Isaya 7 - Udél Dwata: Gna Kesfasad ne Lomi Kesfasad

Yóm udél hwit Dwata ebè Ahas

¹ Wen sotu tau hol geta bè benwu Juda boluyen Ahas. Yóm Ahas ni ngà yóm tehe Jutam ne témê yóm tehe Usiya. Bè yóm kdaw kogoten benwu, wen lewu benwu slomong mit sgida bélê le. Yó boluy yóm sotu tau hol geta mit sgida bélê le, Risin yóm tau hol geta mogot benwu Sirya ne yóm sotuhen, Pika ngà Rimalya yóm tau hol geta mogot benwu Israél. Yó nmò le na le e nundug Jirusalim bede là kô le gemmò.

² Bè yóm tehe kgefeten bè Ahas yóm tau hol geta mogot yóm benwu Juda, yóm deng kkól le bè benwu Israél yó kem tey sendalù wen lemwót bè Sirya yó, ya tey sidek klikoen dalang se yó kem tauhen, tódô setbol kkel le.

³ Yó udél Dwata ebè Isaya yóm sotu tugoden, monen, “Nitem Sér Jasub yóm ngaem na ye e senlong Ahas. Angat ton ye bè yóm lan gónó le gel mò nes, bè hol són yóm kanal él lemwót bè yóm él senbusung le tofi ta.

⁴ Yó tulónem du, monem, Elesi hol temgama ne hol henekem nawahem. Hol béi abay hlikò ne hol béem hesbeweg kehedemem. Laen dù knikoem du yóm kul kebut le Risin ne yó kem tau Sirya mung du yó, dalang se ke Pika. Yóm kul kebut yó hol lómón ke dù kebel yóm lewu snuk ofi, là bud le dmilóf.

⁵ Deng wen atul nmò le yóm lewu kem tau hol geta yó.

⁶ Yó atul le, tô nundug le yóm benwu Juda nogotem. Gotu tô hnikò le yó kem tauhem anì mung le bélê le ne tô henbaling le tau hol geta bè Juda yóm ngà Tabil logi, yóm sotu tau bélê le mò tlesem.

⁷ Bede eles tulónu kóm, là kóen baling yóm tô atul le yó. Ou se Dwata yóm mudél ni.

⁸ Yó gónóhu mon du yóm yó, abay se laen dù bud kgis Risin. Senged se yóm syudad Damaskus gónóhen nô ne yóm benwu Sirya nogoten, laen dù bud kgis le. Senged se yóm benwu Israél, là gefeten bè nem folò limu halay gu kni deng le sana gotu meglà, là buden mdà ne yóm benwu yó.

⁹ Yóm benwu Israél yó, dalang se yóm syudad bong nô lemen boluyen Samarya, laen dù bud kgis le se kul. Senged se yóm Pika mogot du, laen dù bud kgisen se kun. Ne uu Ahas, ke là hlósen yóm kehtahuhem béléu, là se kóen hlós yóm kogotem benwu.”

Imanyuwél, boluy mò ilô yóm knô Dwata bélê tekuy

¹⁰ Bud wen sotu udél hwit Dwata ebè Ahas, yó monen,

¹¹ “Mnihi sotu ilô bè yóm Dwata hol gónóhem mogot. Yóm ilô hnihem kihu ke lemwót gu tlaan bè kul benwu yó kem tau deng matay, duhen ke lemwót gu tta bè longit.”

¹² Yó udél Ahas, monen, “Bée dou. Là kóe móyô tmilów ke Dwata.”

¹³ Bè yóm kungol Isaya du yóm mon Ahas yó, yó udélen, “Yu kem tau semfu gu bè yóm tehe Dabid, hol hnungol ye dé yóm balau du yóm mon Ahas yó. Ó Ahas, deng tey sidek kehtakasem kul yó kem tauhem, okóm milud he ksideken yóm nmoem yó abay se Dwata yóm htakasem.

¹⁴ Duhen yó, Dwata ne tódô mò béléem ilô. Yó ilô nmoen, wen sotu sawang libun angat mlutut ne angat mngà logi ne angat boluyen du Imanyuwél.

¹⁵ Bè yóm deng khulungen hedem yóm ngà yó, són yó lowil yó kem tau són gatas ne tneb.Okóm gu laanen là deng sut yóm kdaw yó, deng sana genlà yó kem dumu tau ne yóm kul benwu yóm lewu kem tau hol geta alì knikoem yó.

¹⁶ Okóm gu laanen là deng sut yóm kdaw yó, deng sana genlà yó kem dumu tau ne yóm kul benwu yóm lewu kem tau hol geta alì knikoem yó.

¹⁷ Senged se béléem, Ahas, angat wen tey gfaem se kóm, dalang se yó kem tau nogotem ne yó kem fes lówóhem. Yóm gfà monu ni, bong sidek senta yóm tehe gfà yó kem fù ye bè yóm kdaw tehe keskó le benwu Israél yóm benwu Juda nogotem. Yó angat nmò Dwata, hógówen yóm tau hol geta bè Asirya mò gmida kuy.

¹⁸ Bè yóm kdaw yó, yó nmò Dwata hemsit ebè yó kem tau Idyip mò ilô bélê le anì gotu le mundug ebè yóm kuy benwu. Bè yóm kundug le yó, hol lómón ke lenged kwen le lemwót bè klamangen benwu le. Ne bud hensit Dwata yó kem tau Asirya anì bud le mundug se kul. Yóm kwen le lemwót bè benwu le hol lómón kwen le yê nuhag.

¹⁹ Gotu le lememek lem yó kem sbong nelem ne bè yó kem kilib bè but yó kem léhék. Tódô tfeng le yó kem ngà koyu semnual dalang se yó kem bnes gónó ye gel hótób ógóf.

²⁰ Bè yóm kdaw yó, wen tau bnayad Dwata tau lemwót fi gu fatu yóm él Yufratis, duhen yóm tau hol geta bè Asirya. Yó nmoen, hol lómón yóm tau gmunting wek gotu nkihen bnget ye ne wek ye ne bul bè lówó ye anì gotu ye myak.

²¹ Bè yóm kdaw yó, ke wen dù mowil bè yó kem tau mò nmò bè tonok ne ke wen sotu safì ne lewu kambing tebel béléen

²² angat tey wen gatas nwahen bélê le, botong glukas béléen. Tahu se, yóm dù tau mowil bè benwu ye, són gatas ne tneb mò lowil le.

²³ Bè yóm kdaw yó, yó kem tonok hyu gónó le tehe gel mulu grép tehe ket lemibu but hulu le du ne ket tonoken sal bentes lemibu botù blówón bukay, angat gotu limes bè yó kem tey ngà koyu semnual ne kem sual lemfà.

²⁴ Lemwót yó kem tau dmulok le bè yó, nit le boho le. Tódô tfeng klamangen benwu ye yó kem tey sual lemfà ne kem ngà koyu semnual.

²⁵ Yó kem ngà bulul gónó ye tehe gel mò hulu angat gotu limes bè yó kem semnual yó. Laen kô dù bud tau mógów ebè yó ne. Deng mom baling gónó le mótób yó kem safì ne yó kem ubiha.”