Isaya 54 - Udél Dwata: Gna Kesfasad ne Lomi Kesfasad

Yóm kbong nawa Dwata kem tau Israél

¹ Ó Jirusalim, hol lómón ke tehe uu yóm libun atil laen dù ngaen. Okóm ni, holi semngal ne holi hligal hegwoy, abay se angat tey dê ngaem senta yóm libun là tnagak yehenen du.

² Hol bud tnugodem he yóm gónóem anì lamang ne hol hbegelem heheken.

³ Bud lebétem du yóm gu hilol kililen. Bud tódô nwa yó kem tauhem yóm kul tonok deng nô lem hólól yó kem tólóng tau. Yó kem syudad deng tehe tnagak le, tódô bud henok tau.

⁴ Hol béi abay bud hlikò, laen kô dù gónóm myak. Ne laen kô dù tau hemyak kóm. Tódô klifótem yóm tehe là kgulitem bè yóm hanà tolo klomihem tau. Ne bud klifótem snéen yóm alì sidek keblat nawahem bè yóm klibunem bolu.

⁵ Yóm Dwata tehe dmimun kóm, hol lómó kmoen ebéléem hol lómón ke du yóm tuha logihem. Yó kun boluy, duhen yóm Dwata laen dù là gbeken du. Angat lenwaen uu yóm Dwata yó kem tau Israél yóm laen dù belenen. Du se yóm hol kmamal yóm klamangen.

⁶ Yu kem tau Israél, hol ye mkél bè yóm libun lomi myehen, mom kendel tebel tuha logihen ne tey sidek kegnómen du. Okóm ni, bud tnaba Dwata yu anì mulék ye ebéléen, yó monen,

⁷ “Tek likóten yóm ktebelu kuy. Okóm lemwót bè yóm kbong nawahu kuy, yó gónóhu bud semfulék kuy.

⁸ Tehe knogolu yu lemwót bè yóm kebutu kuy, okóm olon likót. Okóm ni, htonu kuy yóm klaen dù sónen yóm kbong nawahu kuy.” Yó se udél yóm Dwata lemwà kuy.

⁹ “Bè yóm tehe kun kdaw Nuwa ekni, yó fasadu du là bud hdunuku du ne elem benwu. Ne ni kmoen ni, wen se fasadu kuy, duhen yóm là bud kebutu kuy. Là bud nudélu kuy ne là bud tnafaku kuy.

¹⁰ Anien ke gotu stunal yó kem bulul, okóm yóm kbong nawahu kuy, laen kô dù sónen. Ne laen dù sónen snéen yóm kenek nawa ye, yó se yóm fasadu kuy.” Ni se udél Dwata, yóm alì kembong nawa kuy.

Yóm angat mò kmò Jirusalim elem hulin kdaw

¹¹ Yó bud udél Dwata, monen, “Ó Jirusalim, balù yóm tey alì keglayamem nim kmoen ni, laen kô dù tmóbóng kóm ne laen kô dù tau hemyu nawam, angat bud hen-guléku hdà kóm. Mahe yó kem botu tilob mebtes sminang mò gónóhen mdà yó kem hehekem.

¹² Yó angat suu du yó kem gónô geta gónó le gel mentey, duhen yó kem botu sminang molung hulô boluyen rubi. Yó kem tikebem, angat suu du yó kem botu sminang hol lómón dilóf ofi. Yóm beng hilolem, hono yóm botu alì tilob mebtes suu du.

¹³ Tódô ou ne tmolok yó kem tauhem anì wen gendeng le ne anì menek kbenwu le.

¹⁴ Yó hol hembegel kuy, duhen yóm kukum tedeng nwit ye ne yóm hol kgulit nmò ye. Laen kô dù bud gembek hemgnok kuy ne hmikò kuy.

¹⁵ Ke wen tô muluk kuy, là kóen lemwót béléu. Ke wen tau tô semfatay kuy, laen kô dù gmò le bélê ye.

¹⁶ Yóm tau msól, ou se mò du. Nan lenubón lem ofi yóm nsólen, ominen mò du ngom sfatay. Bud ou se mò du yóm sendalù mit du yóm ngom sfatay yó mò hatayen tau.

¹⁷ Okóm laen kô dù ngom sfatay gembek hemsidek kuy. Sal gel wen balaem kul yó kem tau dmuón kuy hkawang. Sal gel nfihu yó kem dou tau tóbóng lówó ne sal gel hegmou lu bè hohon le.” Ni se udél yóm Dwata hol gónó mogot.