Isaya 61 - Udél Dwata: Gna Kesfasad ne Lomi Kesfasad

Yóm tulón hyu bè kehewà Dwata yó kem tauhen

¹ Yóm Dwata hol dandónen geta gónóhu mogot, deng suen béléu yóm Tulusen. Deng néléken ou ne hógówen ou mò mit yóm tulón hyu bè yó kem tau élél ne mò hemyu nawa yó kem tau deng lebà nawa le ne mò fen heglalag du bè yó kem tau negef ne bè yó kem tau blanggù yóm kegewà le.

² Hógówen o anì heglalagu bè yó kem kun tau yóm deng kkólen yóm kdaw kehewaen kul ne kehegmoen kul bè yó kem hohon le. Hógówen o snéen mò hemyu nawa yó kem tau wen lenangag le.

³ Yó kem tau alì wen kenangag le bè benwu Sayun, tles benlayu lu kligal ne kehyu nawa. Yó kem tau wen kenblat nawa le, tles blayu kul yóm sngal mò dmóyón ke Dwata. Hol lómón angat kmò le, lómón yó kem koyu kun hulu Dwata. Tódô kdê le gotu mò du yóm tedeng. Ne tey megdóyón Dwata bè yóm deng nmoen bélê le.

⁴ Angat bud gotu hdà le yó kem syudad deng tehe gbà là sekna.

⁵ Yu kem dou tau, angat le mò nmò bélê ye yó kem tólóng tau lemwót bè dumu benwu. Fen sen-gyok le yó kem ógóf ye. Ne mò le hulu bélê ye bè yó kem tonok ye ne sen-gifà le yó kem bungu grép deng hulu ye.

⁶ Yó angat boluy le kuy, kem tau mò blóng ebè Dwata ne kem tau tóbóng lówó Dwata. Angat tey kehyu nawa ye du kuy yó kem kendengen lemwót bè dumu benwu, tey kegsengel nawa ye mfun du.

⁷ Là bud wen gónó ye myak ne, ne laen se dù tau bud hemyak kuy. Angat ye tódô henek bè yóm kuy benwu. Tódô sónmoen temnù yóm kendengen ye ne laen kô dù sónen yóm kligal ye.

⁸ Yó udél Dwata, monen, “Hol nóyóu yóm kukum tedeng ne alì kenbéu yóm tau gel hemgnok kem dumuhen ne yóm gel mulé udin. Angat dohò keblayu kul ofol yó kem dou tau. Ne wen senfasad me, yóm fasad laen kô dù sónen.

⁹ Angat le tey tótól bè yó kem dumu benwu. Ket tau mton kul, tódô tngón le lu se yó kem dou tau tnóbóng.”

¹⁰ Tey kligalen kun yóm Jirusalim lemwót bè yóm deng nmò Dwata béléen. Hol lómó kligalen lómón yóm libun myehen deng hen-get le. Yó henged nes hesek Dwata du yóm syudaden yó, yóm kegewaen bè yó kem hohonen ne yóm kegmoen bélê le.

¹¹ Sok deng huluhem yóm lem hulu, hol dohò tmowok se yó. Senged snéen yóm nmò Dwata, yóm Dwata hol dandónen geta gónó tekuy mogot. Angat dohò kehewaen kul yó kem tauhen ne gotu dóyón le Dwata yóm kdéen tau bè klamangen benwu. Là gomongen bè nili yóm tsaptér 62. Yó tulónen yóm kni Isaya bè Dwata gbak bè yóm syudad Jirusalim, yóm deng gotu kegbaen ne ktagak le du. Yó gel boluy le du yó kem dumu, Syudad Deng Tnagak Dwata, duhen ke Tonok Là Hyu Menwu Du. Okóm eles ton Isaya yóm mò kmoen bè hulin kdaw, ne tonen yóm kmò kehgulék Dwata yóm syudad Jirusalim ne yóm bud kehefdaen du. Mon Isaya bè bérs 7, “Hol ye gel mni bè Dwata efet henbalingen Jirusalim hol tótól bè klamangen benwu.” Bè yóm kdaw yó gotu bud sentifun Dwata yó kem kun tau, yó kem deng gotu sekla ebè klamangen benwu. Gotu nwiten lu mulék ne eles wen kem ofol mò blayen kul.