Isaya 2 - Udél Dwata: Gna Kesfasad ne Lomi Kesfasad

Yóm kenek benwu laen dù sónen

¹ Yó se udél Dwata ebè Isaya ngà Amus gbak ebè yó kem tau bè benwu Juda ne bè syudad Jirusalim, yó monen,

² Bè hulin kdaw, yóm bulul gónón mdà yóm dou Gónô alì bong muhen bè kdéen ne hol gónón kmulu yóm kdéen. Ne angat le gotu solo edu yó kem tau bè klamangen benwu.

³ Ne yó angat mon le, “Lemwót tekuy ne mneged ebè yóm bulul Dwata, hlós tekuy ebè Gónô yóm Dwata yó kem tau Israél. Angat toloken tekuy yóm kun kóyô bélê tekuy ne angat lolò tekuy yó kem lan hloloen tekuy. Abay se yóm kun tolok Dwata, bè Jirusalim gónón lemwót. Bè yó gónón gel mudél ebè yó kem kun tau, bè yóm bulul gel boluy le du Sayun.”

⁴ Angat knukum Dwata yó kem gónó le seglius yó kem benwu lembang bè klamangen benwu. Lemwót bè yóm kkukumen kul angat tódô gotu hsól le lu dadu yó kem sudeng le. Ne yó kem buyus le angat gotu hsól le lu mò suk le hemgifat hulu. Yó gónó le mò du yóm yó abay se là kô le bud sgida ne yó kem tau bè klamangen benwu. Ne là bud tolok le du bè kem tau le yóm kmò kesgida.

⁵ Duhen yó kem tau semfu gu bè tehe Jakub, hol lolò tekuy ne yóm kun layag yóm kut Dwata.

Yóm kdaw angat ktafak Dwata yó kem tau là mimón du

⁶ Ó Dwata, deng knogolem yó kem tauhem semfu gu bè Jakub abay se deng gotu lolò le yó kem dwata kéng deng dnalang le lemwót bè yó kem benwu fi dmata kdaw ne lemwót gu bè benwu Flistya. Deng gotu glolò le kul kmò yó kem tau bè tólóng benwu.

⁷ Tey wen blówón bukay le ne tahu blówón le ne là kô gsóhem du yó kem kendengen deng henyu le. Tey kudà wen bè benwu le ne là kô gsóhem du yó kem klitun gel nwit le sgida.

⁸ Ne tódô tfeng benwu le yó kem dwata lennged, gotu le tmaba ebè yó kem dwata lenbù nmò tdok le.

⁹ Yóm kdéen tau mò du yóm yó, angat le gotu mulék myak. Ó Dwata, hol béem abay hnifót lu.

¹⁰ Bè yóm kdaw ktafak Dwata kul angat le gotu hebnos bè yó kem kilib bè but yó kem léhék ne yó kem dumu gotu le mokol sol lem tonok mò tô gónó le hebnos. Tô henlóy le yóm tey sidek kebut Dwata kul. Tô henbnos le yóm tey kfasangen ne yóm tey kegetahen.

¹¹ Bè yóm kdaw yó, angat tódô gesón yóm alì kehegmón tau ne yóm alì keheklabak le. Tek són sem Dwata yóm hol geta bè yóm kdaw yó.

¹² Bè yóm kdaw yó, gotu heglaan Dwata yó kem tau alì mfasang, yó kem tau hegmón, yó kem tau hegeta knô. Yó se angat nmò yóm Dwata laen dù là gbeken du.

¹³ Angat gotu hfugónen yó kem koyu alì tahà bè benwu Libanun boluyen sidar. Hfugónen snéen yó kem koyu alì mtétél bè benwu Basan boluyen ok.

¹⁴ Angat gotu sentunalen yóm kdéen bulul geta ne yó kem bulul leneken.

¹⁵ Ne yóm kdéen gónô geta deng hdà le mò gónó le gel mentey ne yó kem beng botu alì mbegel gónó le gel heklung angat gotu hfugónen.

¹⁶ Balù yó kem kafal alì lembang alì tilob te mohin, gotu heneben.

^17-18 Bè yóm kdaw yó, angat gesón yóm kehegmón tau ne yóm kehegeta le knô. Ne yó kem dwata kéng deng gel nmò le là kô bud tonem kul ne. Tek són sem Dwata yóm hol hegeta bè yóm kdaw yó.

¹⁹ Bè yóm kdaw kkól Dwata na a kminsig klamangen tonok, yó nmò yó kem tau gotu le hebnos bè tu kem kilib bè but yó kem léhék ne yó kem dumu gotu le mokol sol lem tonok mò gónó le hebnos, tô henlóy le yóm tey sidek kebut Dwata kul. Tô henbnos le yóm tey kfasangen ne yóm tey kegetahen.

²⁰ Bè yóm kdaw yó, tódô gotu bot le yó kem dwata lennged lenbù nmò le gu bè tahu blówón ne bè blówón bukay. Tódô gbayà bè yó kem ungé ne bè yó kem kebeg.

²¹ Bè yóm kdaw kkól Dwata na a kminsig klamangen tonok, gotu le hebnos ebè yó kem sol tonok ne ebè tu kem kilib bè but yó kem léhék. Tô henlóy le yóm tey sidek kebuten kul ne tô henbnos le yóm tey kfasangen ne yóm tey kegetahen.

²² Yó gónóm mon, bê tekuy abay smalig bè tau, mahil le matay se kul. Laen dù mu te smalig kul. Là gomongen bè nili yóm tsaptér 3. Yó htulón Dwata ke Isaya yóm angat ktafak Dwata yó kem tau bè benwu Juda. Yó monen bè bérs 8, “Angat gbà Juda ne Jirusalim lemwót bè yóm alì kehnê le ke Dwata ne yóm là kimón le du. Tey le móyô mò salà mkél bè yó kem tau bè Sodom. Bà udì ke olò wen yak le. Tey angat ksideken yóm angat kól bélê le. Yóm gel kmò le sidek mit kul meglà.” Bè yóm keglà Dwata kul yó, yó udél Dwata ebè yó kem gel mimón du, monen, “Wen ofol knóón blayu kuy.” Okóm yó udélen ebè yó kem gel mò sidek, “Dohò ye meglà. Yu snéen gemwa du yóm kuy ofol. Deng ye móyón megtafak ne.” Yó kem tau tanay gónó Dwata hegnóm du yóm ktafaken kul, duhen yó kem tau gel malak bè yó kem benwu le, abay se deng mom lu yóm wen gónó le ma lemwót bè yóm kehegnok le yó kem tau élél. Yó todol gónó Dwata bud hegnóm du, duhen bè yó kem libun hton dóyón gel lemsek yó kem nes gónó le gel gbóy yó kem logi. Yóm alì sidek ktafak Dwata kul yó duhen yóm gotu kegef le kul ebè Babilun. Laen kô dù bud tebel bélê le són yóm yak le. Ne yó kem logi bè yóm syudad Jirusalim yó, gotu le matay bè gida. Là gomongen bè nili yóm tsaptér 4. Htulón Dwata ke Isaya yóm angat kól, monen bè bérs 1, “Bè yóm kdaw yó là holen dê yó kem logi tebel. Hitu libun semgled du bè yóm ket sotu logi ne yó mon le, ‘Bayaem mi myehen kóm! Tódô mi mebel mò kmò kken me ne knes me. Okóm hyu ke gel tnaba le mi mlan bè yóm kóm boluy anì là gel henlò le kum kem libun là myehen.’ ” Okóm yó sotu bud htulón Dwata ke Isaya yóm bud kehguléken klowil yó kem tau, kogol yóm kegbaen yóm benwu Juda ne Jirusalim ne khegefen yó kem tau. Yó monen bè bérs 3—5, “Tu kem kdê boluy deng snulat le, tu se yó kem tau tolo mowil kdeng yóm kegbà Jirusalim, gotu le baling tau mólós. Gotu nolob Dwata yóm kehdóyón yó kem libun bè Jirusalim. Gotu hólósen yó kem tau bè Jirusalim bè yóm gónó le là gulit. Ne kenlung Dwata Jirusalim ne gomong yó kem tau nô bè yó.”