Isaya 33 - Udél Dwata: Gna Kesfasad ne Lomi Kesfasad

Kni le tóbóng bè Dwata

¹ Deng le gotu golu elem hatay ne yó kem hohon tekuy. Deng tey wen hennagaw le ne tey wen gel snukat le, balù yóm klaen dù tau deng mnagaw bélê le ne laen dù tau smukat kul. Okóm yóm knagaw le yó ne yóm gel ksukat le wen sónen. Ne bud wen se hennagaw le bélê le ne smukat kul.

² Ó Dwata, hol knoduhem mi, són uu se nefet nawa me. Hol kenlungem mi ket kdaw. Lenwaem mi ke wen gfà me.

³ Ke uu yóm gel mung kum bè gida, tódô le gotu mlóy yó kem hohon me ke gungol le yóm tey uni sfatay.

⁴ Gotu kendel nuku me yó kem kimu gtebel le.

⁵ Tey kegetahen yóm Dwata. Gotu knamalen yóm klamangen. Gotu blayen bè Jirusalim yóm ktedeng kogot le kukum ne yóm klaen dù kéng yó kem tau malak bè yó.

⁶ Tey kehbegelen yóm kbenwu le ne tendo gel nofinen yó kem tauhen. Benlayen lu khulung hedem ne ketngón. Yó hol mebtes du yóm blayen kul, duhen yóm klikò le du.

⁷ Okóm yóm kmoen ni, balù yó kem tau lóbô bélê me, botong dawat le kem dumu le. Balù yó kem tau hógów yóm tau hol geta bélê me mò na a mit sefyu bè yó kem hohon me, ya tey sidek kkik le.

⁸ Ne laen dù bud gemlan bè yó kem lan bong abay se eles bnentey yó kem hohon me. Yó kem deng tehe senkotuk le bè dumu benwu là kóen dohò. Laen dù bud kessadat nô bélê le.

⁹ Yóm klamang tonok tehe gónó le mò nmò, laen dù bud tonem hulu tahen. Yó kem tey dlag bè Libanun deng le gotu menes. Yóm tey datal tilob mò du hulu bè Syaron, deng baling benwu là hyu menwu du. Ne yó kem dlag bè Basan ne bè bulul Karmél, gotu tbó doun le lemwót bè kenes le.

Yóm eles udél Dwata ebè yó kem hohonen

¹⁰ Yó udél Dwata ebè yó kem tau bè klamangen benwu, monen, “Ni angat wen nmou. Htonu kuy yóm kfasangu.

¹¹ Yóm kdê gel natul ye ne kdê yó kem gel nmò ye, hono laen dù gónón e kól. Yóm dou Tulus, hol lómón ke ofi mò gemlà kuy.

¹² Angat ye gotu musok hol lómón knò ye yó kem botu metlohò ne hol lómón yó kem ngà koyu semnual gel dnutung bè ofi.

¹³ Yu kem tau moni bè ni ne yu kem tau nô bè gónón mayuk, hol hnungol ye yóm deng nmou ni ne hol hendem ye yóm tey kfasangu.”

¹⁴ Yó kem tau gel mò sidek bè Sayun, tey sidek kesetbol kkel le lemwót bè yóm tey alì klikò le. Yó udél le, “Yóm kkukum Dwata tekuy hol lómón ke dilóf ofi laen dù tul katayen. Laen kô dù bélê tekuy bud mowil du yóm ofi lómónen yó.”

¹⁵ Song gónó ye mowil kuy bè yóm ofi yó ke tedeng yóm gel kebkó ye ne ke tedeng yóm gel nmò ye. Béem nwit yóm kwen boluy ye mò smukat yó kem tau élél. Hol bê ye henmóyô ke wen tô blay le kuy mò wa nawa le. Hol bê ye abay mung bè yó kem tau matul monok, duhen ke wen dumu sidek natul le.

¹⁶ Ke ni se gel nmò ye, laen kô dù hemen ye. Hol lómón ke nô ye lem yóm gónó heklung mbegel. Laen dù gónó ye élél bè ken ne bè ninum ye.

Yóm tey kehyuhen elem hulin kdaw

¹⁷ Angat wen kdawen kton ye du yóm sotu tau hol dandónen geta kmamal yóm klamangen ne tey klinggelen.

¹⁸ Yóm kmoen ni, tey sidek klikò ye kul yó kem tau gel mtuk bwis lemwót bè dumu benwu ne yó kem tau gel hmolung bè benwu ye. Okóm bè yóm kdaw yó, là bud ton ye kul.

¹⁹ Là bud ton ye kul ne yó kem tau heklabak lemwót bè dumu benwu gel mudél yóm udél là deng tngón ye du.

²⁰ Tenngel ye dé yóm benwu Sayun, yóm syudad gónó tekuy gel mò du yóm kehligal ebè Dwata. Ne tenngel ye yóm benwu Jirusalim, angat tey menek menwu du. Hol lómón ke yóm kamfù là bud nili du. Yó kem htegen, là kô le bud kdut ne yó kem féten là kô le bud hto.

²¹ Bè yóm kdaw yó, hegfan Dwata bélê tekuy yóm tey kegetahen. Ne nô tekuy bè kilil yóm tey él lamang ne laen dù kafal yó kem hohon tekuy bud gemlan bè yó.

^22-23 Ke wen bud mlan bè yó, gotu sidek yó kem htegen, baling laen dù bud muhen. Là bud gbek le mból du yó kem layalen. Yóm kdê kendengen yó kem hohon bè yóm kafal yó, gotu nwa tekuy. Ya tey kwenen, balù yóm tau tugô sana kwen kun nwa. Dwata se yóm hol geta bélê tekuy. Du se hol mogot tekuy ne mofin tekuy.

²⁴ Laen kô dù tau bud gemnóm des bè benwu tekuy ne gotu hnifót Dwata yóm kdê salà tekuy. Là gomongen bè nili yóm tsaptér 34. Yó tulónen yóm kmò ktafak Dwata yó kem but tau talak tonok bè yóm gotu keglaen kul. Bè yóm ktafaken kul yó, tódô kmanas yóm longit ne gotu btang yó kem blotik. Bud tulónen yóm alì ksidek kegbà Dwata yóm benwu Idom ne keglaen yó kem tau bè yó lemwót bè yó kem sidek deng nmò le bè yó kem kun tau Israél. Laen kô dù tau bud menwu bè Idom. Yó kmò Dwata du yóm benwu yó mò gónó le nô yó kem ógóf lem bnes ne yó kem onuk bnes kól bè laen dù tul sónen.