Isaya 64 - Udél Dwata: Gna Kesfasad ne Lomi Kesfasad

¹ Ó Dwata, moen de ke là tódô kenséem du yóm longit anì mnauli elaan? Ke yó se nmoem, gotu ton le u yó kem bulul ne tódô le megsinsig lemwót bè klikò le.

² Lómó ksinsig le lómón ke él kmodok ta yóm tey ofi. Géhéli ne, hegfanem kfasangem bè yó kem hohonem. Hetbolem kkel le bè soluhem yóm kdéen tau bè klamangen benwu.

³ Lómón yó se yóm tehe nmoem ekni, tódói sut lem blóng me ne tey tehe sidek knikò yóm hetnga nmoem. Gbót le likò se kul yó kem bulul, gotu le megsinsig.

⁴ Laen kô deng tau mton du yóm Dwata lómón uu, duhen ke deng wen gmungol du yóm Dwata gembek mò du yóm tennga nmò bè yó kem tau kemgel du nawa.

⁵ Tey któbóngem kul yó kem tau hligal mò du yóm tedeng ne là klifót le du yóm hloloem kul bè klowil le. Tehe tey kebutem kum, okóm tódô senflós me mò du yóm sidek. Igò yóm tey kebutem kum mom henlel me mò du yóm sigol lemwót bè kbuten.

⁶ Tódô kdê me gotu gemsalà. Igoen se tey hyu yóm gel nmò me ekni, moen se ni du ke mom tles nmò me yóm sidek? Lemwót bè yó kem salà me, hol lómón ke doun mékéng mung holis bè lenos yóm kmò me.

⁷ Laen dù tau tmaba ebéléem ne laen se dù tau htóbóng béléem. Dengi mom hebnos bélê me, deng tódô bayaem mi abay se lemwót bè salà me.

⁸ Okóm uu se, Dwata, kum mà. Lómón ke mi yóm tonok gel nmò le kuleng ne uu se yóm mifil kum. Uu se tehe dmimun kum.

⁹ Duhen yó, hol béem alì lenbut mi. Hol béem henlós smolò du yó kem salà me. Mi se kem tauhem, hol knoduhem mi.

¹⁰ Yó kem kóm syudad, hol lómón ke deng le baling benwu là hyu menwu du. Yóm Jirusalim, deng gotu gbà, laen dù bud tau nô lemen.

¹¹ Ne yóm Gónóem bè yó, yóm tey Gónô tilob gónó le tehe dmóyón kóm yó kem fù me, deng gotu ntem yó kem hohon me. Kdê yó kem nfun me alì kenbong nawa me, deng gotu gbà.

¹² Ó Dwata, là dog kenmónem kul kô yó kem deng nmò le bélê me ni? Laen dù lanem tmóbóng kum kô? Henlósem hmayam kum kô efet là bud gbek me hembala du?