Isaya 32 - Udél Dwata: Gna Kesfasad ne Lomi Kesfasad

Yóm tau hol dandónen geta laen dù kéngen

¹ Bè hulin kdaw angat wen tau hol dandónen geta laen dù kéngen mogot klamang benwu. Ne yó kem smugung béléen, hono tau tedeng kwit le kukum.

² Kehlingónu kul, hol lómón ke lu mò seng bè lenos ne mò gónó e mlóy ke sut yóm tey kulón bong. Sotun, lómón ke lu yóm él mlel bè yóm benwu laen dù élen. Ne lómón ke lu yóm olung yóm botu semlung gónó hgolung bè yóm benwu laen dù koyuhen.

³ Yó nmò yó kem tau malak yó, tendo hnénég le ne tendo hnungol le yó kem tau nalak le ke tedu yóm wen mu le du.

⁴ Là buden kosut nawa le. Ket nmò le sal mlan bè yóm khulung le hedem ne tey mdengen ke wen gel mon le.

⁵ Laen kô dù tau madat du yóm tau là tedengen ne laen se dù tau bud mon du tau laen dù kéngen yóm tau gel hensideken kem dumun tau.

⁶ Yóm tau là tedengen yó, hono nungel kestulónen ne tey dê nmò sidek natulen. Kdê yó kem gel nmoen ne kdê yó kem gel udélen gónón gfan yóm là kadaten ke Dwata. Là kô henkenen kul yó kem tau bitil ne là kô hinumen kul yó kem tau meeng.

⁷ Tey sidek yóm tau là hulungen hedem yó, hono sidek yóm gel nmoen. Sónmoen matul du yóm lanen hemsidek yó kem tau élél hlanen bè kéng. Ne hensengen lu anì là guta le du yóm kul ktahu.

⁸ Okóm yóm tau laen dù kéngen, tey tedeng yóm gel nmoen ne tey mbegel kdaen du yóm tedeng.

Ktafak Dwata yó kem tauhen ne bud kehguléken yóm klowil le

⁹ Yu kem libun mahil klowilen, laen dù gel tnafa nawa ye se kuy, hol hnungol ye yóm tulónu kuy ni.

¹⁰ Tey kegsengel nawa ye du yóm klowil ye yóm kmoen ni. Okóm halay hulin, laen dù bud nefet nawa ye abay se laen dù bud nuta ye.

¹¹ Efet ni, tey mahil klowil ye ne laen dù tnafa nawa ye. Okóm angat sut bélê ye yóm ksidek klikò ye botong ye kenkel. Kó ye yó kem nes tilob lesek ye, tódô ye lemsek nes sakù.

¹² Dnofì ye kfu ye lemwót bè alì ksidek klangag ye yóm kehsidek le yóm gónó ye tehe gel mò hulu.

¹³ Deng tles tmowok du yó kem ngà koyu semnual efet laen dù bud muhen yóm tonok yó kem dou tau. Nkik ye yó kem gónô tehe wen kem tau hligal nô lemen. Nkik ye yóm kuy syudad tehe alì wen gónó le hligal yó kem tauhen.

¹⁴ Balù yóm gónô bong yóm tau hol geta bélê ye, angat gotu tódô sentagak le. Yóm yê yó kem syudad ye, laen kô dù bud tauhen. Yó kem gónô bè yó ne yó kem gónô gónó le gel mentey yó kem sendalù ye, angat gotu gbà. Són yó kem kudà tabag ne yó kem ubiha bliwel mótób bè yó.

¹⁵ Bede angat bud hwit Dwata elem blóng tekuy yóm kun Tulus. Yó kem tonok là bud hyu mò hulu tahen, angat bud baling tonok hyu ne angat tey bong nuta le du.

¹⁶ Hono tedeng nmò yó kem tau bè klamang yóm benwu ye ne tedeng se yóm kukum nwit le.

¹⁷ Lemwót bè yóm kmò le tedeng yóm kdê le, angat tey menek kbenwu le ne laen kô dù tul sónen yóm klaen dù knikò le.

¹⁸ Yó kem tau Dwata, angat laen dù bud tnafa nawa le. Tódô menek lem yóm kul gónô nô, laen dù bang knikò le.

¹⁹ Baluen ke wen tey bulók kulón tbó eta yó kem dlag ne gbà yóm syudad,

²⁰ okóm kuy, deng ye mom hligal yóm kdê ye lemwót bè yóm tilob él bè yó kem hulu ye. Ne hyu wen tilob gónó le mótób yó kem kudà ye ne yó kem safì ye. Tódô le kem tagaw bè yó, laen dù hemsidek kul.