Isaya 9 - Udél Dwata: Gna Kesfasad ne Lomi Kesfasad

Yóm tau hol dandónen geta bè klamangen

¹ Tehe yu ekni tey tehe sidek kehyak Dwata du yóm benwu kul gónó nô yó kem semfu gu bè le tehe Sibulun ne Naftali. Okóm hulin kdaw bud henbaling Dwata benwu alì megdóyón. Yó angat klamangen yóm benwu megdóyón monu yó, lemwót bè kilil yóm mohin fi desdef boluyen Miditiranyan efet kól bè yóm tonok fatu él Jurdan fi dmata kdaw. Balù yóm klamangen benwu Galili, gotu gomong lemen yóm benwu gónó le nô yó kem tau sundu tau Israél du.

² Yó kem tau tehe nô bè yóm gónón kmifu, wen tey layag deng ton le. Tehe le nô bè yóm benwu eles gnolung hatay, okóm ni deng wen layag mnóng ebélê le.

³ Tey kligal blayem kul, Dwata. Tey kehefligalem kul. Hligal le lemwót bè yóm deng nmoem bélê le. Lómón kehligal le lómón kehligal yó kem tau muta ne lómón kehligal yó kem tau semsólól yó kem kimu negef le bè gida.

⁴ Yakà deng tódô tenfokem du yóm yok tehe alì hmayam kul. Dalang se yóm bogul tehe gel bogul le bè abal le, deng tódô tenfokem. Abay se deng gotu genlaem yó kem hohon le tehe alì mongò hemsidek kul. Hol lómón keglaem kul lómón yóm tehe keglaem yó kem tey sendalù wen lemwót bè benwu Midyan.

⁵ Angat gotu mlób bè ofi tlumfà yó kem sendalù tô gemlà kul yó. Ne yó kem nes le tódô tfeng litô, gotu mlób snéen.

⁶ Yakà wen yóm ngà sut lem blóng tekuy, logi yóm ngà sut yó. Du se hol angat gónó tekuy kmulu. Ne yó angat taba tekuy du yóm alì hulung hmau, yóm Dwata laen dù là gbeken du, yóm Mà tekuy laen dù tul sónen, Ngà yóm Tau Hol Dandónen Geta mit kenek nawa.

⁷ Angat sónmoen tendo temnù yóm kfasangen mogot tau ne angat senflósen menek yóm benwu nogoten. Du se mò tles Dabid bè yóm tehe kogoten benwu. Yóm kmò kogoten tau angat hlanen bè yóm tey kukum tedeng nwiten. Ni se angat kmoen lemwót bè kbuten kól bè hol sónen. Hol nô bè nawa Dwata mò du yóm kdéen ni yóm Dwata laen dù là gbeken du. Là gomongen bè nili yóm bérs 8 kól bè 21. Yó tulónen bè ni, yóm htulón Dwata ke Isaya bè yó kem tau Israél menwu fi bwak ne ebè yó kem tau Israél menwu lem syudad Samarya yóm yê yó kem syudad bè benwu le. Yó mon Isaya bè bérs 13, “Kogol yóm kdê tafak ni, ewenem sana là kehegsel yó kem tau ne là kô le mulék ebè yóm Dwata laen dù là gbeken du.” Mom yó udél yó kem dù tebel, mon le, “Deng tey kegbà nim benwu tekuy, okóm bud hol hbegel tekuy hemdà du mkay senta yóm gnahen.” Yó balà Dwata du yóm alì keheklabak le yó, duhen yóm bud kehwiten du elem blóng le yó kem benwu hohon le mò gemlà kul. Monen bè bérs 14-16, “Tek olo sendawen gemlà du Dwata yó kem gel malak bè Israél ne yó kem tugod Dwata gel mò kéng. Yakà yó kem malak bè Israél yóm mit kul meglà yó kem tau.”