku du kul ne yó kem ubihahu anì laen dù bud gónó le ma mò ken le. Yó kem dou ubiha, lenwau lu lem hólól le anì là bud gken le kul.”

Dwata yóm hyu kesegyoken ubiha

¹¹ “Ni se bud udél yóm sana Dwata hol dandónen geta, monen, Tódô ou ne angat mebel kul yó kem dou ubiha efet gotu tonu lu.

¹² Yóm nmou bélê le, hol lómón yóm tau gel semgyok ubiha, gotu bud hnebelen yó kem ubiha deng sekla. Angat bud nebelu lu yó kem dou ubiha deng sekla ne lenwau lu gu bè yó kem benwu deng gónó le e sekla bè yóm gnan kdaw alì sidek kget kkifuhen.

¹³ Angat bud nwahu lu gu bè yó kem tólóng benwu gónó le nô ne gotu sentifunu lu ne bud nwitu lu semfulék ebè yóm hol kul benwu bè Israél. Hótóbu lu bè yó kem bulul bè Israél ne bè yó kem kilil él gónó le gel nô yó kem tau.

¹⁴ Tahu se, angat tódô bayau lu mótób bè yó kem tey bnes bè yó kem bulul bè Israél. Bè yó tódô gónó le henek hlilil ne mótób le bè yó kem tey tilob bnes gu ta bulul.

¹⁵ Tódô ou ne semgyok kul yó kem dou ubiha, mebele bélê le mò gónó le hegnô, udél yóm sana Dwata hol dandónen geta.

¹⁶ Angat bud nebelu lu yó kem deng lana, nwitu lu semfulék yó kem deng tabag. Bnausu ke wen tfok bélê le ne hekgisu yó kem lunog. Okóm yó kem deng mabù ne kemgis bélê le, gotu genlau lu. Ou se yóm semgyok ubiha tedeng kkukumen.

¹⁷ Ke bélê ye kuy, kem tau Israél kem dou ubiha, ni se udél yóm sana Dwata hol dandónen geta. Knukumu yu yóm ket kuy na sotu, sentólóngu yóm hyu bè yóm sidek duhen yó se kem ubiha ne yó kem kambing.

¹⁸ Là gsengel nawa ye du he kô yóm tey hyu gel nótób ye yó? Moen de ke bud sensdà ye yóm dù bnes là nótób ye du? Là gsengel nawa ye du kô yóm tey él tikaw gel ninum ye yó? Moen du ke bud lenbol ye yóm là ninum ye du?

¹⁹ Són tebel bè yó kem dou dumu ubiha, són yóm bnes deng hónô leniseg sensdà ye ne són ninum le yóm él deng lenbol ye.

²⁰ Yó gónóm mon, ni se udél yóm sana Dwata hol dandónen geta, yó monen, Hol dohò se kkukumu kul yó kem dou ubiha mabù ne yó kem dou ubiha lehen.

²¹ Yu kem ubiha mabù, deng mom tulud ye ne snukót ye lu yó kem dou ubiha wen des le lel le bitil efet le deng mom gotu sekla ebè yó kem benwu mayuk.

²² Yó gónóm mon, ou ne angat lemwà kul yó kem dou ubiha anì laen dù bud tau hemsidek kul. Ne gotu knukumu lu yóm ket kul na sotu yóm kdê ubihahu.

²³ Angat wen sotu tau hesegyoku kul, yóm tau semfu gu bè Dabid yóm tóbóng lówóhu. Du se mò hótób kul ne semgyok kul.

²⁴ Ne angat ou se yóm mò Dwata le ne yóm tau semfu gu bè Dabid yó yóm tóbóng lówóhu, du se mò geta bélê le. Ou se yóm sana Dwata hol gónó mogot yóm mudél ni.

²⁵ Angat wen senfasad me yó kem dou tau, duhen yóm kenek kbenwu le. Ne yó kem ógóf lóbô lem bnes nô ta yóm tonok le, gotu lohu lu mayuk ani yó gbek le tódô tungô lem dlag yó kem dou tau, laen kô dù bud knikò le.

²⁶ Tendo nuyagu lu yó kem dou tau ne suu lu hilol yóm dou bulul, bè yó gónóhu tmóbóng kul. Hkulónu elem benwu le bè yóm kdaw wen mu le du. Bud lómón yó se angat tendo kehkulónu du ebélê le yóm tóbóngu kul.

²⁷ Yó kem koyu mungu le, angat tey kbungu le ne tey tembas yóm tonok le ne tey menek kbenwu le yóm kdê le. Ke deng hentohu yóm kdina fét le kul yó kem hohon le ne ke deng lenwau lu bè yó kem tau gónó le ghesek, bè yó he gónó le temngón du ou se yóm sana kul Dwata hol gónó mogot.

²⁸ Là bud hnamfas le kul ne yó kem tólóng benwu, dalang se yó kem ógóf lem bnes là bud nsék le kul. Angat tey menek kbenwu le, laen dù bud hmikò kul.

²⁹ Yóm tonok le angat tey tótól bè yóm alì ketbasen, anì yó là bud le bitil yó kem dou tau ne là bud le myak bè yó kem tólóng benwu kemhisik kul.

³⁰ Yóm nmou bélê le ni, bè ni gónó le temngón du ou se yóm sana kul Dwata hol gónó mogot yóm tendo nô bélê le. Ne tngón le se kul yó kem tau Israél ou se mfun kul, udél yóm sana Dwata hol dandónen geta.

³¹ Yu se yó kem dou ubiha, yóm tendo gel hótóbu. Hol yu se yó kem dou tau ne ou se yóm kuy Dwata, udél yóm sana Dwata hol dandónen geta.” Là gomongen bè nili yóm tsaptér 35. Yó tulónen bè yóm tsaptér ni yóm ktafak Dwata yóm benwu Idom.