Isaya 35 - Udél Dwata: Gna Kesfasad ne Lomi Kesfasad

Yóm lan mólós

¹ Bè yó kem kdaw yó, tódô baling hyu yóm benwu tehe là hyu menwu du, tey wen kem bulók tmowok du.

² Hol lómón ke tódô hligal semngal ne mensag yóm benwu yó. Lómón angat ktiloben, lómón ktilob yó kem bulul bè Libanun. Yóm kehyu yóm tonoken hol lómón yóm kehyu yóm tonok bè Karmél ne Syaron. Tódô kdéen tau gotu mton du yóm tey klinggel Dwata ne yóm kegetahen ne yóm kfasangen.

³ Hol ten-gel ye yó kem sigel deng sidek kliteg le ne yó kem bukol deng kenkel là bud le mgel.

⁴ Hol mon ye bè yó kem tau wen kensidek nawa le, “Hgel ye nawa ye dé, bê ye abay bud hlikò. Móyónen kól ne Dwata nan e lenwà yu ne gotu tnafaken yó kem hohon ye.”

⁵ Bè yóm kkólen, gotu htonen yó kem butô ne hfungolen yó kem bokong.

⁶ Yó kem hikot, angat le bud gehkak ne madal. Ne yó kem umew angat le gudél, tey kehligal le botong le gehsag. Ne yóm benwu tehe laen dù élen, angat wen kem él mlel du.

⁷ Angat baling lanaw yóm helek tehe alì sidek kkinien. Ne yóm benwu tehe alì mékéng tonoken, angat dê tbul élen. Bè yóm tehe gónón mékéng gónó le nô yó kem ógóf mayal, tódô angat wen sed tmowok bè yó, dalang se yó kem dumu hulu gel tmowok lem hitok.

⁸ Bè yóm benwu yó, angat wen tey lan lamang gu lemen. Yó boluyen, “Lan Mólós.” Laen dù tau mò sidek ke gemlan bè yó. Laen dù tau nungel mit hetlas yó kem dumuhen bè yóm lan yó.

⁹ Laen dù kem liyun nô bè yó. Ne laen se dù dumu ógóf lóbô ke gemlan bè yó. Són olo gemlan bè yó, són yó kem tau deng lenwà Dwata. Yó se lan angat lolò le bè yóm kulék le ebè Jirusalim.

¹⁰ Angat tey kligal le bè yóm kgefet le bè yóm benwu yó, tey kesngal le ne kehsag le lemwót bè kligal le. Ne laen kô dù sónen yóm kligal le yó. Là bud wen lenangag le ne laen dù bud kenblat nawa le.