Isaya 27 - Udél Dwata: Gna Kesfasad ne Lomi Kesfasad

¹ Bè yóm kdaw yó, wen tey sudeng mit hatay angat nogot Dwata mò tmafak yóm swaga bong boluyen Libyatan, yóm alì metlasik gel mulu hkigù ne mò hatayen yóm sotu ógóf lóbô nô lem mohin.

² Bè yóm kdaw yó, angat wen tulón Dwata gbak ebè yóm tey tonok tilob gónóhen mò hulu, yó angat monen,

³ “Tendo knudungu ni kem huluhu ni ne tendo gel tenwélu. Tódô senflósu kifu ne kemdaw mentey du anì laen dù tau hemsidek du.

⁴ Là bud lenbutu du yó kem huluhu. Ke wen tonu ngà koyu semnual duhen ke wen kluon semnual tô hemsidek du, tódô gotu ntemu lu he.

⁵ Okóm ke tô le hofin béléu yó kem tau hmohon yó kem dou tau, yake na le gna mit sefyu béléu. Tahu se, yake na le gna mit sefyu béléu.”

⁶ Angat wen kdawen tey kdolil le yó kem tau Israél, yó kem tau semfu gu bè tehe Jakub. Hol lómón tô le koyu, tey kbulók le efet lengeben klamangen benwu yó kem bungu le. Là gomongen bè nili yóm bérs 7 kól bè 13. Bè bérs 7 wen snólók Isaya. Yó snólóken, “Deng tnafak Dwata kô Israél mkél bè yóm ktafaken yó kem hohon le? Là, olon tmafak kul néen yó kem tau Israél, mò olob yó kem salà le, okóm bè yó kem hohon le gotu genlaen lu kul.” Ne angat kól yóm kdawen bud nwit Dwata lu semfulék ebè Jirusalim yó kem kun tau deng negef ebè Asirya ne ebè Idyip, angat le bud tmaba ebè Dwata ditu bè kun bulul.