Isaya 19 - Udél Dwata: Gna Kesfasad ne Lomi Kesfasad

Angat kehtahu le bè Dwata yó kem tau bè Idyip

¹⁶ Yó kem tau bè Idyip, angat kól yóm kdaw le lunog lómón klunog libun. Tódô setbol kkel le bè yóm tey klikò le bè yóm kegnóm le du, yóm deng kkuhay Dwata sigelen na a tmafak kul yóm Dwata laen dù là gbeken du.

¹⁷ Yó kem tau bè Idyip yó, tey klikò le yó kem tau Juda bè ket kegtulónen bè nawa le yóm angat nmò Dwata bélê le yóm Dwata laen dù là gbeken du.

¹⁸ Ke sok kól yóm kdaw yó yóm udél Hibru baling udél le bè yóm limu kem syudad bè Idyip. Yó kem tau bè yó ke mò le safà, tódô hlan le bè boluy yóm Dwata laen dù là gbeken du. Ne yó boluy le du yóm sotu bè yó kem syudad le “Syudad Kdaw.”

¹⁹ Ke sok kól yóm kdaw yó, wen mò gónó le gel demsù ebè Dwata bè yó bè Idyip ne wen botu tmahà hdà le bè kilil yóm tonok Idyip mò ilô yóm deng kehtahu le bè Dwata.

²⁰ Yó kem nmò le yó mò ilô yóm deng knóen bélê le yóm Dwata laen dù là gbeken du. Ke wen bè yó kem tau bè yó gel hen-gnok yó kem dumu tau ne ke mni le tóbóng bè Dwata, tódô wen tau hógów Dwata mò na a lemwà kul.

²¹ Tódô hegfan Dwata bè yó kem tau Idyip du se hol tahu Dwata. Omin le yó he temngón ke Dwata ne tmaba le ebéléen. Demsù le ebéléen ne wen kem dumu blay le du. Ne wen yó kem tey fasad mget nmò le béléen ne gotu nmò le yó kem fasad le du yó.

²² Tahu se, angat tnafak Dwata yó kem tau Idyip, okóm kogolen bè yó bud tnóbóngen lu. Ne beklil le ebè Dwata ne hnungol Dwata se yó kem hni le ne tnóbóngen lu.

²³ Bè yóm kdaw yó, wen tey lan lamang nmò le lemwót gu bè benwu Idyip kól bè benwu Asirya. Yó kem tau bè yóm lewu benwu tehe sfohon yó, tódô le mógów seswì bè yóm lan yó. Ne slomong le se tmaba ebè Dwata.

²⁴ Bè yóm kdaw yó yóm ngà benwu Israél, tódô senged bè benwu Idyip ne benwu Asirya yóm kbegelen ne mlan bè yóm tlu kem benwu yó gónó Dwata tmóbóng yó kem tau bè klamangen benwu.

²⁵ Ne tey któbóngen kul yóm Dwata laen dù là gbeken du yó kem benwu yó. Ne yó udélen ebélê le, monen, “Tnóbóngu yu kem tau Idyip kem dou tau. Ne tnóbóngu yu snéen kem tau Asirya kem dou tau tehe nifil. Ne bud tnóbóngu yu kem tau Israél kem dou tau tehe nélék.” Là gomongen bè nili yóm tsaptér 20 kól bè 24. Yó htulón Dwata ke Isaya bè ni kem tsaptér ni yóm kegbà benwu. Monen bè bérs 5, “Glayam yóm klamang benwu lemwót bè salà yó kem tau nô tahen, abay se deng gotu senkban le yóm kun hlolò Dwata, nulé le yó kem hlauhen ne genbà le yóm tehe kesfasad le laen tul sónen. Yó gónóm mon, megtafak tonok gomong kem tauhen. Gotu lana bélê le yóm kdéen, gotu mlób bè ofi. Là buden dê tau tebel mowil.” Okóm yó kem dù tebel yó, gotu le hemsag ne semngal bè yóm tey kligal le. Monen bè bérs 16, “Hnungol ye lu bè yóm tey kesngal le ebè Dwata lemwót bè són tonok. Hnungol ye yóm kdóyón le yóm Dwata Hol Tedeng Kmoen mlan bè kesngal le.” Monen bè tsaptér 24:21-23, “Bè yóm kdaw yó gotu tnafak Dwata yó kem gel hógówen gu bè longit deng mung ke Seitan. Bud tnafaken yó kem tau hegmón kmamal yó kem but tau talak tonok. Gotu senbungen lu ne gotu suen lu lem blanggù efet le golu elem hatay. Ominen yó myón bè yóm gónón myón kmamal bè Bulul Sayun yóm Dwata laen dù là gbeken du. Tey minggel kwiten du yóm benwu Jirusalim. Lemwót bè yóm tey ktiloben lómón ke kmanas yóm layag kdaw ne bulón.”