Isaya 40 - Udél Dwata: Gna Kesfasad ne Lomi Kesfasad

Udél mò hemyu nawa

¹ Yó udél yóm Dwata tekuy, monen, “Hol henyu ye nawa le yó kem dou tau, hol henyu ye nawa le.

² Hol genduf ye lu yó kem tau bè Jirusalim. Tulón ye kul deng geblaen yó ne yóm keglayam le ne deng gotu hnifótu ne yó kem salà le. Yóm deng ktafaku kul, tódô geblà du ne bè kdê yó kem salà tehe gel nmò le.”

³ Wen tmaba, yó utóm tum tabahen, monen, “Eles ye mò lan gu lem yóm benwu laen hol wen tauhen mò gónón mlan yóm gónó tekuy mogot. Eles hen-gifat ye yóm lan nmò ye yó mò lolò yóm Dwata tekuy.

⁴ Eles henok nlem ye yó kem sbong ne sentunal ye yó kem bulul. Ne sendatal ye yó kem buntud ne yó kem gónón sebsuk, efet tódô mló.

⁵ Ominen yó he gfan yóm tey kegeta Dwata ne tódô kdéen tau angat gotu mton du. Ni se yóm deng fasad Dwata tekuy.”

⁶ Bud wen tmaba, yó utóm tum tabahen, monen, “Hol heglalagem dé.” Monu se, “Tedu de heglalagu?” Monen se, “Yó heglalagem, là kóen té yóm klowil tau, hol lómón ke bnes mahil le menes. Ne hol lómón ke bulók lem bnes, mahil le mifù.

⁷ Mahil menes yóm bnes ne mahil mifù yó kem bulók ke wen lenos hayuf Dwata ebélê le. Hol lómón yó se yóm klowil tau, là kóen té.

⁸ Tahu se, mahil menes yóm bnes ne mahil mifù yó kem bulók. Okóm yóm udél yóm Dwata tekuy, laen kô dù nan e són.”

⁹ Ó kem tau bè Jirusalim, mneged ye eta yó kem bulul, heglalag ye bè yó yóm tulón hyu. Yu kem tau bè Sayun, hol hgel ye dé yóm udél ye, heglalag ye yóm tulón hyu. Hol tulón ye, bê ye abay hlikò. Tulón ye bè tu kem benwu lemnek bè Juda, móyónen kól ne yóm Dwata le.

¹⁰ Móyónen kól ne yóm Dwata hol dandónen geta gónó tekuy mogot ne ya tey kfasangen bè yóm kogoten. Angat gotu nwiten yó kem tau deng lenwaen.

¹¹ Tey hyu yóm angat kesegyoken kul, lómón yóm tau hyu kesegyoken yó kem ubihahen. Gel sentifunen yó kem ngà ubihahen ne gel sniwihen lu. Ne hen-ganagen malak yó kem yê le.

Là kô gbekem hmingón du yóm Dwata yó kem tau Israél

¹² Wen kô gembek bemtes du yóm él mohin ke tô hlanen bè ksakuben du hólól? Wen kô gembek bemtes yóm longit mlan bè kdangawen du? Wen kô temngón du keblaten yóm tonok bè klamangen benwu? Duhen ke gembek tmimbang yó kem bulul ne yó kem bulul lemnek?

¹³ Wen kô gembek mdók du ke Dwata yóm nmoen? Tau du se gembek tmolok du duhen ke hmau du?

¹⁴ Wen kô mò gónó Dwata smólók anì wen tngónen ne anì wen kenhulungen? Wen kô gónó Dwata smólók atul mò gónón dmalang du ke tedu nmoen?

¹⁵ Bè kton Dwata du yóm kdéen benwu talak tonok tek utì, hol lómón ke tdak él tek setlek. Ne tu kem hungul te mohin, ke tô tnimbang Dwata lu hol lómón klaanen ngà kfung demket bè timbang.

¹⁶ Tódô klamang yóm dlag Libanun là kóen kóyów yó kem koyuhen semnuk du yóm dsù mò gónó hol madat ke Dwata. Ne yóm kdéen ógóf mò gel dsù là kóen kóyów ke mò dsù ebè Dwata.

¹⁷ Bè kton Dwata du yóm klamangen benwu, tey utì béléen.

¹⁸ Duhen yó, wen kô gónó tekuy e heskél ke Dwata? Gbek tekuy hmingón du kô yóm kun kmò?

¹⁹ Yóm Dwata kun, là kóen mkél bè yóm dwata lenbù nmò tau. Yóm dwata lenbù nmò le yó, sal gel lenafin le tahu blówón yó kem tau temwél du ne bud wen blówón bukay nmò le mò gónó le hdà du.

²⁰ Bong bè yóm tau là gbeken du bemli yóm blówón bukay ne tahu blówón mò dwatahen, tódô mebel yóm koyu mtétél yóm là mahilen bolok. Ominen hmò du bè yóm tau alì hulung mò yóm dwata lennged là gelen hugón.

²¹ Là deng tngónem du kô kóm yóm kmò kbut benwu? Là deng wen tehe tmulón du kóm kô yóm mò kmoen? Là deng gungolem du he kô?

²² Yó tehe mò du yóm benwu, tek són yóm Dwata myón kmamal senta tonok bè hol gónón geta sentu longit. Bè ktonen yó kem tau te tonok tey le lemnek, lómón ke gulom. Bè yóm tehe kmoen yóm longit, hol lómón ke hnal nes lenulun mò ketef yóm gónó le nô yó kem tau.

²³ Gotu heglaanen yó kem tau mfasang mogot benwu, tódô hlanahen boluy le.

²⁴ Hol le mkél bè yó kem hulu lomi hanà nbut le tmowok ne dmolil. Tódô le menes ke hayuf Dwata eta le lenos, tódô le mnes ne mung le holis lómón ke lami mékéng.

²⁵ Wen kô gónó tekuy e heskél du yóm Dwata laen dù belenen? Wen kô tngónem mkél béléen?

²⁶ Lengalai ebè longit dé. Tau du se mò kul yó kem blotik tonem? Yó mò kul, duhen yó sem gel mit kul hewà ke kifu yó kem tey blotik genged yó. Gotu tngónen ke hilu kwen le. Yóm ket kul na sotu, sket wen boluyen kul. Lemwót bè yóm alì kfasangen, balù sotu bélê le ke lana.

²⁷ Duhen yó kem tau Israél, moen de ke alì ye tmalaw? Moen de ke gel mon ye là kô bud snolò Dwata kuy ke wen gónó ye glayam ne là kenmónen kuy ke sidek kwit le kuy yó kem tau mogot kukum?

²⁸ Là deng tngón ye du he kô ne là deng gungol ye du? Yóm Dwata gónó tekuy mogot laen kô dù tul sónen. Du se tehe dmimun yóm klamang benwu. Là kóen na a miteg ne là se kóen na a lunog. Là gbek te hmingón du yóm tey kehedemen tekuy.

²⁹ Gel ten-gelen yó kem lunog ne gel hekgisen yó kem miteg.

³⁰ Balù yó kem logi lomi lemnok, gel gnóm le klunog le. Botong le gel masà lemwót bè alì ksidek kliteg le.

³¹ Okóm yó kem tau són ken-gel nawa le yóm któbóng Dwata kul, tódô senflós Dwata tendo hulék kgis le. Hol lómó angat kmò le lómón yóm klinggel kóyóng yó kem banug. Ke mlóy le, là kô le mahil mubas. Ke tmonok le, là kô le mahil miteg.