Isaya 46 - Udél Dwata: Gna Kesfasad ne Lomi Kesfasad

¹ “Ni se hol són yó kem dwata kéng bè Babilun. Yó boluy le Bél ne Nibu tehe gónó le gel e tmaba. Okóm ni, gotu bud lulón le lu bè yó kem kudà le. Olo le alì hliteg yó kem kudà igò le tey blat.

² Yóm dwata lennged le yó, là kô gbek le lemwà knô le. Deng mom negef le lu ne nit le lu mayuk. Yó se mò hol són yó kem dwata bè Babilun.

³ Hol hnungol ye ou dé yu kem sfu tehe Jakub, yu kem dù tebel bè yó kem dou tau. Tey kesegyoku kuy tódô lemwót bè ksut ye.

⁴ Ou se yóm kuy Dwata ne angat tendo bud gel sen-gyoku yu efet kól bè ktuha ye ne deng kubón ye. Ou se tehe mò kuy ne tendo gel sen-gyoku yu. Tendo gel tnóbóngu yu ne angat lenwau yu.”

⁵ Yó bud mon Dwata, “Wen kô gónó ye heskél dou? Wen kô gemsenged do?

⁶ Wen se yó kem tau tódô hmò le yóm kul dwata. Kok le yóm sning gónó le hemsù filak tahu blówón le ne filak mgel le, omin le tmimbang yóm keblaten. Glok le mayad yóm tau hulung temwél mò temwél yóm dwata blówón. Timbow deng, omin le mtud bukol bè soluhen ne tmaba le ebéléen.

⁷ Omin le mkay du ne tnihang le mulék. Wen gónó le hemsù du mò gónón mdà. Là kô gbeken kemdol bè yóm gónón nô yóm dwata le yó. Ke wen tau mni ebéléen, là kô gbeken malà du ne là se gbeken lemwà du ke wen gfaen.

⁸ Hentulón ye nawa yóm ni yu kem tau gemsalà. Tennef ye dé yó kem deng tehe nmou.

⁹ Hentulón ye nawa yó kem deng tehe nmou ekni. Hol hentahu ye tek són ou yóm Dwata, laen dù mkél dou.

¹⁰ Deng eles tulónu kuy lemwót bè kbuten yóm angat sut hulin kdaw. Tehe yu ne ekni eles ktulónu du yóm sut yó. Deng tehe tulónu kuy sok dou atul, hol dohò se yó. Tódô nmou yóm kdê deng eles natulu.

¹¹ Wen tau tnabahu lemwót fi dmata kdaw. Lómó kmoen lómón ke kemfô kofi. Angat tódô nmoen yó kem deng eles natulu. Yó se deng btang lem baku yó se angat dohò.

¹² Hol hnungol ye ou yu kem tau mgel kulu. Ofo kuy ke tolo mima he yóm kegmò ye bè yó kem hohon ye.

¹³ Igoen deng moni yóm kehegmou kuy, móyónen htó ne laen kô bud gónón ganggà. Angat lenwau Jirusalim ne hegetahu yó kem tau Israél bè yó.” Là gomongen bè nili yóm tsaptér 47. Yó tulónen bè ni yóm eles ktulón Isaya du yóm angat kegbà Babilun, yóm benwu alì tótól bè ksidek gel nmò le. Tulón Dwata bè yó kem tauhen yóm kéléken yóm benwu Babilun mò tmafak kul, okóm alì gedlug yóm kmò kem tau Babilun kul. Balù udì ke wen kodu le yó kem tau Israél. Okóm yó mon Dwata ebè yó kem tauhen, “Yóm alì gfà ye, bud huléku eta yó kem tau Babilun ne là kô le gewà du. Balù sotu bè yó kem gel snalig le ke tô gembek lemwà kul, balù yó kem wè le, ne yó kem tau wen gónó le ma, ne yó kem tau gónó le hmungol hlau duhen ke yó kem tau hulung temngel kógów blotik, là kô na le e gbek du lemwà kul.”