Isaya 52 - Udél Dwata: Gna Kesfasad ne Lomi Kesfasad

Angat kehewà Dwata yóm syudad Jirusalim

¹ Ó Jirusalim, hekgisi. Angati bud mulék geta. Uu se yóm hol kun syudad Dwata, bud hen-gulékem knóem anì bud mulék yóm keheklóónem. Là kô le bud husek ebè bak tikebem yó kem tau là hemtahu le bè Dwata.

² Mdai dé, Jirusalim, kenfungem knóem, béi bud myón lem kfung. Myóni bè yó dém gónóm myón kmamal. Lenkas ye yóm tehe kedina le kuy, yu se kem tau Sayun tehe negef le.

³ Yó udélen ebè yó kem tauhen yóm Dwata hol dandónen geta gónó mogot, monen, “Bè nim kbaling ye hesek ni, laen kô dù filak bli le kuy. Senged snéen bè yóm angat kegewà ye, là kô tógón nsok kuy filak.

⁴ Bè yóm tehe kilo ye ebè Idyip, tódô lemwót bè kuy kóyô yóm knô ye bè yó. Bong bè yóm tehe kegef le kuy bè benwu Asirya, tódô lemwót bè kul kgis yóm kegef le kuy yó, laen se dù filak bli le kuy.

⁵ Senged snéen bè yóm kegef le kuy ebè Babilun, laen se dù filak bli le kuy. Tey keheklabak le yó kem tau hmesek kuy ne tendo henwog le ou.

⁶ Okóm angat wen kdawen, ketngón ye du ou se Dwata yóm deng mudél ebélê ye ni.”

⁷ Tey minggel mton du yóm tau hógów le hulé bulul niten yóm tulón hyu. Yó lemen, duhen yóm tulón mit kenek nawa. Gotu heglalagen yóm deng kegmò le bè kem hohon le. Ne yó udélen ebè yó kem tau bè benwu Sayun, monen, “Yóm kuy Dwata, du se hol dandónen geta mogot klamangen.”

⁸ Gotu le mensag yó kem tau mentey yóm syudad le, mensag le lemwót bè kligal le. Tódô ton le yóm kesfulék Dwata ebè Sayun.

⁹ Ó Jirusalim, holi hligal mensag, balù yóm deng kegbaem. Angat lenwà Dwata yóm kun syudad ne henyuhen nawa yó kem tauhen.

¹⁰ Angat hlan Dwata bè kfasangen yóm kehewaen yó kem tauhen. Angat kdéen benwu bè klamangen, gotu mton du.

¹¹ Hol tebel ye ne yóm benwu Babilun, yu kem tau mulék ebè Jirusalim mit yó kem ngom bè Gónô Dwata. Béen wen dumu nogot ye yó kem kenbê Dwata. Hol ye hólós, omin ye yó lemwót.

¹² Okóm yóm kewót ye yó, là kô ye meslò abay se laen dù henlóy ye. Eles tukô gna kuy yóm Dwata gónó ye mogot ne du se tendo mofin kuy.

Alì keglayam yóm tau tóbóng lówó Dwata

¹³ Yó udél Dwata, monen, “Yóm tau tóbóng lówóhu, angat gdengen yóm hmou du ne tey kehegetahu du.

¹⁴ Tódô le neb yó kem tau bè yóm tehe kton le du, là hol dilô le du lówóhen ke lówó tau.

¹⁵ Okóm ni, tey kehtaw le du yó kem tau bè dumu benwu. Tódô le teneng yó kem tau hol geta bélê le, sidek ketnga le. Tódô ton le ne tngón le yóm tehe là deng hnikót tngón le du.”