Isikél 18 - Udél Dwata: Gna Kesfasad ne Lomi Kesfasad

Kkukum Dwata nmò yóm ket tau

¹ Ominen wen bud udélen ebéléu yóm sana Dwata hol gónó mogot, monen,

² “Wen yóm sotu udél hlalak hbak ye ebè Israél, yóm monen, ‘Kem tuha mken du yóm bungu grép msom, okóm kem ngà le fen nilów du.’ Moen ke tendo sensulit ye yóm udél yó?

³ Okóm ni se dou udél yóm sana Dwata hol dandónen geta, safau bélê ye hlanu bè yóm là katayu, là bud udél ye du ne bè benwu Israél ne yóm udél hlalak ni.

⁴ Abay se kdéen tau gotu knukumu. Knukumu se yó kem tuha, bud knukumu se yó kem ngà le. Yó kukumu kul yóm tau gemsalà, du se yóm angat matay.

⁵ Mò kmoen ke wen tau tedeng kmoen, gulit kloloen du yóm hlolou kul,

⁶ ne là tmabahen ebè dwata kéng yóm gel tnaba yó kem tau Israél ditu ta bulul ne se là kóen mken yóm deng gel dsù le ebélê le. Là kóen se smamuk ne là tagad gel kneyeken du yehenen bè yóm igoen tolo wen hen-gifaten.

⁷ Tau knoduhen kem dumun, là gel heglólóben du sandà yó kem tau élél. Là kóen na a mnagaw bè yó kem tau élél, mom gel benlayen yó kem bitil ne tódô gel benlayen nes yó kem tau élél.

⁸ Ke wen hutóngen, là kô nan e hngà du. Gel hlayuk bè yóm là tedengen ne tedeng kkukumen kem dumun.

⁹ Ne gulit kloloen du yó kem dou hlau kul ne yó kem dumu dou hlolò kul. Yóm tau mò du ni kem ni, yó se yóm tau tedeng kmoen ne angat mowil, mon yóm sana Dwata hol dandónen geta.

¹⁰ Okóm mò kmoen yóm tau ni ke wen ngaen logi. Ke yó nmò yóm ngaen logi yó gel mnagaw ne monok là dog nmoen du yóm hyu.

¹¹ Tódô gotu nmoen yó kem sidek tehe là nmò maen du. Mom tmaba ebè yó kem dwata kéng gu ta yó kem bulul, lelen gel smamuk,

¹² gel hen-gnoken yó kem tau élél ne là dog gel huléken yóm kimu sandà le béléen, gel tmaba ebè yó kem dwata kéng ne tendo gel slomong bélê le mò yóm gónó myak.

¹³ Ke wen hutóngen, mom gel hngaen. Ke lómón yó kmoen yóm tau, hyu kô hlowil du? Là. Tódô hukolu klowilen ne tódô du mbô du yóm kun katay.

¹⁴ Okóm mò kmoen se kun yóm logi yó ke bud wen ngaen logi. Gotu tonen yóm kdéen sidek gel nmò maen, okóm là kô loloen du.

¹⁵ Là tmabahen gu ta yó kem bulul ebè yó kem dwata kéng yó kem tau Israél ne là se kenen du yóm deng dsù ebélê le. Là se kóen smamuk

¹⁶ ne là se hen-gnoken kem dumuhen tau. Ne bud gel huléken yóm sandà béléen ne là se kóen mnagaw bélê le. Gel benlayen yó kem bitil ne benlayen nes yó kem tau laen dù kul,

¹⁷ tnóbóngen yó kem élél, là hngaen du ke wen hutóngen ne tey gulit kloloen du yóm kdê dou hlau ne yó kem dou hlolò kul. Là kô naw e hukol du klowilen yóm tau yó lemwót bè yó kem salà gel nmò maen, fen mowil se kun.

¹⁸ Okóm yóm maen, angat kendel matay se kun lemwót bè yó kem tey dê sidek gel nmoen. Wen tau gel hen-gnoken ne gel wen hennagawen bè yó kem dumuhen setwoli ne gel nmoen yóm là hyuhen lem blóng yó kem dumun.

¹⁹ Okóm yóm gel snólók ye yóm mon ye, ‘Moen de kun yóm ngà logi yóó ke là megtafaken lemwót bè yó kem salà tehe gel nmò maen?’ Là gi. Yóm ngaen logi yó, lemwót bè yóm fen kmoen du yóm tedeng ne yóm kgulit tendo kloloen du yó kem dou hlolò kul, yó se lowilen.

²⁰ Yóm tau gel mò sidek, yó se yóm tau géhél matay. Là kô na e nbô ngaen logi du yó kem salà nmò maen. Dalang se yóm maen, là kô nan e nbô du yó kem salà nmò ngaen logi. Yóm tau tedeng kmoen, bud hyu se ofolen lemwót bè kmoen yóm hyu. Yóm tau mò sidek, angat tnafak lemwót bè yóm kmoen sidek.

²¹ Okóm ke tenfloken yóm kmoen sidek yóm tau yó ne ke gulit kloloen du yó kem dou hlau ne ke nmoen yóm tedeng ne yóm hyu, là kóen kendel matay yóm tau yó, fen mowil se kun.

²² Tódô kdê yó kem salà deng nmoen, tódô gotu hnifótu béléen ne lemwót bè yóm tedeng tendo nmoen gónón fen mowil.”

²³ Ni se sólók yóm Dwata hol dandónen geta, monen, “Tedu kmò kehedem ye du, hligale du kô ke matay yóm tau gel mò sidek? Là, là kóe na a hligal du. Tey hyu nawahu ke hegsel ne ke knogolen yó kem sidek gel nmoen anì mowil.

²⁴ Okóm ke wen tau tedeng kmoen ne mom tenfloken mò du yóm hyu ne bud nmoen yóm kdéen kenyak gel nmò yó kem tau mò sidek, hyu kô hlowil du yóm tau yó? Là, là hyuhen. Là kô bud hendemu du ne yó du kem hyu deng tehe nmoen. Angat tódô matay lemwót bè yó kem salaen.

²⁵ Okóm mom yó udél ye, mon ye, ‘Là kóen tedeng yóm nmò Dwata yó.’ Ó kem tau Israél, hol hnungol ye ou. Là tedengen kô yóm dou nmò? Kaem yó dém kuy nmò yóm là tedengen.

²⁶ Ke bud mom mò sidek yóm tau tedeng kmoen, angat kendel matay. Kaem bè yóm sidek deng gel nmoen yó lewót gónón matay.

²⁷ Ne sotuhen, ke tenflok yóm tau yóm kmoen sidek ne ke nimónen yó kem dou hlau ne ke nmoen yóm tedeng ne yóm hyu, angat gewà lem hatay yóm tau yó.

²⁸ Lemwót bè yóm tendo kehedemen du yóm ksideken yóm gel nmoen ne tódô knogolen yóm kmoen sidek, angat mowil yóm tau yó, là kóen kendel matay.

²⁹ Baluen se ke ni yóm kmou du, là kô kó le du yó kem tau Israél yóm tendo kmon le du, ‘Là tedengen yóm nmò Dwata.’ Ó kem tau Israél, kaem yu dé yóm là tedeng nmoen, sundu ou du.”

³⁰ Bud ni se udél yóm Dwata hol dandónen geta, monen, “Duhen ni, kem tau Israél, angat knukumu yu ket kuy na sotu lemwót bè yó kem deng nmò ye. Knogol ye ne yó kem sidek gel nmò ye anì là gwiten kuy lem hatay.

³¹ Tenflok ye ne yóm là gel kimón ye do, hnomi ye kehedem ye ne knawa ye. Moen de ke móyô ye kendel matay, kem tau Israél?

³² Igò tey kekbéu du ke kendel ye matay. Knogol ye ne yóm kmò ye salà anì mowil ye,” udél yóm Dwata hol dandónen geta. Là gomongen bè nili yóm tsaptér 19 kól bè tsaptér 32. Yó tulónen bè ni kem tsaptér ni: Eles htugod Dwata ke Isikél yóm angat ktafaken yó kem tau hol geta bè Israél. Eles htugod Dwata ke Isikél yóm angat ktafaken yó kem tau Israél lemwót bè yóm là kimón le du. Eles htugod Dwata ke Isikél yóm angat khatay Dwata yó kem tau Israél, bede hmoen yóm tau hol geta bè Babilun. Eles htugod Dwata ke Isikél yóm ktafaken yó kem tau malak bè Israél dalang se yó kem tau nalak le, lemwót bè yóm tey kdê salà nmò le. Yóm kehlingón Dwata yóm syudad Samarya ne Jirusalim hol lómón ke libun setwoli, bede hono le hdóyón. Eles htulón Dwata ke Isikél yóm angat kmò ktafaken kul yó kem syudad yó. Eles hningón hmò Dwata ke Isikél yóm angat glumfak yó kem tau lem Jirusalim, yóm klaen dù bud lan le hewà. Hningón hmoen du bè yóm kuleng nô ta ofi hnok utón lemen. Eles htugod Dwata ke Isikél yóm angat ktafaken yó kem benwu hmilol Israél: Ktafaken yóm benwu Amon ne Muab ne Idom ne Flistya. Ktafaken yóm benwu Tayal ne Sidon. Ktafaken yóm benwu Idyip.