Isaya 65 - Udél Dwata: Gna Kesfasad ne Lomi Kesfasad

Ktafak Dwata yó kem tau là mimón du

¹ Yó udél Dwata, monen, “Deng eles hendemu ne kbalau du ke mni le béléu yó kem dou tau, okóm là sem dog le mni béléu. Deng eles nangatu ne yóm kebel le do, okóm là sem dog nebel le do. Là kô le dog mni béléu yó kem tau bè dou benwu, igou sem deng eles mangat kul anì yó tô monu mò kul, ‘Ni ou. Angat tnóbóngu yu.’

² Nbuten bè kbuten, denge gel eles htifes hemmóyô yó kem dou tau, okóm tey mgel kulu le, són nmò le yóm là tedengen, són lolò le yóm kul knóyô.

³ Sónmò le hefebut dou yó kem tau yó, laen kô yak le. Wen gónó le gel demsù ebè yó kem dwata kéng lem blóng yó kem hulu hmilol kul gónô ne gel le mtem insinsu bélê le bè yó.

⁴ Ke kifu, gel le mógów ebè yó kem kilib gónó lembeng na le e htóbóng bè yó kem kul lóyóf yó kem tau deng matay. Ne gel utón le yóm sdô dsù le bè dwata kéng ne ninum le sóbówen, yóm là hkenu du kul.

⁵ Ne yó mon le mò yó kem dumu tau, ‘Hol bê ye hloni ebélê me abay se wen tulus me, là hyuhen ke getdol ye mi.’ Ya tey sidek kekbéu kul yó kem tau lómón yó. Yóm kebutu kul, hol lómón yóm ofi laen dù tul katayen.” Là gomongen bè nili yóm bérs 6 kól bè bérs 16. Yó tulónen bè ni yóm ktafak Dwata yó kem tau là mimón du. Tey ktabahen kul anì mni le tóbóng béléen okóm là, deng mom hebut le Dwata. Okóm yó kem tau Israél lemwót bè ból Juda ne kem sfu le, angat tey kuyag Dwata kul ne gfun le yóm tonok blayen kul.

Yóm lomi benwu angat nmò Dwata

¹⁷ Yó udél Dwata, monen, “Wen lomi tonok nmou ne kem lomi longit. Ke deng ye kól du, là bud gtulón nawa ye du ne yóm gna klowil ye.

¹⁸ Angat tey kehyu nawa ye ne kligal ye bè yóm nmou yó ne laen kô dù sónen yóm kligal ye yó. Yóm lomi Jirusalim nmou yó, angat tey benwu hligal ne tey kligal le yó kem tau nô lemen.

¹⁹ Angat tey kligalu se dou lemwót bè Jirusalim ne yó kem tauhen. Laen dù bud nkik ye bè yó ne laen se dù bud gónó ye gel htóbóng bè kem dumu ye.

²⁰ Laen dù bud matay bè yó kem ngà hanà hulô. Ne yó kem tuha, là kóen ukol ktau le. Ke deng lematu halayen yóm tau bè yóm benwu yó, hanà tolo lomi lemnok he. Ke kendel le matay gu laanen, yó se ilô yóm ktafaku kul.

^21-22 Ke hdà le gónô yó kem tau bè yó, hlós le nô lemen. Laen dù bud tólóng tau tles nô lemen. Wen tey grép hulu le ne hligal le minum du yóm élen. Laen dù bud tólóng tau minum du. Tey tahà klowil le lómón ktahà klowil yó kem koyu. Ne tey gsengel nawa le du yóm leniteg le.

²³ Tey bong gendeng le bè yó kem nmò le ne laen kô dù gfà sut bè yó kem ngà le. Laen kô dù sónen yóm któbóngu kul kkólen bè yó kem angat lugod le.

²⁴ Baluen ke tolo lel le mni ebéléu, deng eles gegna ne yóm kbalau kul.

²⁵ Yó kem ógóf lóbô lem bnes ne yó kem ngà ubiha, angat le tódô gotu segbót mken. Yó kem liyun, angat le baling mótób lómón safì. Ne yó kem ulal, laen dù bud knikoem bélê le ne. Bè yóm dou bulul Sayun yó, laen dù bud hemsidek tau bè yó ne laen kô dù bud sidek bè yó snéen.”