Isaya 28 - Udél Dwata: Gna Kesfasad ne Lomi Kesfasad

Yóm eles udél Isaya ebè yó kem tau malak bè Israél

¹ Tey kamaen yóm benwu Israél, deng golu elem hatay ne. Deng menes ne yóm któtólen lómón kenes yóm bulók gel suub le bè kulu yóm tau gel malak kul, yó kem tau sónmò le gel hlengel. Tey keheklabak le. Wen tey tilob hboo gel sù le bè kulu le, okóm tódô le kem masà bè yó tey sidek klengel le, là bud le temngón.

² Ngem wen tau deng eles nélék Dwata alì kemgis mò na a mundug kul. Bè yóm kundugen kul yó, angat hol lómón ke tbó eta le yóm tey bulók kulón ne lómón ke sut yóm hol klambaden kulón bong ne lómón ke sut yóm tey dunuk mamà glumfak elem benwu.

³ Yóm alì keheklabak yó kem tau gel hlengel malak bè Israél yó, angat gotu ndà yó kem hohon le.

⁴ Yóm alì któtól le, angat hlós menes efet là bud tngónem du. Hol lómón yóm bungu koyu gna mélél, wen gna ma du mò ken ne là bud tngónem du ne.

⁵ Okóm angat kól yóm kdaw Dwata htótól yó kem dù tau tebel bè Israél, hol lómón ke du yóm bulók là menesen suub bè kulu le. Yó se nmò yóm Dwata laen dù là gbeken du.

⁶ Ne bud blayen yó kem tau malak kul yóm óyô le mit du yóm kukum tedeng. Ne benlayen klóbô se yó kem tau mentey yó kem bak tikeb yóm syudad le anì là gbek le kul yó kem hohon le.

Yóm eles udél Isaya ebè yó kem tau tugod Dwata gel hlengel

⁷ Balù yó kem tau tugod Dwata ne yó kem tau gel demsù ebè Dwata, sana gotu kegbót le hlengel se kul efet sónmò le mógów glénggé. Tey gedlug yóm gel kinum le botong le gel tlokob. Yó kem tau tugod Dwata yó, là bud gtukul le du ne ke wen tô hegfan Dwata bélê le. Ne yó kem tau gel demsù ebè Dwata, là bud gbek le kmukum du ke wen tau kmamo bélê le.

⁸ Yó kem lemisa gónó le gel myón, tódô tfeng lewól le. Balù udì ke wen gónón mólós.

⁹ Yó udél le etahu mon Isaya, “Tau du se tô toloken yóm tau yóó? Laen dù mu tekuy du yóm toloken. Yake bè yó kem ngà hanà lomi skó tmutù dé gónón tmolok.

¹⁰ Yó tô kmò ktoloken tekuy ket sotu betek, ket sotu ktol, ket sotu hennagì.”

¹¹ Duhen yó, mon Isaya, ke là móyô ye hmungol do, wen lan Dwata hdalang kuy hlanen bè yó kem tólóng tau bè dumu benwu. Bè kul udél gónó le hdalang kuy, bè yóm udél là deng tngón ye du.

¹² Yó tô blay Dwata kuy, yóm benwu gónó ye henek nô ne yóm udél hemyu nawa ye. Okóm là kô ye móyô hmungol du.

¹³ Yó se gónó Dwata tmolok kuy mlan bè ket sotu betek ne bè ket sotu ktol ne bè ket sotu hennagì. Bè yóm angat kegef le kuy sónmò ye tlokob. Ne wen tey halì ye laen kô dù lan ye gewà, yakà deng ye gotu baling tau negef.

Yóm botu mò hdeng yóm nmò Dwata bè Sayun

¹⁴ Yu kem tau heklabak malak yó kem tau bè ni bè Jirusalim, hol hnungol ye yóm udél Dwata ebélê ye.

¹⁵ Tey kehegmón ye du yóm deng keskotuk ye bè yóm hatay kun, anì là matay ye. Deng ye se skotuk yóm benwu yó kem tau deng matay kun, anì là gógów ye edu. Ofo kuy ke laen dù gmoen bélê ye yó kem tau mundug kuy. Són snalig ye yóm kéng ne sukat mò tô gónó ye gewà. Okóm là.

¹⁶ Ne ni se udél yóm Dwata hol dandónen geta gónó tekuy mogot, monen, “Wen yó kem botu alì mbegel mò gónón myón yóm beng deng suu bè Sayun mò hol hembegel du yóm Gónô angat hdau bè yó. Wen sotu botu suu bè yó mò hdengen ne wen snulatu du yóm monen, ‘Yóm tau mbegel kehtahuhen, hanayen nawahen.’

¹⁷ Yó henged btes mò hemtedeng du yóm nmou bè yó, duhen yóm ktedeng kogot le kukum yó kem tauhen ne yóm klaen dù kéng le.” Là gomongen bè nili yóm bérs 18 kól bè 29. Yó tulónen bè ni kem bérs ni yóm tulón Isaya gbak ebè yó kem kmamal bè Jirusalim. Lemwóten bè yóm kmò le kéng ne ksukat le, angat mekto kkól Dwata lem blóng le mung du yóm tey kebuten, hol lómón yóm deng nmoen bè yó kem hohon le. Okóm bè yóm kógówen ni, monen bè bérs 21, “Angat kól mò yóm hentaw ton là deng hnikót ton ye du. Angat kól mò gemlà yó kem kun tau.” Là gomongen bè nili yóm tsaptér 29. Bud htulón Dwata ke Isaya ebè yó kem tau bè Jirusalim yóm kdohò ktafaken kul, abay se deng du yóm hmohon kul. Deng lenibuten Jirusalim nan e nundug lu. Ke deng kundugen kul, ominen kendel bud mundug yó kem hohon le. Bè bérs 13-16, yó udél Dwata gbak ebè yó kem kun tau, monen, “Ni kem tau ni, mon le tauhu lu. Gel mon le tey nadat le ou, okóm olon són bè udél le, tey mayuk béléu yó dum nawa le. Angat dohò genlau lu yó kem tau gel bemnos atul béléu, yó kem tau gel bnos le yó kem sidek gel nmò le. Yó hendem ye, ‘Là kô tonen tekuy Dwata, là kem tngónen du he.’ Tey alì keheklabak ye nim yu! Igò sem Dwata yóm gel mifil ne du se yóm alì geta senta ye.” Dohò yóm keglà le ni kem tau lómón ni, ne angat dohò snéen yóm keglà yó kem hohon le.