Isaya 6 - Udél Dwata: Gna Kesfasad ne Lomi Kesfasad

Ktaba Dwata ke Isaya mò tugoden

¹ Bè yóm halay katay yóm tau hol geta bélê me boluyen Usiya, tódô tonu Dwata myón bè yóm gónón myón kmamal, tey kegetahen. Yóm nes tahà gedyol huli du klóón yóm alì kegetahen, botong gefet bè doli yóm Gónô gónóhen nô yóm ktahaen.

² Wen kem hógów Dwata mdà gu hilolen hol lómón ke dilóf ofi kmò le. Sket kul na nem hafak le. Yóm lewu hafak le lenimunen uyó le. Ne bud yóm lewu lenimunen ti le. Ne yóm lewu dù hafak le mit kul móyóng.

³ Yó nmò le gel le staba, mon le, “Hol tahu laen kô dù belenen yóm Dwata yóm Dwata laen dù là gbeken du yóm hol gónó mogot. Hol tahu laen kô dù belenen bà udì. Tódô lenngeben klamangen benwu yóm alì kegetahen.”

⁴ Lemwót bè yóm uni yóm udél le, botong kmingò yóm Gónô Dwata ne tódô tfeng kebel lemen.

⁵ Botong monu, “Adéy, laen dù bud nefet nawahu ne. Denge golu elem hatay ne dou abay se ket udél btang bè sumóngu hono sidek. Lelen yó he nóe lem blóng yó kem tau sónmoen sidek kudél le. Blaem ni, tódô dou mata mton du yóm hol dandónen geta yóm Dwata laen dù là gbeken du.”

⁶ Ominen lemwót yóm sotu bè yó kem mdà hilol Dwata, móyóng gu tta ebéléu wen bala ofi nwiten, snufiten gu bè yóm gónó le gel mtem yóm gel hboo le ebè Dwata.

⁷ Lemwót yóm bala ofi nwiten, duen bè sumóngu ne yó udélen ebéléu, monen, “Lemwót bè yóm kduu bè sumóngem ni deng mkó tahem ne yóm hen-gselem yó. Ne deng gotu hnifót Dwata ne yó kem salaem.”

⁸ Ominu mungol yóm udél Dwata, yó monen, “Tau du se bang dóku du? Tau du se bang hógów tekuy du?” Tódô bnalau se, monu, “Ou dé hógówem.”

⁹ Tahu se, hógówen o. Ne wen udél hwiten do ebè yó kem tau alì mgel kulu le. Yó udélen ebélê le, monen, “Balù nô kungol ye du là kô glileb ye du. Balù nô ketngel ye du là kô dilô ye du yóm tennefen.”

¹⁰ Omin Dwata bud mon du mò do, “Yó kem tau alì mgel kulu le yó, henbalingem lu tau là hulungen hedem. Hol hbokongem lu, hol hbutóem lu anì là getnef le du lanen yóm ton le ne yóm gungol le. Abay se ke getnef le, déke beklil le ebéléu na le e hkó béléu salà le.”

¹¹ Ominu smólók ke Dwata, monu mò du, “Étey, Dwata. Kmò kegenen de yóm kgel kulu le yó?” Yó balaen do, monen, “Yó kmò kegenen efet deng gotu gbà yó kem syudad le ne laen dù bud tau le ne laen dù bud gmónô tonem ne laen dù bud hulu tonem ta yó kem tonok le.

¹² Gotu hdóhu yó kem tau nô tahen ebè yó kem dumu benwu mayuk ne laen dù bud tonem tauhen ne yóm tonok le.

¹³ Baluen ke olon sotu dù tebel bè yóm sfolò kem tauhen, kaem senged snéen angat bud keglà le du yó kem hohon le. Hol lómón ke du yóm tuhod koyu tehe nofok le.” Bede yóm tuhoden yó sal wen uléken, hningónen yóm bud kehgulék Dwata kul yó kem kun tau.