Isaya 30 - Udél Dwata: Gna Kesfasad ne Lomi Kesfasad

Yóm klaen dù muhen yóm tô kehtóbóng le bè Idyip

¹ Ni se deng udél Dwata, monen, “Deng le gotu golu elem hatay ne yó kem tau malak bè Juda lemwót bè yóm kkogol le do. Tódô lolò le yóm atul là lemwóten béléu. Sundu dou kóyô du yóm gel senkotuk le bè dumu benwu. Lemwót bè yóm nmò le yó tendo temnù yóm salà deng gel nmò le.

² Tódô le htóbóng bè Idyip, là dog le gna smólók béléu. Kóyô le ke Idyip fen mofin kul, yó gónó le smalig du yóm tau hol geta bè yó.

³ Okóm yóm tau hol geta bè yó yó, laen kô dù kgisen tmóbóng kul. Yóm tô kofinen kul angat mom wen glumfak le du.

⁴ Deng sana wen kem hógów yóm tau hol geta bè Juda ebè Idyip mò mni tóbóng bélê le. Ne deng le kól bè Suan ne Hanis yó kem syudad glem lem Idyip.

⁵ Tey kegsel yó kem tau Juda bè yóm deng ksalig le yóm benwu laen dù genléd nawam du. Hendón le ke dohò yóm któbóng le kul, okóm là.”

⁶ Ni se udél Dwata gbak ebè yó kem ógóf lóbô lem bnes bè yóm benwu fi leged là hyu menwu du, monen, “Yó kem tau hógów le mò na a mni tóbóng yó, mlan le bè yóm benwu gónó le nô yó kem ógóf lóbô, yóm gónó le nô yó kem liyun ne yó kem ulal malas ne yó kem swaga móyóng. Gotu lenulón le yó kem tey mebtes yó kem kudà ne yó kem kamél le, mò blay le bè Idyip yóm benwu là gbeken du tmóbóng kul.

⁷ Yóm tóbóng lemwót bè Idyip yó laen dù muhen. Yó gónóm mon, nibahu Idyip ‘Swaga Là Lóbóen.’ ”

Yó kem tau là mimón ke Dwata

⁸ Wen hsulat Dwata do bè bok yóm gel nmò yó kem tauhen anì wen mdengen gónóhen nô yóm tey ksidek nmò le.

⁹ Tódô senflós le kmogol ke Dwata, tódô senflós le mò kéng, tódô senflós le kembê du yóm kun tolok.

¹⁰ Yó mon le bè yó kem tau tmugod ke Dwata bélê le, “Bê ye abay bud mudél ne. Bê ye abay tulón kum yóm nmò tedeng. Olo ye tmulón kum yóm nóyô hnungol me. Tódô bayà ye kum yóm kum gel hendem.

¹¹ Mdó ye bè ni, bê ye henseng yóm tô kum lan. Là bud me móyô hmungol du yóm gel tulón ye gbak bè yóm Dwata yó kem tau Israél yóm Dwata laen dù belenen.”

¹² Okóm ni se kun udél ebélê le yóm Dwata yó kem tau Israél yóm Dwata laen dù belenen, monen, “Là kenmón ye du yóm dou udél. Tódô snalig ye yóm kehsidek ye tau ne yóm ksukat ye kul.

¹³ Wen tey salà bong nô ta ye. Ke hningónu yu, hol lómón ke beng botu geta gentô lemwót fi ta kól elaan. Tódô mekto kegbaen.

¹⁴ Gotu lemusok lómón klusok yóm kuleng tonok. Laen kô dù tonem ke kóyów mò bud gónó hemsù bala ofi duhen ke mò sakub él.”

¹⁵ Wen udélen ebè yó kem tauhen yóm Dwata hol dandónen geta, yóm Dwata yó kem tau Israél yóm laen kô dù belenen. Yó monen mò kul, “Bud ye mulék ebéléu. Ke tódô ye henek béléu ne ke hol ye smalig béléu, wen kgis ye ne laen kô dù bud knikò ye.” Okóm mom là dog ye móyô mimón du yóm udél Dwata yó.

¹⁶ Mom yó atul ye smakay ye kudà alì mlóy anì gehlóy ye yó kem hohon ye. Ne tahu se, gehlóy ye yó kem hohon ye. Ofo kuy mon du ke alì mlóy yóm kuy kudà snakay, anì monem là. Mom yó he kem tau kemtes kuy yóm alì metlasik klóy kudà le.

¹⁷ Anien ke tek sotu sendalù hohon kemtes kuy, botong lemibu bélê ye hemlóy du. Ke wen limu kemtes kuy, tódô kdê ye gotu mlóy. Balù yóm kuy sendalù laen kô dù tebel bélê le, gotu le mlóy. Són olo tagak són yóm hehek gónó le tehe tméwéng flag mdà te bulul.

¹⁸ Baluen he ke yó nmò ye, yóm Dwata sana tolo kangaten du yóm kesfulék ye anì hegfanen bélê ye yóm kkoduhen kuy. Deng eles nô bè nawahen ne yóm tey kkoduhen kuy abay se yóm Dwata là gbeken du ke là nmoen du yóm hyu. Hligal le kul yó kem tau smalig bè Dwata.

Któbóng Dwata yó kem tauhen

¹⁹ Yu kem tau nô bè Jirusalim laen dù bud nkik ye ne. Yóm Dwata tey kkoduhen tau. Ke hol ye mni tóbóng béléen bnalaen yu.

²⁰ Bè Dwata se gónón lemwót yóm kgel klowil ye. Bede bè yóm kgelen yó, deng eles nô bélê ye mò tmolok kuy. Là bud nebel ye du ne ke tedu gónóhen nô.

²¹ Ke wen gónó ye tlas bè yóm lan lolò ye, bè iwóng ye duhen ke bè kwanan ye, wen udél Dwata gungol ye gu tekwang ye monen mò kuy, “Ni dé lan lolò ye.”

²² Tódô angat gotu bot ye yó kem dwata lennged tehe nmò ye gu bè blówón bukay ne bè tahu blówón. Hol lómón kbot ye fól kmò ye kul. Yó udél ye, “Laen dù bud mu me kuy.”

²³ Duhen yó, ke wen hulu ye tódô hkulón Dwata etahen anì tey wen angat nuta ye. Ne yó kem ógóf ye tey wen gónó le mótób.

²⁴ Yó kem safì ye ne yó kem kudà ye gel dmadu, tey tilob kehken ye kul.

²⁵ Bè yóm kdaw kegbà ye yóm gónó le heklung yó kem hohon ye ne yóm khatay ye kul, wen él hetbul Dwata hlelen gu bè ket bulul geta ne gu bè ket bulul lemnek.

²⁶ Yóm nóng bulón lómón ktatawen nóng kdaw. Ne yóm nóng kdaw alì mkay senta yóm gna gel knóngen. Ni se kmoen bè yóm kdaw angat kbulung Dwata du yó kem tehe halien kuy ne gotu hkóhen lu. Là gomongen bè nili yóm bérs 27 kól bè 33. Bud tulón Isaya yóm angat kkól Dwata mung du yóm tey sidek kebuten yó kem hohonen, kem tau Asirya. Ke uhayen eta le yóm sigelen alì kemgis mit du yóm ofi gónó meglà, mung du yóm hol yéen kulón bong, lel leték ne bulók kulón alì lembang mò na a gemlà kul. Bè yóm keglà yó kem hohon le, gotu le hligal semngal kdê yó kem tau Israél ne huni le yó kem tamburin le ne yóm sotu gel kenbit le. Yó monen bè bérs 33, “Yóm benwu Tufét, benwu gónó le gel mtem deng legen ne eles ketgama le du bè yóm tau hol geta bè Asirya, deng eles wen tey tumfuk koyu luduk le bè yó. Yó mò hdilóf du, yóm nawa gu lem bak Dwata, hol lómón ke ofi gu bè yóm bulul btù.”