Isaya 60 - Udél Dwata: Gna Kesfasad ne Lomi Kesfasad

Yóm angat tey klinggel yóm Jirusalim

¹ Ó Jirusalim, btiki dé, holi hnóng lómón nóng kdaw. Yóm tey keslinang Dwata, yó se henged mnóng béléem.

² Yó kem dumu benwu hmilol kóm, tey kifu mget bélê le. Okóm kóm, mnóng etahem yóm tey layag Dwata. Lemwót bè yóm eles knóen béléem, yó gónón nô béléem yóm kun keslinang.

³ Lemwót bè yóm keslinangem yó, yó gónó le hloni ebéléem yó kem dumu benwu. Gotu le hloni se kul yó kem tau hol geta mogot kul bè yóm kdaw bud kehgulék Dwata klowilem.

⁴ Ó Jirusalim, temngeli gu hilol dé anì tonem yóm kul nmò yó kem tauhem. Gotu le stifun anì bud le mulék ebéléem. Yó kem ngaem logi, angat le mulék ebéléem lemwót gu bè yó kem tey benwu mayuk. Ne yó kem ngaem libun, lómón ke ngà lemnek kwit le kul bè yóm kulék le.

⁵ Bè yóm ktonem du yóm ni angat tey kligalem, botongi gehkak. Ne yó kem kendengen bè yó kem benwu gónó le gu lemwót, gotu nwit le ebéléem. Wen se kem kendengen lemwót gu fatu mohin, gotu nwit le lu ebéléem.

⁶ Angat tonem yó kem genged kamél lemulón stodol gu bè benwu Midyan ne Ifa. Wen se lemwót gu bè Siba, mit le tahu blówón ne insinsu. Angat wen hyu tulón nit le, duhen yóm deng nmò Dwata bélê le.

⁷ Gotu nwit le ebéléem yó kem ubiha lemwót bè benwu Kidar ne Nibaot mò dsù ye ebè Dwata mò gónó ye hefligal du. Angat tey keheklóón Dwata du yóm Gónóen mkay senta yó hem gna kmoen du.

⁸ Bo tedu yóm tey móyóng ebè Israél lómón ke lobun mung bè lenos ne lómón ke wadag yó kem tey obun móyóng mulék?

⁹ Duhen yó se yó kem kafal lemwót gu bè doli benwu mayuk. Eted le lu ebè kul benwu yó kem tau Dwata. Wen kem blówón bukay ne kem tahu blówón nwit le mulék mò gónó le hegfan du yóm kadat le ke Dwata yóm Dwata yó kem tau Israél yóm Dwata laen kô dù belenen. Lemwót bè Dwata se gónó le madat kul yó kem kun tau yó kem tau bè kdéen benwu.

¹⁰ Yó udél Dwata ebè Jirusalim, monen, “Angat wen kem tólóng tau fen bud hemgulék hemdà yóm beng hilolem. Ne yó kem kul tau hol geta, angat tnóbóng le u. Tey tehe kebutu kóm, yó se gónóhu tmafak kóm. Okóm ni ne, hegfanu béléem yóm tey kehyu nawahu ebéléem ne yóm tey kkoduhu kóm.

¹¹ Angat senflósen mngal yó kem bak tikebem kemdaw ne kifu, anì senflós le meted du ebéléem yóm kul kendengen yó kem tau hol geta bè dumu benwu.

¹² Okóm yó kem benwu là mimón kóm, angat gotu genbau.

¹³ Ó Jirusalim, yó kem koyu tilob lemwót bè yó kem dlag bè benwu Libanun, angat gotu nwit le ebéléem yó kem koyu meguu ne dyunipér ne siprus. Yó mu le kul yó kem koyu yó mò ngom bè yóm bud kehdà le kóm, anì bud mulék tilob yóm dou Gónô ne anì bud mulék minggel mton du yóm dou syudad.

¹⁴ Yó kem ngà logi yó kem tau tehe hemgnok kóm, angat le mógów ebéléem na le e heglaan béléem, yó se mò lan le hol hegfan du yóm kadat le kóm. Kdê yó kem tau tehe kemhisik kóm, angat tey keheglaan le béléem. Yó angat boluy le kóm, ‘Syudad Dwata.’ Sotu bud kboluy le kóm, ‘Sayun, syudad yóm kul Dwata yó kem tau Israél yóm Dwata laen dù belenen.’

¹⁵ Là bud knogolu kóm ne, Jirusalim ne là bud knutó nawahu kóm. Là bud sentagak le kóm ne yó kem tauhem ne là bud gnómem du ne yóm kifut nawa. Angat tey kehegetahu kóm ne tey keheklóónu kóm. Angati baling benwu hligal, yóm kligal laen dù tul sónen.

¹⁶ Yó kem dumu benwu ne yó kem tau hol geta mogot kul, angat hol sen-gyok le uu hol lómón yóm libun gel sen-gyoken ngaen. Bè yó se gónóm temngón du ou se yóm Dwata hol lemwà kóm, yóm Dwata yó kem tau Israél yóm Dwata laen dù là gbeken du.

¹⁷ Angate mit ebéléem tahu blówón mò tles yóm tembaga gel tenwélem. Ne mite ebéléem blówón bukay ne tembaga mò tles yóm bala tók ne yóm koyu gel wen muhem du. Ne wen bala tók nwitu ebéléem mò tles yóm botu gel wen muhem du. Là bud hen-gnok le kóm ne yó kem tau mogot kóm. Ne henbalingu lu tau tedeng kogot le kukum ne kem tau menek kogot le benwu.

¹⁸ Là bud gungolem du ne, Jirusalim, uni tau sgida. Laen dù bud gembà kóm ne. Lómón ke ou yóm beng hilolem, tendo bnenteyu u ne tendo nofinu u. Angat tey kdóyónem dou lemwót bè yóm kehewau kóm gu lem tdok yó kem hohonem.

¹⁹ Bè yóm kdaw kehewau kóm yó, laen dù bud muhem du ne yóm nóng kdaw duhen ke nóng bulón. Abay se ou yóm gónóhem mogot mò layagem laen dù tul sónen. Yóm alì keslinangu, yó se tódô seflós mnóng ebéléem.

²⁰ Là bud gnómem du ne yóm tey sidek klangagem. Ou se, yóm gónóhem mogot mò layagem laen dù tul sónen. Yóm kdaw ne yóm bulón, angat wen són le, okóm yóm dou layag laen dù tul sónen.

²¹ Tódô kdê yó kem tauhem, Jirusalim, angat gotu nmò le yóm tedeng. Laen kô dù tul sónen yóm angat kfun le yóm tonok deng blayu kul. Hol lómón ke huluhu lu yó kem tau deng nmou mò gónón gfan yóm kegetahu bè kdéen.

²² Balù yóm fes lówó là wenen ne alì gdanà bè kdéen, angat wen kfasang le lómón yóm benwu alì mfasang. Ke sok sut yóm bang kdawu mò du, tódô kendel nmou nim ni. Ou se yóm Dwata hol gónó mogot.”