Isaya 43 - Udél Dwata: Gna Kesfasad ne Lomi Kesfasad

Fasad Dwata bè kem tauhen yóm kehewaen kul

¹ Yu kem tau Israél, ni udél yóm Dwata tehe mò kuy, monen, “Hol bê ye abay hlikò, angat lenwau yu. Deng tnabahu boluy ye, yu se yóm dou tau nfun.

² Ke nifal ye yóm él nelem, elese gel mung kuy. Là kô ye limes bè yó kem mgel sut bélê ye. Ke mlan ye gu lem ofi, là kô ye na a mlób. Yó kem tilów mgel gel sut bélê ye, là kô nan e gehsidek kuy.

³ Yakà ou du yóm kuy Dwata, yóm hol gónó mogot, yóm Dwata yó kem tau Israél, yóm Dwata laen kô dù belenen, yóm gel lemwà kuy. Yó mò soku kuy, yóm benwu Idyip, tnuu du yó kem benwu Sudan ne Siba.

⁴ Gloku tódô bemlay yó kem dumu benwu mò soku kuy, abay se tey ye bong mebtes béléu ne alì bong nawahu kuy ne tey kadatu kuy.

⁵ Hol bê ye abay hlikò, tendohe nô bélê ye. Angat bud huléku yó kem kuy dumu deng sekla ebè yóm hol kuy benwu. Bè yóm angat kulék le yó, wen se bélê le lemwót bè doli benwu ditu fi dmata kdaw ne doli benwu ditu fi desdef.

⁶ Angat dóku yó kem benwu fi debwak anì hulék le lu. Senged se yó kem benwu tofi leged anì là nali le kul. Angat dóku yó kem tau bè benwu mayuk anì hulék le lu yó kem dou tau lemwót le gu bè kdéen benwu talak tonok.

⁷ Lu se yó kem hol dou tau. Deng nmou lu mò gónóhu hol megdóyón.”

⁸ Mon Dwata, “Htaba ye ebè gónô skukum yó kem dou tau. Igoen se wen mata le, là kô le mton. Igoen se wen klingu le, là kô le mungol.

⁹ Htaba ye ebè gónô skukum yóm kdéen tau bè kem dumu benwu. Wen kô bè yó kem kul dwata gbek tmulón du yóm angat sut elem haya? Wen kô bélê le deng tehe eles tmulón du ni kem deng nmou ni? Yó kem dwata le, eles nwit le bè gónô skukum yóm mò tmanud kul mò tmulón du ke tedeng yóm gel nmò le ne ke tahu yóm gel mon le.

¹⁰ Okóm kuy, kem tau Israél, yu se mò tmanud dou. Deng néléku yu mò dou tóbóng lówó. Yó gónóhu mò du yóm yó anì tngón ye o ne hentahu ye o ne gtukul ye tek sónen ou yóm Dwata. Lemwót bè hol kbuten són ou se yóm Dwata laen kô dù tul sónen,

¹¹ Tek sotuhu Dwata, tek sotuhu gembek lemwà kuy.

¹² Deng eles tulónu gna yóm angat sut bélê ye. Bè yóm ksuten bélê ye, bud ou snéen tmóbóng kuy. Laen dù dumu dwata gembek mò du yóm ni. Yu se gemtanud du yóm deng nmou ni.

¹³ Ou se yóm Dwata, laen dù sónen yóm keDwatahu. Laen dù tau gembek gewà lem kfasangu. Ne laen se dù gembek temles du yóm dou nmò.”

Kegewà kem tau Israél gu bè benwu Babilun

¹⁴ Yó bud mon yóm Dwata gónó ye mogot yó kem tau Israél, yóm Dwata laen dù belenen yóm lemwà kuy, “Yó kmò kehewau kuy gu bè Babilun, wen kem tey sendalù hógówu etu naw e hegbà yó kem tikeb bengen yóm syudad yó. Yóm tehe kehsag yó kem tau Babilun, mom baling langat le.

¹⁵ Ou se gónó ye mogot yó kem tau Israél yóm Dwata laen dù belenen. Deng nmou yu ne ou se yóm hol dandónen geta bélê ye.”

¹⁶ Yóm tehe yu ekni, nmò Dwata yóm lan lem mohin igò yóm él tódô temgulung.

¹⁷ Hlanen elemen yó kem tey sendalù wen lemwót bè Idyip ne yó kem kudà le demyol klitun tók ne bè yó gónón gemlà kul. Gotu le lemneb lem mohin, balù sotu ke wen mowil bélê le. Lómó kmoen kul lómón ke hmatay nóng solok.

¹⁸ Okóm bud mon Dwata, “Béen són yó hendem ye yóm deng tehe nmou yó ekni, béen són yó tendo nô bè nawa ye.

¹⁹ Ni wen lomi lan nmou, hol nangat ye. Deng nbutu se mò du, là ton ye du kô? Wen lan angat nmou bè yóm benwu là hyu menwu du ne wen kem él hlelu gu lemen.

²⁰ Balù yó kem ógóf mayal nô bè yó, angat gbót nadat le ou. Dóyón le ou lemwót bè yóm él hlelu bè yó, yóm él mò gónó le minum yó kem dou tau deng nélék.

²¹ Lu se yó kem tau deng nmou mò hol dou tau. Angat tey kdóyón le dou mlan bè kesngal le.”

Kegsalà yó kem tau Israél

²² Bud mon Dwata, “Okóm kuy kem tau Israél, deng ye tmakas béléu, là bud ye tmaba ebéléu.

²³ Là dog ye mit ebéléu yó kem ubiha hkekeb ye mò blay ye do. Là dog nadat ye do ke hlan ye bè yó kem dumu gel dsù ye. Là kô henblatu du nawa ye ke hol benlay ye o mò basa ye do. Laen kô gónó ye tmakas béléu ke lemwót bè tendo knihu bélê ye insinsu mò ntem ye ebéléu.

²⁴ Okóm kuy, laen kô insinsu benli ye ne là se hegsengel ye nawahu bè tóbô yó kem ógóf ye mò hkekeb ye ebéléu. Okóm mom henblat ye nawahu lemwót bè yó kem salà ye. Tey kehtakas ye dou lemwót bè yó kem nmò ye là tedengen.

²⁵ Igoen ou yóm Dwata tódô hmifót yó kem salà ye. Yó gónóhu hmifót du abay se ou se Dwata. Là kô bud snolou du bélê ye ne yó kem salà ye.

²⁶ Mógów tekuy ebè gónô skukum dé, klamo ye ou ditu. Hegfan ye kun ke tahu yóm gónó ye kmamo do.

²⁷ Yóm hol tanay fù ye, gemsalà le béléu. Senged se yó kem tau malak kuy, bud le gemsalà béléu.

²⁸ Ne yó kem tau gónó ye kmulu, mom nmò le yóm gónón là bud mólós yóm dou Gónô. Yó gónóm mon, deng genbau klowil le yó kem dou tau Israél. Tódô bayau lu ne yó kem dou tau bè yóm alì sidek kehyak le kul.”