Isaya 58 - Udél Dwata: Gna Kesfasad ne Lomi Kesfasad

Yóm tahu kfasting

¹ Yó udél Dwata, monen, “Hol hgelem udélem. Hol tulónem yó kem dou tau Israél yó kem salà le.

² Tey tendo gel ktaba le ebéléu ket kdaw. Yó mon le móyô le temngón du kun yóm dou lan ne mimón du yóm dou hlau. Kóyô le kun ke blayu kul yóm hlau tedeng. Ne tey hyu nawa le kun tmaba ebéléu. Okóm olo beyen mon le yóm udél le yó.”

³ Mom yó udél le yó kem tau yó, mon le, “Moen de ke fasting tekuy ke là se ton Dwata du? Moen de ke là mken tekuy ke là se kenmón Dwata du?” Yó balà Dwata kul, monen, “Bè hol ktahuhen, bè yóm udas ye fasting, kulel kmò ye du yóm gónó ye mebel filak ne wen sidek nmò ye bè yó kem tau mò nmò bélê ye.

⁴ Yó mò kuy bè yóm kfasting ye, deng ye sunget. Sónmò ye segled ne sfatay. Bè kuy kehedem du bè yóm kfasting lómón ni, bè ni kô gónóhu hmungol du yóm kni ye ebéléu? Là kô yó du.

⁵ Bè yóm kfasting ye, glok ye alì heglayam knô ye. Tey keheglaan ye yóm kkudung ye, omin ye hnal yóm kumù sakù ne tey kohù bulus ye tahen mò gónó ye hlilil. Yó kô yóm mon ye fasting? Kmò kehedem ye du, hyu nawahu du kô yó?

⁶ Ni dii yóm kmò kfasting nóyóu. Hewà ye yó kem tau tódô blanggù laen dù salà. Ne bê ye bud hen-gnok yó kem tau mò nmò bélê ye. Hol henyu ye kmò ye ebélê le ne blay ye kul yóm deng leniteg le.

⁷ Gel henken ye yó kem tau bitil ne hnódó ye bè gónô ye yó kem tau élél laen dù gónó le nô. Benlay ye nes yó kem tau laen dù bang nes lesek le. Hol bê ye kenbê tmóbóng yó kem kuy dumu.

⁸ Ke ni se nmò ye, hegfanu bélê ye yóm tey kehyu nawahu, lómón kegfan yóm mata kdaw hlafus. Tódô kendel mkó yó kem des ye. Elese tendo gel nô bélê ye mò lemwà kuy. Yóm tendo gel knóu bélê ye yó, yó se labungu kemlung kuy.

⁹ Ke mni ye ebéléu, gel bnalau yu. Ke tnaba ye ou, tnimulu yu. Hyu ke nmò ye sónen yóm kehegnok ye kem dumu ye ne yóm khisik ye kul ne yóm ksidek kbak ye ebélê le.

¹⁰ Hyu ke benlay ye ken yó kem bitil ne hegsengel ye nawa yó kem tau wen gónó le élél. Ke yó se nmò ye, angat baling layag yóm tey kkifuhen hmilol kuy, lómón layag kdaw gtungó.

¹¹ Ne tendo gel sen-galaku yu ne hegsengelu nawa ye bè yó kem hyu blayu kuy. Tendo gel hekgisu lówó ye ne hlayuku bélê ye yó kem des. Lómón ke yu yóm gónó mò hulu eles tendo héfê tonoken ne lómón ke yu yóm tbul él là ktihen.

¹² Angat yu bud hemdà kul yó kem deng tehe gbà gna, bud hdà ye ta yó kem tehe mò begelen. Yó angat boluy le kuy, kem tau bud hemgulék hemdà yó kem beng syudad deng tehe gbà ne bud hemgulék hemdà yó kem gónô tehe gbà.”

Ofol yóm tau mimón du yóm udin bè Kdaw Kehegnô

¹³ Yó bud udél Dwata, monen, “Hyu ke hol nadat ye yóm Kdaw Kehegnô ne ke là kulel kebel ye filak bè yóm kdaw yó. Hyu ke hol bong muhen bélê ye yóm dou kdaw yó ne ke là wen gónó ye e solu ne là wen gel nmò ye ne là mon ye du yó kem udél laen dù muhen.

¹⁴ Ke yó se nmò ye, angat ton ye yóm kligal lemwót bè yóm kimón ye dou. Lemwót béléu angat gónó le madat kuy yó kem tau bè klamangen benwu ne angat tey kehyu nawa ye du yóm tonok tehe blayu yóm fù ye Jakub. Ou se yóm Dwata hol gónó mogot mudél du nim ni.”