Isaya 36 - Udél Dwata: Gna Kesfasad ne Lomi Kesfasad

Yóm udél hlikò hwit yóm tau hol geta bè Asirya ebè yó kem tau bè Jirusalim

¹ Bè yóm gesfoloen fat halay kegen Hisikaya mogot yóm benwu boluyen Juda, wen sotu tau hol geta bè Asirya boluyen Sinakirib, nundugen yó kem syudad bè benwu Juda ne gotu gwahen lu, balù yóm tey beng hmilol kul.

² Ominen mdók yóm hol geta bè yó kem genlalen nô bè Lakis anì mógów ebè Jirusalim, mung du yó kem tey sendalù wen. Yó hmoen du nan e hgaga du Hisikaya anì heglaan bélê le. Bè yóm kkól le bè Jirusalim, tódô tenfeng le yóm lan gónó le gel mò nmò yó kem tau mò nes, bè yó bè yóm kanal él lemwót bè yóm él senbusung le tofi dta.

³ Wen tlu tau lemwót bè Juda semlong kul. Yó boluy le, Ilyakim ngà Hilkama yóm mogot yóm gónô bong gónón nô yóm tau hol geta bélê le. Ne yóm gewuhen, Sibna yóm tau gel smulat yóm gel nmò le. Ne getluhen, yóm sotu tau boluyen Juwa ngà Asaf yóm tau fen gel mogot du yóm kdê deng snulat le.

⁴ Ominen mudél ebélê le yóm genlal geta lemwót bè Asirya yó koni, monen mò kul, “Yó udél hwiten ebélê ye yóm tau hol geta bélê me, monen, ‘Moen ke là likoen do Hisikaya?

⁵ Ngem yóm tey kfasang me ne yóm tey khulung me mit sfatay. Yó kô hendem ye gemmò ye bè olo udél hwit ye bè yóm tey kfasang me ne yóm tey khulung me gmida? Benwu du de gónó ye htóbóng anì gemmò ye bélê me, mi kem tau Asirya?

⁶ Déke dò ye yóm któbóng kem tau bè Idyip kuy. Ke yó dò ye, hol lómón ke tmuged ye balut. Mom hnalì hólól ye. Lómón yó se kmoen yóm tau hol geta bè Idyip ebè yóm tau smalig béléen.’ ”

⁷ Ominen bud mudél yóm tau genlal lemwót bè Asirya yó, monen, “Tô snalig ye Dwata kô, yóm kuy gónó mogot? Igò Hisikaya se deng hegbà du yóm kdê gónó ye tehe demsù ebéléen. Deng tulónen kuy kem tau nô bè Juda ne bè Jirusalim, olon sotu gónó ye gel demsù kun ne olon sotu yóm gónó ye gel tmaba ebè Dwata.

⁸ Ni wen hmóyóu kuy hlanu bè boluy yóm tau hol geta bélê me. Angat benlayu yu lewu libu kudà ke wen lewu libu tau ye hulung smakay kul. Neet he.

⁹ Balù yó hem tau genlal hol glaan bélê me, là kô ye gemmò béléen. Yó kô tô nangat ye ke henwit le yu sendalù smakay kudà yó kem tau bè Idyip, mung du yó kem klitun gel dyol kudà le bè gida? Neet he.

¹⁰ Ne sotuhen, là kô lenbuu du tódô gembà benwu ye ke là Dwata fen tmóbóng do yóm Dwata gónó ye mogot. Deng hógówen o edini anì naw e genbà yóm benwu ye.”

¹¹ Omin le mudél le Ilyakim ne Sibna ne Juwa, mon le mò du, “Yake udél Aramik dé udélem ebélê me, abay se deng tngón me se kum. Béi mudél Hibru, abay se gotu gungol yó kem tau myón bè beng yóó.”

¹² Bud mudél ebélê le yóm tau Asirya yó, monen, “Ilóem ofo kuy ke són ebélê ye ne bè yóm tau hol geta ye gónón e hemwit du yóm tau hol geta bélê me ni kem udél ni? Kaem là. Bud tulónu yó se kem tau myón bè beng yóó, abay se ke là heglaan ye bélê me, yó angat gfà le, botong ken le kê le ne ninum le tléél le, lómón yó se angat kuy gfà.”

¹³ Ominen mdà yóm tau Asirya yó koni, bede hgelen udélen bè udél Hibru, monen, “Hol hnungol ye yóm udélen ebélê ye yóm tau hol geta bè Asirya, yó monen,

¹⁴ ‘Hol ten-gama ye anì là gsukat ye bè Hisikaya. Là kô nan e gbek du lemwà kuy.

¹⁵ Hol bê ye abay nmung ke niten yu smalig bè Dwata. Hol bê ye abay hendem ke gbek Dwata lemwà kuy lem tdok me, duhen ke gbeken hemseng yó kem sendalù Asirya anì là genbà le du syudad ye.

¹⁶ Hol bê ye abay hnungol Hisikaya.’ Yó udélen ebélê ye yóm tau hol geta bè Asirya, hol ye géhél hewà gu lem yóm syudad ye na ye e heglaan béléen. Ke ni se nmò ye, angat bud gken ye he bungu yó kem grép ne yó kem bungu fig ye. Ne angat bud ginum ye yóm sana kuy él lemwót bè kuy kokol

¹⁷ efet niten yu ebè yóm dumu benwu mò gónó ye nô, yóm benwu hol mkél bè yóm kuy benwu ni, yóm hol gónón nô yóm grép alì tmifas ne halay mò ken ye.

¹⁸ Hol bê ye hnungol ke mon Hisikaya mò kuy, ‘Dwata he angat lemwà tekuy.’ Deng wen kô dwata gembek lemwà yó kem kul benwu gu lem tdok yóm tau hol geta bè Asirya? Là he.

¹⁹ Nô se lu du yó kem dwata bè syudad Hamat ne Arpad yóm deng genbà me? Ne yó kem dwata bè syudad Sifarbim, nô se lu du? Deng wen dwata kô lemwà yó kem tau bè yóm syudad Samarya? Laen duen.

²⁰ Yóm kdéen dwata bè yó kem dumu syudad yó, là kô gbek le lemwà du yóm kul syudad gu lem tdok yóm tau hol geta bélê me. Ke yó se kmoen, moen de ke hendem ye gbek yóm kuy gónó mogot lemwà kuy, yu kem tau bè Jirusalim?”

²¹ Yóm kdéen tau hmungol bè yó, tódô le gotu neb. Bà sekteb ke tô le mudél, hol lómón yóm deng mon Hisikaya mò kul.

²² Omin le lemwót le Ilyakim ne Sibna ne Juwa, gotu kensê le yóm nes bè lówó le lemwót bè yóm alì ksidek kegnóm le du. Tódô le mógów ebè Hisikaya ne gotu tulón le du yóm deng monen mò kul yóm tau genlal lemwót bè Asirya yó koni.