Isikél 33 - Udél Dwata: Gna Kesfasad ne Lomi Kesfasad

Kélék Dwata ke Isikél mò mentey bè yó kem tau Israél

¹ Ominen bud wen udélen ebéléu yóm sana Dwata hol gónó mogot, monen,

² “Ó Tau Tonok, tulónem yó kem dumuhem Israél yóm udélu ebélê le ni. Ke wen kem sendalù hwitu elem yóm sotu benwu, yó angat nmò yó kem tau bè yóm benwu yó, wen tau nélék le mò fen mentey.

³ Yóm tau mentey nélék le yó, ke tonen ksut yó kem hohon le, yó nmoen, kendel mféw anì getgama le yó kem tau.

⁴ Ke wen tau hlingay là kemmón du yóm uni féw yó ne msut yó kem hohon le, ke matay yóm tau yó tódô kun salà se yó.

⁵ Deng gungolen yóm uni mò hetgama ne là dog kenmónen du. Yó gónóm mon, kun salà ke matay. Ke tehe nimónen yóm eles hetgama du, là kóen na a matay.

⁶ Okóm yóm tau mentey yó, ke tonen yóm ksut yó kem hohon le ne ke là dogen mféw mò gónó le getgama yó kem tau, angat ntuku béléen yó kem tau matay. Tódô le matay igoen tolo nô ta le yó kem salà le, tódô angat ntuku bè yóm tau mentey yó yóm katay le.

⁷ Duhen yó, Tau Tonok, nmou uu mò mentey yó kem tau Israél. Yó gónóm mon, hol hnungolem yóm udélu anì eles wen hetgamahem kul lemwót béléu.

⁸ Ke eles hetgamahu yóm tau mò sidek yóm angat katayen ne ke là eles tnulónem du anì tenlesen kmoen, angat matay yóm tau yó igoen tolo nô tahen yó kem salaen, okóm angat ntuku béléem yóm katayen.

⁹ Okóm ke eles wen hetgamahem du anì hegsel ne là dogen móyô hegsel, angat matay yóm tau yó igoen tolo nô tahen yó kem salaen. Okóm là kô ntuku du béléem yóm katayen yó.”

Yóm kun tulón yóm tau mentey

¹⁰ “Ó Tau Tonok, tulónem yó kem tau Israél yóm udélu ni. Tulónem kul yóm gel mon le, ‘Tey sidek keblaten yóm salà nô ta tekuy, dalang se yó kem dumu sidek deng gel nmò tekuy. Yó kmoen du, sónmoen minut sidek klówó tekuy. Tedu tô kmò klowil tekuy du?’

¹¹ Okóm ni se udél yóm sana Dwata hol dandónen geta, monen mò kuy, ‘Yóm tulónu kuy ni, safau bélê ye hlanu bè yóm là katayu. Là kóe hligal du ke matay yóm sotu tau igoen tolo nô tahen yó kem salaen. Hyu nawaw ke tenfloken yóm kmoen sidek anì mowil. Ó kem tau Israél, tenflok ye ne yó kem sidek gel nmò ye. Moen de ke móyô ye kendel matay?’

¹² Ó Tau Tonok, tulónem yó kem dumuhem Israél yóm udélu ni, yó monu, Yóm tau tedeng kmoen, ke deng mom bud mò sidek, laen kô dù lanen gewà du yó kem hyu deng tehe gel nmoen. Ne yóm tau gel mò sidek, ke tenfloken yóm gel kmoen sidek, là kóen bud megtafak ne lemwót bè yóm sidek tehe gel nmoen.

¹³ Ke tulónu yóm tau tedeng kmoen angat mowil se kun, okóm kogolen bè yó deng mom bud mò sidek ne snaligen yóm hyu tehe gel nmoen mò gónón gewà, okóm là, là kóen gewà du. Là kô bud hendemu du ne yó kem hyu deng tehe gel nmoen. Angat kendel matay yóm tau yó lemwót bè yó kem salà nmoen.

¹⁴ Sotuhen, mò kmoen se ke eles tulónu yóm tau mò sidek yóm angat katayen, okóm kogolen bè yó tenfloken yóm kmoen sidek ne tendo gel nmoen yóm tedeng ne yóm hyu,

¹⁵ huléken yóm deng sandà le béléen ne huléken yóm deng hennagawen ne gotu nimónen yóm kdê hlauhu kul mò gónó le mowil ne là bud nmoen du yó kem sidek tehe gel nmoen, là kóen kendel matay yóm tau yó, angat mowil.

¹⁶ Là bud snolou du béléen ne yó kem sidek deng gel nmoen, yakà deng tendo nmoen du yóm tedeng ne yóm hyu ne yó se gónón angat mowil.

¹⁷ Okóm deng mom yó udél yó kem dumuhem Israél, mon le, ‘Là tedengen yóm nmò Dwata.’ Là, kaem yóm kul nmò yóm là tedengen.

¹⁸ Yakà deng monu du ke mom bud mò sidek yóm tau tehe tedeng kmoen, angat matay du se yó.

¹⁹ Okóm yóm tau mò sidek, ke tenfloken yóm kmoen sidek ne tendo nmoen yóm tedeng ne yóm hyu, angat mowil du se yó.

²⁰ Ó kem tau Israél, là tahuhen yóm gel mon ye, ‘Là tedengen yóm nmò Dwata.’ Okóm angat knukumu yu ket kuy na sotu lemwót bè yóm deng gel nmò ye.”

Lewót gónón gbà Jirusalim

²¹ Timbow deng sfolò lewu halayen yóm deng kegen le megef kum ebè Babilun, bè yóm glimuhen kdaw bè yóm gesfoloen bulón bè yóm halay yó, wen sotu tau mlóy lemwót gu bè Jirusalim mógów ebéléu yó tulónen do, monen, “Deng gwa kem hohon tekuy ne yóm syudad Jirusalim.”

²² Bè yóm kifu gu laanen là deng sut he, tódô gnómu yóm tey kfasang Dwata béléu, bud hudélen o anì yó bude gudél bè yóm kegdek yóm tau ni.

²³ Ominen bud wen udél Dwata ebéléu, monen,

²⁴ “Ó Tau Tonok, yó tendo udél yó kem dù tau menwu bè yó kem syudad deng gbà bè Juda, mon le, ‘Tek sotuhen se kun yóm Abraham. Baluen ke tek sónen du, béléen gónó Dwata bemlay du yóm klamang tonok. Ne ni, deng tekuy baling dê, yake blayen tekuy yóm tonok ni mò nfun tekuy.’

²⁵ Ni hol tulónem yó kem tau yó yóm udél yóm sana Dwata hol dandónen geta, yó monen, Deng gel ken ye yóm utón mung du litóen, deng ye tmaba ebè yó kem dwata kéng ne deng hnatay ye yó kem tau laen dù salaen. Knóón kô ke kuy funen yóm tonok yó?

²⁶ Igò ye tau monok, kem tau tmaba ebè dwata kéng, kem tau smamuk. Knóón kô ke gfun ye yóm tonok yó?

²⁷ Bud tulónem kul yóm udél yóm sana Dwata hol dandónen geta, yó monen, Ni safau bélê ye hlanu bè yóm là katayu. Yó kem dù tau nô bè yó kem syudad deng gbà angat le gotu matay bè sudeng. Yó kem dù tau menwu lem bulul angat gotu nsék le lu yó kem ógóf lem bnes. Yó kem dù tau hebnos lem bulul ne lem kilib angat le gotu matay bè des.

²⁸ Angat gotu genbau yóm benwu le, henbalingu benwu là hyu menwu du. Ne nmou sónen yóm kul kgis tendo salù le. Yó kem bulul bè Israél nmou bulul meklos, laen dù tau gembek mlan du.

²⁹ Ke deng genbau yóm tonok le lemwót bè yó kem salà alì kenyak deng gel nmò le, bè yó he gónó le temngón du ou yóm sana Dwata hol gónó mogot.

³⁰ Ó Tau Tonok, gel sentulón le uu yó kem dumuhem Israél. Gel sentulón le uu ditu bè gónô le ne gel le sboyong bè bak dól le, mon le, ‘Lemwót tekuy ne mò tekuy knuli. Hnungol kuy yóm udél lemwót bè Dwata tulón yóm tau tugoden.’

³¹ Tahu se lemwót le, myón le bè soluhem hlingón hnungol le yóm tulónem. Okóm là kóen nô bè nawa le mimón du yóm dou tulón kul mlan béléem. Tey hyu yóm udél kesbong nawa gel btang bè sumóng le, okóm là kô kó le du yóm keseglom le anì wen guta le.

³² Bè kul kehedem kóm yó kem tau yó, lómón ke uu yóm tau mò hefligal kul, lómón yóm tau gel semngal yóm sngal sbong nawa ne huni yó kem gel nuni le. Olo le beyen hmungol kóm, okóm là kô nimón le du.

³³ Okóm ke deng gotu dohò eta le yó kem gfà deng tulónem kul, bè yó he gónó le temngón du deng wen tugod Dwata nô lem blóng le.”