Isaya 57 - Udél Dwata: Gna Kesfasad ne Lomi Kesfasad

Yóm fasad Dwata bè któbóngen yó kem tauhen ne yóm kkóhen yó kem salà le

¹⁴ Yó udél Dwata, monen, “Hulék ye lu ebéléu yó kem dou tau. Kó ye bélê le yó kem gel hemseng kul bè lan le. Mò ye bélê le lan mò lolò le.

¹⁵ Ou se yóm Dwata hol geta yóm Dwata laen dù belenen yóm hlós mowil laen kô dù tul sónen. Nóe bè yóm hol gónón geta ne hol gónón mólós. Okóm bude nô bè yó kem tau heglaan le knô le ne gel hen-gsel le salà le anì bud huléku ebélê le yóm kgel nawa le do ne anì wen nefet nawa le elem hulin kdaw.

¹⁶ Deng tehe hlowilu yó kem dou tau ne là bud henlósu du ne yóm kduónu kul ne yóm kebutu kul.

¹⁷ Tahu se, tehe lenbutu lu lemwót bè salà le ne bè yóm tey kesbì le ne yó se gónóhu tmafak kul ne tódô mayà kul. Bede tey mgel kulu le, tódô henlel le lemolò du yóm kul kóyô.

¹⁸ Deng gotu tonu yó kem nmò le, okóm angat kóhu bélê le yó kem salà le. Nalaku lu ne tnóbóngu lu ne henyuhu nawa yó kem langag.

¹⁹ Wen kenek nawa blayu kul yóm kdê le, tau moni duhen tau mayuk. Tódô kóhu bè yó kem dou tau yó kem salà le.

²⁰ Okóm kul yó kem tau gel mò sidek, hol le mkél bè lewók mohin là kóen menek, tendo mit fól ne kluon ebè kilil.

²¹ Laen kô dù gónón menek bélê le kul yó kem tau gemsalà,” mon Dwata.