Isikél 3 - Udél Dwata: Gna Kesfasad ne Lomi Kesfasad

¹ Yó udélen ebéléu yóm mudél yó koni, monen, “Ó Tau Tonok, kenem yóm sulat lenulun ni. Ominem lemwót nam e tulón bè yó kem tau Israél yóm udél nô lemen.”

² Tahu se, mnangahe ne hkenen do yóm sulat lenulun yó.

³ Yó monen mò do, “Kenem yóm kdéen.” Yóm kkenu du, hol lómón kmihen tneb.

⁴ Ominen bud mon du mò do, “Yó ne, Tau Tonok, mógówi ebè yó kem tau Israél nam e tulón kul yóm udélu ebélê le.

⁵ Là hógówu kóm ebè yó kem tólóng tau là tngónem du udél le, okóm hógówu uu ebè yó kem tau Israél.

⁶ Sundu ebè yó kem tólóng tau là tngónem du udél le. Bè ktahuhen, ke hógówu uu ebélê le kaem hnungol le uu.

⁷ Okóm hógówu uu ebè yó kem tau Israél ne là kô na le e hnungol kóm. Balù sem ou du, là kô hnungol le do, abay se hono le tau mgel kulu yóm kdê le.

⁸ Ngem, wen eles nmou béléem, Tau Tonok, bud hgelu se yóm kóm kulu mkél bélê le.

⁹ Eles hgelu kuluhem lómón kgelen botu. Yó gónóm mon béi abay hlikò bélê le. Ne béem abay knikò yóm gel ketngel le des, abay se kdê le hono tau là mimón do.”

¹⁰ Bud monen mò do, “Yó ne, Tau Tonok, hol eles hnungolem se kóm yóm udélu ebéléem ne hol gna suem bè nawahem yóm kdê tulónu kóm.

¹¹ Ominem yó mógów ebè yó kem dumuhem deng negef ne monem mò kul, ‘Ni se udél yóm sana Dwata hol dandónen geta.’ Tulónem kul yóm udélu kihu ke hnungol le duhen ke là.”

¹² Ominen mkay do eta yóm Tulus Dwata ne gungolu yóm tey lemungkul te kwangu wen udél mung du, monen, “Hol dóyón tekuy yóm tey keklóón Dwata ditu bè yóm gónóhen nô bè longit.”

¹³ Anì monem yóm gungolu yó koni lefluk yó kem mowil ne lungkul yó kem kliling le.

¹⁴ Nkayen o yóm Tulus Dwata, ominen mit do. Tey sidek kegnómu du yóm kwiten do yó lemwót bè yóm deng gungolu ne yóm tey khééten yóm hmoen do. Okóm yóm Dwata, tey mbegel kogoten do.

¹⁵ Huléken o ebè yó kem tau Juda deng negef nô bè Tél Abib bè kilil Él Kibar. Botong hitu kdawu myón lem blóng le bè yó, là kóe gudél lemwót bè yóm deng tonu ne bè yóm deng gungolu.

Kélék Dwata ke Isikél mò mentey bè yó kem tau Israél

¹⁶ Timbow deng hitu kdawu nô bè yó bud wen udél Dwata ebéléu, monen,

¹⁷ “Ó Tau Tonok, néléku uu mò mentey bè yó kem tau Israél. Ke wen tulónu kóm mò hetgamahu kul, hol géhél hgefetem bélê le.

¹⁸ Ke yó eles hetgamahu yóm sotu tau gel mò sidek, monu, ‘Lemwót bè yóm sidek gel nmoem, hukolu klowilem.’ Okóm ke là dog tulónem du yóm eles hetgamahu du yó, angat matay yóm tau yó igoen tolo wen salà nô tahen. Ne uu gónóhu angat mtuk du yóm katayen yó.

¹⁹ Okóm ke eles hetgamahem du yóm tau mò sidek ne là dog tenfloken du yóm kmoen sidek ne là dogen móyô hegsel, angat matay yóm tau yó igoen tolo wen salà nô tahen. Okóm là kô ntuku du béléem yóm katayen, abay se deng nmoem yóm hmou kóm.

²⁰ Sotuhen, ke deng baling mò sidek yóm tau tedeng kmoen ne ke là kô hnungolen du yóm eles hetgamahu du, angat hukolu klowilen. Ke là eles hetgamahem du yóm angat uléken yóm nmoen yó, angat matay yóm tau yó igoen tolo wen salà nô tahen, là bud hendemu du ne yó du kem hyu deng tehe nmoen. Ne angat tódô ntuku béléem yóm katayen yó.

²¹ Okóm ke eles wen hetgamahem du yóm tau yó ne ke hegsel ne tenfloken yóm kmoen sidek, là kô hukolu du klowilen, dalang se kóm abay se deng nmoem yóm hmou kóm.”

²² Omin Dwata bud mogot do, monen, “Mógówi etu bè datal, ditu bud gónóhu stulón kóm.”

²³ Tahu se, mógówe etu bè datal ne bè yó bud tonu yóm tey keklóón Dwata, hol lómón kmoen lómón yóm tehe ktonu du ditu bè kilil Él Kibar. Botonge gefen bè tonok yóm ktonu du.

²⁴ Ominen bud husek béléu yóm Tulus Dwata ne hdaen o. Yó monen mò do, “Muléki ne, htinofi ditu bè gónóem, hol tnikebem bak dólem.

²⁵ Yóm knóem bè yó, angat nfét le uu yó kem dumuhem anì là budi gewà lem blóng tau.

²⁶ Ne humewu uu anì là bud bnólówem kul ni kem tau là mimón do ni.

²⁷ Okóm ke bud wen htugodu kóm, bud hudélu uu anì tulónem kul yóm udélu ebélê le. Ominem yó bud mon du mò kul, ‘Ni se udélen ebélê ye yóm sana Dwata hol dandónen geta.’ Wen se bélê le angat hmungol kóm ne wen se bélê le angat kembê kóm, abay se kdê le hono tau là mimón do.” Là gomongen bè nili yóm tsaptér 4 kól bè tsaptér 16. Yó tulónen bè ni kem tsaptér ni: Hningón hmò Dwata ke Isikél yóm angat kundug le ebè Jirusalim yó kem sendalù Babilun ne yóm alì sidek kbitil yó kem tau lem Jirusalim. Eles htugod Dwata ke Isikél yóm angat ktafaken yóm kdê gónó le gel tmaba ebè yó kem dwata kéng yó kem tau Israél. Eles htugod Dwata ke Isikél yóm móyón kegesón yóm benwu Israél. Eles kehton Dwata du bè Isikél yóm ktaba le ebè dwata kéng lem yóm kun Gónô yó kem tau malak bè Israél. Eles hton Dwata ke Isikél yóm angat gotu khatay le yóm kdéen tau gel tmaba ebè dwata kéng bè Jirusalim, okóm hegna hnatay le yóm hitu folò kem tau malak bè kun Gónô Dwata. Bud tulónen yóm tódô kdó Dwata lem yóm kun dfél gónóhen gel nô bè Gónóen, mung du yóm tey keklóónen alì sminang ne nan na hlun nô ta yóm bak dól Gónóen. Kehton Dwata du ke Isikél yóm ktebelen yóm bak dól Gónóen, mung du yóm tey keklóónen alì sminang ne hlós eta yóm tikeb fi dmata kdaw bè lósól yóm Gónô Dwata. Kehton Dwata du ke Isikél yóm ktafaken yó kem tau malak bè Israél. Bud htonen du snéen yóm ktagaken yóm syudad Jirusalim, mung du yóm tey keklóónen alì sminang. Hningón hmò Dwata ke Isikél yóm angat kegef le kul etu bè Babilun yó kem tau Israél ne eles htulónen du yóm angat tey kélél le ken ne kélél le él bè yóm kdaw yó ne móyón glumfak le ne. Eles htugod Dwata ke Isikél yóm angat khatayen yó kem tau tmugod kéng, logi duhen libun. Eles htugod Dwata ke Isikél yóm angat khatayen yó kem tau malak bè Israél tendo gel tmaba ebè yó kem dwata kéng. Yóm kehlingón Dwata kul yó kem tau bè Jirusalim, hol lómón ke lefà deng mlób laen dù muhen. Yóm kehlingón Dwata kul yó kem tau lem Jirusalim, hol lómón ke libun mdà yehen, là gbek Dwata du ke là tnafaken kul.