Isaya 37 - Udél Dwata: Gna Kesfasad ne Lomi Kesfasad

Yóm kni Hisikaya tóbóng bè Isaya

¹ Bè yóm kungol Hisikaya du yóm tulón le yó koni, tódô gekséen nes bè lówóhen lemwót bè yóm alì ksidek kegbeng lemen, tles bud leseken nes sakù ominen mógów ebè Gónô Dwata.

² Wen kem tau dóken ebè yóm sotu tugod Dwata boluyen Isaya ngà Amus. Yó boluy yó kem tau dóken, Ilyakim yóm mogot gónô bongen ne Sibna yóm fen gel smulat yóm gel nmò le ne wen bè yó kem tuha gel demsù ebè Dwata mung kul. Gotu le lemsek nes sakù snéen kul.

³ Yó udél hwit Hisikaya ebè Isaya, monen, “Ni se yóm kdaw alì keglayam tekuy, yóm kdaw ktafak Dwata tekuy, yóm kdaw alì ksidek kyak tekuy. Hol lómón ke tekuy yóm libun kmuleng blututen, okóm laen kô dù kgisen hesut du yóm ngaen.

⁴ Deng hógów yóm tau hol geta bè Asirya yóm sotu geta bè yó kem genlalen anì nan e hennê yóm Dwata là matayen. Yake yó hem Dwata gónóhem mogot hol mungol du yóm kehnê le yó anì gotu tnafaken lu. Duhen ni, holi mni kut bè Dwata bè yó kem dù tau tebel bélê tekuy.”

⁵ Bè yóm kgefeten bè Isaya yóm udél Hisikaya yó,

⁶ ominen hemwit udél se kun ebè Hisikaya, monen. “Ni se udél Dwata ebéléem. Hol béi abay hlikò bè yóm deng gungolem lemwót gu bè yó kem tau Asirya yó, yóm mon le là gbek Dwata lemwà kuy.

⁷ Angat wen udél heglileb Dwata du yóm tau hol geta bè Asirya yó, hlanen bè yó kem sentulón tau. Bè yóm angat kungolen du yóm udél yó, angat tódô bud mulék ebè kun benwu ne bè yó gónó Dwata hfatay du.”

Yóm khewó yóm tau hol geta bè Asirya ke Hisikaya

⁸ Timbow gungol yóm tau Asirya wen glalen yóm là bud knóen bè Lakis yóm tau hol geta gónón mogot, abay se deng bud mit sgida bè yóm sotu syudad moni bè yó boluyen Libna, yó gónón mógów ebè Libna se kun na a stulón du.

⁹ Okóm deng sana wen tau mit tulón ebè yó kem tau Asirya. Yó tulón nwiten, wen kem sendalù lemwót bè Idyip na a mit sgida bélê le. Yóm tau hol geta bè Sudan kun, boluyen Tirhaka fen malak kul. Bè yóm kungol yóm tau hol geta bè Asirya du yóm ni, yó gónón kendel bud hemwit sulat ebè Hisikaya

¹⁰ yóm tau hol geta bè Juda. Yó udélen lem sulat, monen, “Deng monen mò kóm yóm Dwata snaligem, là kói btang kun elem tdoku. Hol béi abay gsukat bè yóm udélen yó.

¹¹ Deng hónô gungolem se yóm gel nmò yóm tau hol geta bè Asirya ke wen benwu nóyô genbaen. Yó kô kóm hendem angati gewà lem tdoken?

¹² Ngem yó kem tehe fuu, lu se tehe gembà yó kem syudad boluy le Gusan ne Haran ne Réséf. Ne bud lu se tehe hmatay yó kem tau Bét-édén, kem tau nô bè Til-asar ne là kô na a gbek yó kem dwata le lemwà kul.

¹³ Nô se lu du yó kem tau hol geta tehe mogot yó kem syudad Hamat ne Arpad ne Sifarbim ne Hina ne Iba? Là kô bud tonem kul ne.”

¹⁴ Timbow gefet bè Hisikaya yóm sulat yó koni, ominen semfala du. Deng kesfalahen du tódô nwiten ebè Gónô Dwata, hlasaen bè yó bè solu Dwata,

¹⁵ ominen mni bè Dwata, monen,

¹⁶ “Ó Dwata yóm Dwata laen dù là gbeken du, yóm hol kum gónó mogot kem tau Israél, yóm myón bè yóm gónóm kmamal geta senta yó kem gel hógówem nô bè yó. Tek sónen uu yóm Dwata. Gotu knamalem yóm klamangen. Uu se tehe dmimun tonok ne longit.

¹⁷ Hol hnungolem mi, Dwata, ne hol hnénégem yóm deng gefet bélê me ni. Hol hnungolem yóm alì kehnê Sinakirib kóm yóm tau hol geta bè Asirya. Tey kehnéen kóm igoen uu yóm kum Dwata là matayen.

¹⁸ Deng gotu tngón me, Dwata, tey dê benwu deng tehe genbà yó kem tau hol geta bè Asirya ne gotu negef le yó kem tau tehe nô bè yó kem benwu yó.

¹⁹ Ne yó kem dwata le gotu nlób le. Sundu tahu dwata du yóm nlób le yó, hono dwata lenbù nmò yó kem tau gu bè koyu ne gu bè botu.

²⁰ Duhen yó, Dwata, yóm hol kum gónó mogot, hol lenwaem mi gu lem tdok yó kem tau Asirya anì tngón yóm kdéen tau bè klamangen benwu tek són uu yóm hol tahu Dwata.”

Yóm udél bud hwit Isaya ebè Hisikaya

²¹ Bè yóm kdaw yó, lemwót Isaya hwiten ebè Hisikaya yóm balà Dwata du yóm hnihen béléen yó koni.

²² Yó monen mò du, “Yó udél Dwata ebè Sinakirib yóm tau hol geta bè Asirya, monen, Ó Sinakirib, tey kkuli le kóm yó kem tau bè Jirusalim ya tey kehnê le kóm.

²³ Deng tngónem kô kóm kun kegeta yóm hennéem yó? Ou se yóm là nadatem du yó, yóm Dwata yó kem tau Israél, yóm Dwata laen dù belenen.

²⁴ Deng wen kem tau genlalem hógówem ebéléu, tey sidek keheklabak le. Yó gotu tulón le, dengi gemmò kun bè yó kem bulul alì geta bè Libanun. Ne deng gotu nofokem yó kem koyu sidar alì tahà ne yó kem koyu siprus alì tilob, dengi gefet kun bè hol gónón sóól yóm tey dlag lamang.

²⁵ Yó bud udélem heklabak, tey dê kokol nelem deng hokolem bè yó kem tólóng benwu kun ne dengi gel minum él bè yó. Ne yó sotu bud udélem heklabak, deng kti kun yóm él bong bè Idyip boluyen Nayl, botong lan le semsdà yó kem tey genged sendaluem.

²⁶ Là tngónem du kô ou se tehe matul du yó kem dê deng nmoem yó? Ou se hmò du kóm yó kem yó. Bud lemwót béléu yóm kfasangem gembà kul yó kem syudad balù yóm tey kdengen beng le.

²⁷ Yó kem tau menwu bè yó, laen kô dù gmò le. Ya tey sidek klikò le, tódô le teneng. Hol le mkél bè bnes talak tniba duhen ke kluon gel tmowok te ketef, mahil menes sok sut yóm lenos alì mayuf kinì.”

²⁸ “Okóm,” mon Dwata, “deng gotu tngónu yóm kóm kmò. Tngónu kdê yó kem gel nmoem ne kdê yóm gel gónóm e solu. Tngónu snéen yóm alì kebutem do.

²⁹ Deng gefet béléu yóm alì kebutem do ne yóm alì keheklabakem. Ne ni wen nmou béléem. Hol lómón ke wen dulé kebengu bè ilungem ne nmou kakangem anì bud benklilu u mulék, hlanu u bè yóm lan tehe loloem bè yóm kógówem edini.”

³⁰ Omin Isaya bud mon du mò ke Hisikaya, “Yó mò ilô yóm angat kdohoen yó kem tulónu kóm yó koni, lenwóten bè halay ni efet kól bè halay hulin, són olo ken ye són ken tabag. Okóm kogolen bè yó, bud wen halay hulu ye ne nuta ye ne bud wen grép hulu ye ne ken ye bunguhen.

³¹ Yó kem dù tau mowil bè Juda, bud hyu klowil le, mkél le bè yó kem hulu alì tilob ktowok le, ne baling ngelem kdolil le ne tilob kbungu le.

³² Tolo wen he dù tau mowil bè yó kem tau nô bè Jirusalim yóm kmoen ni ne bè bulul Sayun. Yó se yóm deng olu Dwata kul yóm Dwata laen kô dù là gbeken du.

³³ Ne ni sii yóm bud tulón Dwata gbak ebè yóm tau hol geta bè Asirya, yó monen, ‘Là kóen na a gusek du kun yóm syudad Jirusalim na a hmanak, balù olo sotu. Ne laen kô dù sendalù lemsek onit na a gehloni edu ne laen se dù buntud nmò le hilol bengen ke mò lan le hulé elemen.

³⁴ Yóm tau hol geta yó, angat bud tódô mulék bè yóm sana lan tehe loloen. Là kóen na a gusek ebè yóm syudad Jirusalim yó. Ou se Dwata mon du yóm ni yóm gónó ye mogot.’

³⁵ Ou se mofin du yóm syudad ni, ou se mentey du. Yó gónóhu mò du yóm ni mò gónón là lana boluyu, yakà wen yóm tehe fasadu ke Dabid yóm tehe tóbóng lówóhu.”

³⁶ Bè yóm kifu yó, wen sotu hógów Dwata gu bè longit ebè yóm kul kamfù yó kem sendalù Asirya. Botong lematu bud wolu folò limu libu sendalù Asirya hnatayen. Bè yóm deng kwasen tódô hgasà kem sendalù, deng le gotu matay.

³⁷ Yó gónóm mon, là dogen gehlós yóm nmò yóm tau hol geta bè Asirya yó, tódô semfulék ebè Ninibi ebè yóm kun syudad.

³⁸ Sotu kdaw bè yó, yóm igoen tolo tmaba bè gónô yóm kun dwata boluyen Nisrok, wen lewu ngaen logi sut béléen ne tódô bnonok le bè yó, tibó le du yóm kul sudeng. Omin le mlóy ebè yóm sotu benwu boluyen Ararat. Yó boluy le, Adramélék ne Sarisér. Wen sotu ngà Sinakirib boluyen Isarhadon bud temles du. Là gomongen bè nili yóm tsaptér 38. Yó tulónen, yóm kwen des Hisikaya yóm tau hol geta bè benwu Juda, gónón tô matay okóm mni bè Dwata anì mkó yóm desen. Ne tahu se, hkó Dwata yóm desen ne bud tennuen sfolò limu halay yóm klowilen. Yó bud fasad Dwata ke Hisikaya yóm kofinen yóm benwu Jirusalim bè yó kem tau Asirya. Bè bérs 8 wen ilô nmò Dwata bè Hisikaya, ilô yóm kdohò kmoen du nim ni, yó monen, “Hudulu sfolò bangen bè yóm tngel kdaw gónón gel temngel udas tehe Ahas yóm sotu tau geta.” Ne tahu se, tódô hudul sfolò bangen yóm olung bè yóm gónó le gel temngel udas yó. Yóm sfu nim tsaptér ni hónô lingón nmò Hisikaya gónón dmóyón ke Dwata bè yóm kehkóhen desen. Là gomongen bè nili yóm tsapter 39. Yó tulónen bè yó deng kungol yóm tau hol geta bè Babilun yóm kleed des Hisikaya yóm tau hol geta bè benwu Juda, yó gónón wen kem tau hógówen mò henwiten sulat ne basa. Tey kehduf Hisikaya kul yó kem tau yó, gotu toloken kul yóm kdê nô lem yóm gónón gel hemyu kimu legen alì mebtes, laen kô dù bnosen bélê le. Kdeng kewót yó kem tau mauy gu bè Babilun, lemwót Isaya yóm tugod Dwata, mógów ebè Hisikaya nan e nudél bè yóm deng nmoen. Mon Isaya mò du bè bérs 6, “Deng móyón kól yóm kdawen yóm kdê deng nfunem, yóm kdê kendengen deng sentifun kem tuhahem, angat gotu nwa le ebè Babilun. Laen dù bud tebel, mon Dwata.” Bè yóm deng kungol Hisikaya du nim ni, yó nô lem hendemen, “Anien he, senged sana kwen kenek nawa me ne laen dù hemen me bè yóm klawihu mowil.”