Isaya 49 - Udél Dwata: Gna Kesfasad ne Lomi Kesfasad

Yóm tau tóbóng lówó Dwata

¹ Yu kem tau nô bè benwu mayuk, ni hol hnungol ye ou. Deng eles nélék Dwata ou gu laanu là deng sut. Yó hmoen dou mò tóbóng lówóhen.

² Tey kehegseben udélu, lómón kegseb yóm sudeng telem. Kun sigel tendo kemlung dou. Lómó kmoen dou lómón ke ou yóm hanak telem deng hentifesen mò gtien.

³ Yó monen mò dou, “Yu kem tau Israél kem tau tóbóng lówóhu, lemwót bélê ye gónó le angat dmóyón do yó kem dumu tau.”

⁴ Okóm dou, botong monu, “Tey kmou du yóm hmò Dwata do, okóm laen dù gónón e kól. Tódô hotuhu gelu, okóm laen dù gendengu.” Bede tey ksaligu yóm kfi Dwata yóm deng hmoen do. Angat wen ofol blayen dou bè yó kem gel nmou.

⁵ Balù yóm gu laanu là deng sut, deng eles nélék Dwata ou. Nmoen ou tóbóng lówóhen mò malak kul mulék yó kem tauhen Israél deng gotu sekla. Bè Dwata se gónón lemwót yóm kadat le do yó kem tau. Béléen se gónón lemwót yóm kwen kgisu.

⁶ Bud mon Dwata mò dou, “Uu yóm mò tóbóng lówóhu, ni wen tey bong sigangu tahem mkay senta yóm gnan. Là són du yóm bud kulék kegeta yó kem dù tau Israél yóm hmou kóm, okóm nmou uu layag bè yóm kdéen tau bè klamangen benwu anì wen lan le gewà.”

Yóm sotu tóbóng lówó Dwata, duhen yó kem tau Israél

⁷ Wen udél Dwata ebè yó kem tauhen Israél yóm Dwata laen dù belenen yóm lemwà kul. Abay se ni kem tauhen ni, hono tau kenhisik kem dumu tau ne gel knutó nawa le lu yó kem dumu benwu, deng le baling hesek bè yó kem tau mogot benwu. Yó udél Dwata ebélê le, monen, “Angat ton yó kem tau hol geta yóm kegewà ye. Bè yóm kton le kuy tódô le hteneng mdà, botong lan le hol madat kuy. Gotu ton le yu se kul yó kem ngà tau hol geta. Tey keheglaan le bélê ye, botong lan le madat kuy.” Hol tahu dohò nim ni, abay se deng nélék Dwata yóm mò tóbóng lówóhen. Yóm fmasad du kuy nim ni, duhen yóm Dwata yó kem tau Israél, yóm laen kô dù belenen. Là kóen bud mulék elem baken yóm deng fasaden yó.

Yóm bud kdà yóm syudad Jirusalim

⁸ Yó bud udél Dwata ebè yó kem kun tau, monen, “Ke deng kól yóm kdawu lemwà kuy, hegfanu bélê ye yóm tey nawahu kuy ne bnalau yóm alì kehkodu ye mni tóbóng béléu. Gel bnenteyu yu he ne nofinu yu. Hlanu bélê ye yóm fasadu yó kem tau bè klamangen benwu. Tódô ye bud mulék he ebè yóm benwu ye tehe gotu lebà.

⁹ Yó udélu ebè yó kem tau geblanggù, monu mò kul, ‘Hewà ye ne.’ Ne yó kem tau nô bè gónón kmifu, yó bud monu mò kul, ‘Hewà ye ebè layag ne.’ Kehlingónu kul bè yóm deng kegewà le, lómón ke ubiha mótób bè talak bilil.

¹⁰ Laen dù bud angat gónó le bitil ne laen kô dù bud gónó le meeng. Balù yóm alì sidek kkinien bè yóm benwu là hyu menwu du, là kô gehsideken kul abay se eles nalaken lu yóm kembong nawa kul. Angat gel nalaken lu ebè yó kem tbul él.

¹¹ Angat wen tey lan lamang nmou hulé bulul eles hentifesu yóm mò lan yó kem dou tau.

¹² Tey mayuk gónó le gu lemwót. Lemwót le gu fi debwak ne fi desdef ne lemwót le gu bè benwu Aswan yó kem dumu, benwu hol fi leged.

¹³ Ó kem longit seglafin, hol ye semngal dé. Ó Tonok, holi hligal mensag dé. Dalang se yó kem bulul, hol ye semngal. Angat henyu Dwata nawa yó kem kun tau. Ne yó kem tau alì glayam, tey kkoduhen kul.”

¹⁴ Okóm mom yó udél yó kem tau bè Jirusalim, mon le, “Deng tódô bayà Dwata tekuy. Deng tódô klifóten tekuy ne.”

¹⁵ Yó balà Dwata kul, monen, “Gbek yóm libun kô kmifót yóm ngaen hanà hulô ne là dog kenbong nawahen du yóm kun ngà hesut? Anien he ke gbek yóm yéen kmifót yóm ngaen, okóm yó dum dou là kô naw e gbek klifót kuy.

¹⁶ Ó Jirusalim, là kô naw e gbek klifót kóm. Deng eles snulatu lem hólólu ne yóm kóm boluy.

¹⁷ Móyónen sut ne yó kem tau mò bud hemdà kóm. Bong yó kem tau tehe gembà kóm, gotu le bud mdó.

¹⁸ Ngem, nénégem dé yóm gu hmilolem, deng nbut le gotu stifun yó kem tauhem, gotu le bud mulék ebéléem. Ou se yóm Dwata là matayen, hol tahu yóm tulónu kóm ni. Tey kehyu nawahem bè yó kem tauhem bud mulék ebéléem, hol lómón yóm kehyu nawa yóm libun myehen bè yóm kimuhen mebtes.

¹⁹ Balù yóm deng kegbaem, Jirusalim ne laen dù tauhem, okóm angat tódô seklot yó kem tau bud mulék ebéléem. Bong yó kem tau gembà kóm, angat gotu hdóhu lu mayuk.

²⁰ Yó kem ngà sut bè yóm benwu gónó le e megef kul, angat wen kdaw le mon du mò kóm, ‘Tey udì yóm benwu ni. Yake wen bud dumu gónó kuy nô dé.’

²¹ Ne angat monem se kóm, ‘Gónó le gu lemwót du ni kem tey dê ngau ni? Igò le se deng lana béléu yó kem ngau ne là kóe bud mngà. Igò le deng megef do ne nit le o mayuk. Tau du de fen henok kul ni kem tey ngà ni? Tek sotuhu yóm tagak. Gónó le gu lemwót du ni kem tey dê ngà nii?’ ”

²² Yó udélen ebè yó kem tauhen yóm Dwata hol dandónen geta gónó le mogot, monen, “Olohu kmobil yó kem dumu benwu anì tódô nwit le lu mulék elem blóng ye yó kem ngà ye.

²³ Yó kmò yó kem tau hol geta mogot bè yó kem benwu yó, lómón ke hol ngà le yu. Ne yó kem libun boi yehen le, lómó kmò le ebélê ye lómón ke hol kuy yê. Tey keheglaan le ebélê ye ne tey kadat le kuy. Angat wen lan le hegfan du ebélê ye yóm kadat le kuy. Bè yóm kmò le ebélê ye yó, bè yó gónó ye temngón du ou se yóm Dwata gónó ye mogot. Laen dù tau sidek nawan ke nangaten yóm któbóngu du.

²⁴ Bélê ye kuy, gbek ye kô malaw du lem hólól yó kem sendalù yó kem kimu negef le? Gbek ye kô lemwà kul yó kem tau knukub lem hólól yóm tau hol geta alì lóbô? Neet he ke tô gbek ye.”

²⁵ Yó bud udél Dwata, monen, “Okóm yó se angat dou nmò. Angat lenwau lem hólól yó kem sendalù yó kem knukub le. Gotu nwahu yó kem kimu deng negef yóm tau hol geta alì lóbô. Gotu senfatayu yó kem tau semfatay kuy ne lenwau yó kem ngà ye.

²⁶ Yó angat nmou bè yó kem tau hemgnok kuy, tódô senfatayu lu honon lu. Tódô le sbonok honon lu. Lemwót bè yóm alì sidek kebut le là kô tngón le du yóm nmò le, lómón yó kem tau lengel là kô tngón le du yóm nmò le. Bè yóm kehewau yóm kdéen tau bè klamangen benwu gónó le temngón du ou yóm hol Dwata gónó mogot, yóm msok kuy ne yóm lemwà kuy. Angat tngón le ou se yóm Dwata yó kem tau Israél, yóm laen kô dù là gbeken du.”