Isaya 14 - Udél Dwata: Gna Kesfasad ne Lomi Kesfasad

Angat bud kesfulék yó kem tau Israél tehe negef le ebè Babilun

¹ Angat bud mulék kodu Dwata kul yó kem kun tau Israél. Angat bud néléken lu mò hol kun tau nfun. Angat bud huléken lu ebè yóm sana kul benwu ne wen se kem tólóng tau angat mung menwu bélê le bè yó.

² Tey dê dumu benwu angat tmóbóng kul anì bud le gulék bè yóm benwu tehe blay Dwata kul. Ne bè yó, wen se kem dumu benwu angat baling ghesek bélê le. Ne angat tles negef yó kem tau Israél yó kem tau tehe megef kul. Ne angat tles nogot le yóm benwu tehe hemsidek kul.

Yóm kkólen bè benwu yó kem tau deng matay yóm tau hol geta bè Babilun

³ Angat henwós Dwata ta yó kem tau Israél yó kem tey dê gónó le glayam ne yó kem nmò alì blat gel hmò le kul.

⁴ Bè yóm kdaw kmoen du bélê le yóm yó, yó nmò le sendekà le yóm tau hol geta bè Babilun, yó mon le, “Deng matay ne yóm tau hol geta alì sidek baluhen. Là buden hemgnok tau ne.

⁵ Deng nmò Dwata sónen ne yóm kul kfasang yó kem tau sidek kogot le.

⁶ Lemwót bè kebut le, gel hen-gnok le yó kem tau ne laen kô dù sónen yóm kehsidek le yó kem tau bè yó kem benwu deng gled le.

⁷ Lemwót bè yóm deng katay yóm tau hol geta yó, yó gónón menek yóm klamangen benwu ne hligal le semngal yóm kdéen tau.

⁸ Balù yó kem koyu bè Libanun, gotu le hligal bè yóm deng katay yóm tau hol geta yó abay se laen dù bud mofok kul.

⁹ Yóm kdéen tau nô bè yóm benwu gónó le nô yó kem tau deng matay, deng le gotu htifes na le e hnódó yóm tau hol geta bè Babilun. Yó kem lóyóf yó kem dumu tau hol geta tehe alì mfasang te tonok, gotu le htifes se kul na a hmódó du. Btik le gu bè yóm gónó le myón kmamal.

¹⁰ Yó udél le ebéléen, mon le, ‘Dengi mkél kum ne. Laen dù bud kfasangem, senged bélê me.

¹¹ Bè yóm tehe knóem te tonok tey kadat le kóm yó kem tau, sal le gel hemglung béléem. Okóm ni, dengi nô bè benwu yó kem matay. Tódói masà lem bokung ne kem kuled glimun kóm.’ ”

¹² Ó Tau Geta bè Babilun, uu yóm tehe blotik semla, bede dengi btang gu bè longit. Tey tehe gel kegefem kul yó kem tau bè dumu benwu, okóm ni deng bot le uu te tonok.

¹³ Yó tehe atulem tói motun bè longit anì suem ta yó kem blotik hol geta yóm gónóm myón kmamal. Ofo kóm mon du ke angati myón kmamal bè yóm bulul fi bwak gónó le gel stifun yó kem dwata.

¹⁴ Yó tehe monem, “Angate nô ta yó kem lobun alì geta ne angate mkél bè yóm Dwata laen dù là gbeken du.”

¹⁵ Okóm dengi mom gefet tlaan bè yóm hol gónón nelem bè benwu yó kem tau deng matay.

¹⁶ Angat tey kehlunu le kóm yó kem tau nô bè benwu yó kem deng matay snólók le, “Ni kô yóm tau gel gmida bè klamangen benwu efet setbol kkel yó kem tau bè ket benwu?

¹⁷ Ni kô yóm tau gel gemlà yó kem syudad ne henbalingen benwu là hyu menwu du yóm klamangen? Ni kô yóm tau là hewaen kul yó kem tau knukuben ne là dog huléken kul ebè benwu le?”

¹⁸ Yó kem dumu tau hol geta deng matay, gotu le hlilil bè yóm tey tilob gónó le lembeng kul.

¹⁹ Okóm kóm, laen dù gónó le lembeng kóm. Tódô bot le lówóhem ne bè yó gónón lagas. Tódô bot le lem sol botu ne bud bot le tahem yó kem sendalù deng hnatay le bè gida, omin le lemuduk botu tahem ne tódô le kem mógów gu tahem yó kem tau.

²⁰ Lemwót bè kehsidekem du yóm kóm benwu ne lemwót bè khatayem yó kem tau nogotem, yó gónó le là hsenged du bè dumu tau hol geta yóm kebeng le kóm. Laen dù bè yó kem fes lówóhem alì sidek balu le angat mowil.

²¹ Yake nbut le ni ne hmatay kul yó kem fes lówóhem yó. Yó kem ngaen logi yóm tau hol geta yó, angat le matay lemwót bè salà yó kem tehe fù le. Laen dù bélê le baling mogot benwu, duhen ke fen hemdà syudad.

Yóm angat keglà Dwata yóm benwu Babilun

²² Yó udél yóm Dwata laen dù là gbeken du, monen, “Angat gotu genlau yóm benwu Babilun. Balù udì ke wen tebelu du. Laen dù ngà hlowilu bè yó. Laen kô dù tau mowil, bà sotu. Ou se Dwata mon du yóm ni.

²³ Henbalingu benwu hono hitok yóm benwu Babilun. Són kol angat nô bè yó. Lómón ke nkélu yóm benwu yó ne laen dù tagak du. Ou se Dwata mon du yóm ni yóm Dwata laen dù là gbeken du.”

Yóm angat keglà Dwata yó kem tau bè Asirya

²⁴ Ni se yóm fasad alì mget deng nmò Dwata yóm Dwata laen dù là gbeken du, monen, “Yóm deng eles natulu angat dohò. Yóm deng eles hendemu angat nmou.

²⁵ Yó angat nmou, genlau yó kem tau Asirya bè dou benwu Israél. Angat gotu ndau lu elaan bè yó kem dou bulul. Angat kóhu bè yó kem dou tau yóm blat alì htihang le kul yó kem tau Asirya. Angat henwósu bélê le yó kem blat tendo gel hbô le kul.

²⁶ Ni se yóm deng atulu bè klamangen benwu. Deng eles tayalu eta sigelu mò tmafak yó kem benwu hmohon do.”

²⁷ Ni se angat nmò Dwata yóm Dwata laen dù là gbeken du. Deng tayalen eta sigelen mò tmafak kul ne laen kô dù gembek hemseng du. Là gomongen bè nili yóm bérs 28 kól bè bérs 32. Yó tulónen bè ni kem bérs ni yóm gotu keglà Dwata yó kem tau Flistin. Yó gónó Dwata tmafak kul lan le mled yó kem dumu syudad bè Juda ne yóm kwit le sgida bélê le. Là gomongen bè nili yóm tsaptér 15 kól bè 18. Bè ni kem tsaptér ni, htulón Dwata ke Isaya yóm angat gotu kegbaen yóm kdê benwu hmohon yó kem kun tau Israél, duhen Muab, Damaskus, Ityupya, Idyip, Babilun, Idom, ne Arabya ne Tayal. Balù Israél ne Jirusalim bud homong tnafaken. Mon Dwata mò kul bè tsaptér 22, bérs 12-14, yóm Dwata laen dù là gbeken du, “Gotu ye dmumu mkik ne langag. Hetbulud ye bè yóm klangag ye bè salà ne gotu ye lemsek nes sakù mò gónó ye hton yóm kehegsel ye.” Okóm deng ye mom gotu madal ne segwas. Hmatay ye kem ógóf mò dsù ye, hligal ye mutón ne hlengel minum. Mon ye, “Hol tekuy hligal mken ne minum abay se haya gotu tekuy matay.” Yóm Dwata laen dù là gbeken du deng hetnef du dou ni kem salà ye ni, là bud hnifóten du efet kól bè yóm kdaw katay ye. Yó se yóm kkukum Dwata yóm Dwata laen dù là gbeken du.