Isaya 26 - Udél Dwata: Gna Kesfasad ne Lomi Kesfasad

Lingón bè kehegmò Dwata yó kem tauhen bè yó kem hohon le

¹ Angat kól yóm kdaw klingón le du yó kem tau nô bè Juda yóm lingón ni, yóm monen, Tey mbegel yóm syudad tekuy, Dwata se kemlung du mò henged beng hilolen.

² Hennas ye dé yó kem bak tikeben ne hfusek ye yó kem tau teneb klolò le ke Dwata, yó kem tau gel mò du yóm tedeng.

³ Uu se, Dwata, bemlay du yóm tahu kenek nawa bè yó kem tau hol nô bè nawa le mimón kóm, yó kem tau hol smalig béléem.

⁴ Hol snalig tekuy Dwata ne hol bê tekuy abay nmò sónen yóm ksalig tekuy du. Laen kô dù sónen snéen yóm kofinen tekuy.

⁵ Tles heglaanen yó kem tau tehe hegeta knô ne gotu genbaen yóm syudad mbegel tehe gónó le nô ne gotu lenusoken elem tonok yó kem beng hilolen.

⁶ Ni kmoen ni, tódô le mlan gu tahen yó kem tau tehe gel ndà le elaan ne gotu ndà le gu tahen.

⁷ Tey hyu, Dwata, yóm lan nmoem bè yó kem tau hyu kmò le, tey sdatal yóm lan lolò le.

⁸ Tendo gel lolò me yóm kóm kóyô bélê me, són uu yóm nefet nawa me. Laen kô dù dumu sen-galu nawa me sónen u.

⁹ Ke kifu, sónen uu hendem me. Bè yóm kdaw angat kkukumem yó kem tau te tonok, ton le béléem yóm hol kukum tedeng.

¹⁰ Balù yóm tey kganag nawahem bè yó kem tau sidek nmò le, ewenem là kô na le e dnalang du yóm tedeng. Balù bè yóm benwu yó kem tau tedeng nmò le, sana kmò le sidek. Là kô le móyô kemmón du yóm kegetahem.

¹¹ Là kô tngón kem hohonem du yóm angat ktafakem kul. Hol henyakem lu dé, Dwata, ne hol hnayamem lu. Hol hlayamem kul yóm tafak deng eles tgamahem bélê le. Ne hegfanem bè yó kem kóm tau yóm tey kbong nawahem kul.

¹² Ó Dwata, benlayem mi kehyu klowil. Tódô kdê yó kem deng gendeng me hono lemwót bè yóm któbóngem kum.

¹³ Uu se, Dwata, gónó me mogot. Deng gel nogot le mi yó kem dumu tau, okóm tek sónen uu yóm hol kum gónó mogot.

¹⁴ Deng le gotu matay ne yó kem tehe mogot kum yó, là kô le bud mowil. Là se bud le mowil yó kem lóyóf le, yakà deng tnafakem kul, deng gotu genlaem lu. Laen dù bud hemtulón kul nawa ne.

¹⁵ Deng tey kehlamangem du yóm benwu me, Dwata, deng gotu lenbétem gu hilol kililen. Bè ni se hol gónóhem megdóyón.

¹⁶ Deng tehe tnafakem mi, Dwata, mi kem tauhem. Lemwót bè yóm alì sidek kebà nawa me gónó me mni tóbóng béléem.

¹⁷ Tehe tey klangat me bè yóm nmoem bélê me, Dwata, hol lómón klangat yóm libun kmuleng blututen.

¹⁸ Ya tey sidek keglayam me du, okóm laen sem dù ngà hesut me. Là kô me gemmò bè yó kem hohon me, laen kô dù gendeng me.

¹⁹ Yó kem dumu me deng matay, angat wen kdaw le bud mowil. Bud le mulék bè sana lówó le. Kdê yó kem tau tolo nô lem lebeng le, tódô le bud mowil ne gotu le hligal semngal. Lómón yóm amù gel sminang hlafus gotu hlowilen yó kem hulu, hol lómón yó se angat nmò Dwata, angat bud hlowilen yó kem tau tehe matay là sekna.

Ktafak Dwata salà yó kem tau te tonok gel mò sidek ne kofinen yó kem tauhen

²⁰ Ó kem dou tau, husek ye elem gónô ye na ye tnikeb beng ye. Hebnos ye likót efet lembó yóm kebut Dwata.

²¹ Yakà mógówen edini Dwata lemwót gu bè yóm gónóhen nô bè longit nan e tnafak salà yó kem tau te tonok. Angat gotu hetngónen yó kem tau tehe monok là gfanen. Là bud gebnos tonok du se kun yóm tehe gónó le lembeng yó kem tau bnonok le.