Isaya 25 - Udél Dwata: Gna Kesfasad ne Lomi Kesfasad

Lingón dmóyón ke Dwata

¹ Ó Dwata, uu se yóm dou gónó mogot. Tey kadatu kóm ne tey kdóyónu kóm. Tey hentaw ton yó kem deng nmoem. Gotu dnohoem yó kem deng tehe natulem là sekna.

² Deng gotu genlaem yó kem syudad gónó le nô yó kem tau hmohon kum. Deng gotu genbaem yó kem tehe beng hdà le mò gónó le tô heklung. Yó kem gónô lembang yó kem tau hol geta bélê le deng gotu genbaem. Ne là bud wen hdà kul efet kól bè sónen.

³ Yó gónóm mon, angat tey kdóyón le kóm yó kem tau bè yó kem dumu benwu mbegel. Yó kem tau alì sidek nmò le bè yó kem dumu benwu gotu le likò kóm.

⁴ Yó kem tau élél ne yó kem tau laen dù genbeken deng le gotu mlo ebéléem ne laen kô hemen le bè yóm gel kesbeweg benwu le. Uu se gónó le heklung bè yóm lenos bong ne bud uu se gónó le e hgolung bè yóm tey sidek ékét kdaw. Yó kem tau alì hemsidek kum hol lómón ke lu yóm lenos bong

⁵ duhen ke yóm kini bong. Okóm uu, Dwata, deng gotu nmoem són le yó kem hohon me ne deng gotu tenflokem yóm gel kehtétél le yó kem tau alì hemsidek kum. Yóm nmoem bélê me yó hol lómón ke lobun hetnaw yóm tey ékét kdaw.

Yóm ken bong angat nmò Dwata

⁶ Bè yóm bulul Sayun ni, angat wen tey ken bong nmò Dwata du yóm Dwata laen dù là gbeken du. Nmoen bè yó kem kun tau bè klamangen benwu yóm ken alì tilob ne yóm ninum alì mnóm.

⁷ Ne angat tódô gotu heknasen yóm klangag lemobun eta yóm kdê tauhen bè klamangen benwu.

⁸ Ne nmoen sónen yóm hatay yóm Dwata hol dandónen geta. Tódô gotu nifuhen lewok bè mata yóm kdê le ne gotu kóhen bè yó kem tauhen bè klamangen benwu yóm gónó le gel myak. Yó se hol kun udél yóm Dwata hol gónó mogot.

⁹ Sok bangen kól du yóm yó, tódô kdéen tau gotu mon du, “Du se yóm hol kum Dwata. Sónen du yóm kum snalig ne deng lenwaen mi. Du se hol gónó me mogot ne tey bong kligal me yóm kmoen ni abay se deng lenwaen mi.” Là gomongen bè nili yóm bérs 10 kól bè 12. Yó tulónen bè ni kem bérs ni yóm ktafak Dwata yó kem tau bè benwu Muab lemwót bè yóm alì keheklabak le.