Isaya 55 - Udél Dwata: Gna Kesfasad ne Lomi Kesfasad

Ktaba Dwata yó kem tau knoduhen

¹ Yó udél Dwata, monen, “Ó kem tau meeng, géhél ye edini ne ni wen él mò ninum ye. Ó kem tau laen dù filak le, géhél ye edini ne ni wen mò ken ye. Géhél ye edini ne ni wen mò ninum ye. Là heblihu du kuy nim ni.

² Moen ke gotu namà ye filak ye bè yóm gónón là gsengel nawa ye? Moen ke gotu namà ye sukéy ye ne deng ye mom bud mulék bitil sentahen? Ni hol hnungol ye ou ne hol nimón ye yóm monu. Nénég ye ke là wen kligal ye mken du yóm ken hol hyu bè kdéen.

³ Ni hnungol ye ou kem dou tau, géhél ye edini béléu. Géhél ye ne anì wen klowil ye. Wen fasad nmou bélê ye, yóm fasad laen dù sónen. Yó fasadu kuy ni, blayu kuy yóm tóbóng tehe fasadu ke Dabid.

⁴ Deng tehe nmou Dabid mò tau malak kem dumuhen ne baling sotu tau hol geta mò malak yó kem tau bè dumu benwu. Mlan béléen gónóhu hegfan du bélê le yóm kfasangu.

⁵ Ne ni, bud yu angat tminok yó kem tólóng tau bè dumu benwu. Tehe là tngón le kuy, okóm ni ne tódô le kendel sut bélê ye anì gomong le bélê ye. Ou se yóm Dwata gónó ye mogot yu kem tau Israél yóm Dwata laen kô dù belenen. Angat gotu hdohou ni kem ni. Angat tey kadat le kuy yóm kdéen tau ne angat hegetahu yu.”

⁶ Tnana ye semfulék ebè Dwata dé ne hol ye mni béléen nim igoen tolo moni bélê ye.

⁷ Yó kem tau gel mò sidek, yake hol tnagak le ne yó kem sidek gel nmò le, yake hol tenles le ne kmò kehedem le. Yake hol le semfulék ebè Dwata yóm Dwata hol gónó mogot. Tey knoduhen kem tau ne mahil béléen hmifót salà.

⁸ Yó udélen, “Yóm dou kehedem, là mkélen bè yóm kuy kehedem. Ne yóm dou kmò, là mkélen bè yóm kuy kmò.

⁹ Lómón keslayuk tonok yóm longit seglafin bud lómón yó se keslayuken bélê ye yóm dou kehedem ne yóm dou kmò.”

¹⁰ “Yóm udélu,” mon Dwata, “hol lómón yóm kulón ne snu lemwót gu bè longit. Tódô henek te tonok, htowoken yó kem hulu anì wen mò bud gel hulu ne wen se mò ken.

¹¹ Hol lómón yó se yóm dou udél. Là gbeken du ke là wen uléken. Tódô gotu nmoen yó kem dou hmò du.

¹² Angat tey kligal ye bè yóm kehewà ye gu bè Babilun. Ne tey kenek nawa ye bè yóm kwit le kuy hewà. Balù yó kem bulul ne yó kem bulul lemnek, gotu le hligal semngal. Ne yó kem koyu, gotu le hligal mensag se kul.

¹³ Bè yóm tehe gónón tmowok yó kem koyu lemnek semnual laen dù muhen, angat tles tmowok bè yó yóm siprus ne mirtal, hono kem koyu wen muhen. Ni se mò ilô yóm kfasangu ne laen kô dù sónen yóm ilô yó. Bud ni se mò gónó ye hemtulón nawa du yóm deng nmou. Ou se yóm Dwata hol gónó mogot.” Là gomongen bè nili yóm tsaptér 56. Yó monen bè bérs 1-2, “Hol hentedeng ye kmò ye ne béen abay wen mtukul knihu ye,” mon Dwata. “Hol nmò ye yóm tedeng ne yóm hyu, yakà móyóne kól mò lemwà kuy. Tey kehyuhen bélê le kul yó kem tau nô bè nawa le yóm kmò le du nim ni. Tey kehyuhen bélê le kul yó kem tau gel madat du yó kem Kdaw Kehegnô ne yóm là kmò le nmò bè yó kem kdaw yó. Ne tey kehyuhen bélê le kul yó kem tau là gel le mò sidek.” Ni kem kehyuhen ni, là són bè kem tau Israél du gónón e gdek, okóm gomong snéen yó kem tau gel mimón yó kem kun hlau Dwata. Yó mon Dwata bè bérs 8, “Yóm Dwata hol dandónen geta, yóm mit semfulék yó kem tau deng kenbê kem dumu tau, gomong nwitu snéen yó kem dumu tau, là són yó kem dou tau du.”