Isikél 17 - Udél Dwata: Gna Kesfasad ne Lomi Kesfasad

Hlingón bè yóm lewu banug

¹ Ni se udélen ebéléu yóm sana Dwata hol gónó mogot, monen,

² “Ó Tau Tonok, tulónem yó kem tau Israél nim hlingón nii.

³ Hgefetem bélê le nim udél lemwót bè yóm sana Dwata hol dandónen geta, yó monen, ‘Wen sotu tey banug bong sut bè Libanun. Ya tey ktahà hafak nbólen, bede tey segkay yó kem betek bulen. Yó nmoen, nogoten yóm hanga koyu sidar hol tnulunen,

⁴ ominen temfok yóm hol tubeden. Ne nwiten ebè yóm sotu benwu bong hono kem tau swa nô lemen ne bè yó gónón mulu du yóm tubed tenfoken yó.

⁵ Bè yóm benwu gónón ma yóm tubed sidar yó koni, wen sotu hulu lemfà nwahen ne huluhen bè yóm gónón mabù tonok tendo wen élen anì tilob kenoken, lómón yóm koyu mteg kilil él.

⁶ Tódô dmolil bè yó tey lemfà, bede là katen tahà. Yóm lefaen, lemfà etu bè yóm banug ne tey mgemel kdolilen. Ngangen efet mgemel yó kem hangahen ne tey mobung dounen.Okóm bud wen sotu banug bong sut bè yó, tey tahà ból hafaken ne tey mfól bulen. Lemwót yóm lemfà yó koni, mom bud lemfà ebè yóm lomi banug sut mni él béléen.

⁷ Okóm bud wen sotu banug bong sut bè yó, tey tahà ból hafaken ne tey mfól bulen. Lemwót yóm lemfà yó koni, mom bud lemfà ebè yóm lomi banug sut mni él béléen.

⁸ Mom yó nmoen igoen tey mabù yóm tonok gónón mteg, lelen tey wen él bè yó anì tilob ktowoken ne mobung dounen ne anì tilob kbunguhen.

⁹ Ne yó snólók yóm sana Dwata hol dandónen geta, monen, Hyu kô hlowil du yóm lemfà ni? Là hyuhen. Yó angat nmò yóm tanay banug, gotu kenduten mung du dolilen ne gotu tenfoken hangahen anì gotu mékéng yó kem dounen. Tey mahil kemdut du. Anien he ke laen dù tau kemgis kemdut du, duhen ke dê kem tau tmóbóng kemdut.

¹⁰ Baluen he ke wen bud mulu du, bud mowil kô? Là ne, tódô menes ke nayuf yóm lenos alì kinì lemwót fi dmata kdaw. Angat matay bè yó bè yóm tonok hyu tehe gónón minggel ktowoken.’ ”

Hnigad yóm lewu banug

¹¹ Yó bud udélen ebéléu yóm sana Dwata hol gónó mogot, monen,

¹² “Tulónem yó kem tau là mimón bè Israél, monem mò kul, ‘Là tngón ye du kô hnigad yóm lewu banug yó? Tulónu kuy ne, mon yóm sana Dwata hol dandónen geta. Yó hnigaden, lemwót yóm tau hol geta bè benwu Babilun mógów ebè Jirusalim nan e negef yóm tau hol geta bè yó, gomong yó kem dumu tau wen glalen, gotu nwiten lu ebè Babilun.

¹³ Ominen wen sotu tau sfu tau hol geta bè Israél néléken mò bud hyónen bè yó ne wen senfasad le yóm lewu le, gloken hsafà du yóm tau néléken yó anì hol mung béléen. Gotu bud negefen snéen yó kem genlal gónó le gel galak yó kem tau Israél,

¹⁴ anì laen dù bud kgis yó kem tau Israél ke tô le bud matù. Tek són bè yóm là kulé Israél du yóm deng senfasad le gónón tolo wen benwu le.

¹⁵ Okóm yóm tau hol geta bè Israél, mom natuen yóm tau hol geta bè Babilun. Yó nmoen, hógów tau ebè Idyip hefnihen tóbóng ditu, tey kem sendalù wen ne kem kudà hnihen ditu. Kmò kehedemem du, gbek Israél kô mulé du yóm deng senfasad le ne là wen tmafak du?

¹⁶ Hol mou kun ne, mon yóm sana Dwata hol dandónen geta. Safau hlanu bè yóm là katayu, yóm tau hol geta bè Israél mulé du angat matay bè Babilun, bè kun benwu yóm tau hol geta deng tehe mélék du mò mogot benwu, yóm tau hol geta deng tehe gónón fmasad du yóm kmungen béléen, okóm mom nuléhen.

¹⁷ Yóm tau hol geta bè Idyip tô snaligen yó ne yó kem tey sendaluen, laen dù lan le tmóbóng yóm benwu Israél ke bud gnida yóm tau hol geta bè Babilun. Angat tey wen hnatay yóm tau hol geta bè Babilun bè yó kem tau menwu bè yó bè Jirusalim.

¹⁸ Abay se yóm tau hol geta bè Israél, deng nuléhen yóm deng senfasad le igò le deng sesafà. Yó gónóm mon, là kóen na a tô gewà bè yó.

¹⁹ Duhen yó, yó udél yóm sana Dwata hol dandónen geta, monen, Safau hlanu bè yóm là katayu, angat tnafaku yóm tau hol geta bè Israél lanen mulé yóm deng senfasad me ne lanen deng mulé yóm ksafaen hlanen bè boluyu.

²⁰ Angat botu etahen yóm dou huket ne là kóen bud gewà lemen. Angat nwitu etu bè Babilun ne ditu gónóhu kmukum du yóm deng kuléhen yóm fasaden do.

²¹ Kdê yó kem tau alì hulung sfatay bè Israél, angat le gotu matay bè gida ne yó kem dù tau tebel bè yóm syudad bong yó, angat gotu senklahu lu bè klamang benwu. Bè yó he gónó ye temngón du ou yóm sana Dwata hol gónó mogot nim mudél ni.

²² Ne yó bud udél yóm sana Dwata hol dandónen geta, monen, Wen sotu ngà tubed angat nwahu bè tnulun yóm sotu koyu sidar alì tahà, ominu mulu du ta yóm bulul alì geta bè Israél.

²³ Angat baling koyu sidar alì tilob bè kdéen, tey klimbà kem hangahen lelen tey tilob kbunguhen mò bud hulu. Angat le gotu smala tahen yóm kdéen kay onuk koyu, hgolung le laan hangahen.

²⁴ Ne angat tngón yóm kdéen koyu ou se yóm sana Dwata hol gónó mogot mofok du yóm koyu tahà anì mowil yóm koyu ukol ne bud tahà se kun. Ou se hlenes du yóm koyu tolo matak ne bud hlowil yóm koyu deng matay. Ou se yóm sana Dwata hol gónó mogot yóm mudél ni. Angat nmou yóm deng monu.’ ”