Isaya 11 - Udél Dwata: Gna Kesfasad ne Lomi Kesfasad

Kenek nawa yó kem tau bè yóm benwu nogot Dwata

¹ Yóm kun kesfu tehe Dabid hol lómón yóm koyu deng nofok. Okóm yóm tuhoden bud wen lomi uléken. Hol lómón se yó ne ke Dabid, angat wen bud lomi tau hol geta semfu gu béléen.

² Yóm tau monu yó, angat tey kbeyenen béléen yóm Tulus Dwata. Yó se gónón lemwót yóm khulungen hedem ne yóm khulungen mit yó kem tau nogoten. Angat tngónen yóm kun kóyô Dwata ne angat wen klikoen mulé du.

³ Wen tey kligalen bè yóm kimónen du. Là kô kendel knukumen du yóm tau ke lemwót bè yóm olo tonen ta, duhen ke lemwót bè yóm olo tulón dumu tau.

⁴ Tey tedeng kkukumen kul yó kem tau élél ne nfihen yó kem tau laen dù genbek le. Lemwót bè kun udél gónó le megtafak yó kem tau hemsidek kul ne gónó le matay yó kem tau sidek nmò le.

⁵ Sal hlanen bè ktedengen ne bè ktahuhen yóm kogoten tau.

⁶ Bè yóm benwu nogoten yó, angat le gotu tódô segbót yó kem ógóf lóbô lem bnes yó kem ubiha. Yó kem ógóf lóbô boluyen lipard tódô mingum kesdulil le bè yó kem ngà kambing. Ne yó kem ngà safì tódô mingum keslomong le bè yó kem liyun. Ne kem ngà lemnek se fen semgifà kul.

⁷ Angat le slomong mken yó kem safì ne yó kem ógóf lóbô boluyen bér. Ne tódô le sedulil yó kem ngà le, là kô le sfatay. Angat le tódô mótób yó kem liyun hol lómón kul kótób yó kem safì.

⁸ Balù yóm ngà là dengen hulung mógów, laen kô tódô du anien ke segewas klohok yóm ulal alì malas.

⁹ Bè yóm bulul Sayun yó yóm kun bulul Dwata, là kô wen tonem fen hemsidek bè yó, tódô hono hyu kdéen. Bè klamang yóm benwu yó, laen kô dù tau tonem là temngón ke Dwata. Yóm ketngón le ke Dwata tódô lengeben yóm klamang benwu le, hol lómón yóm mohin tódô tfeng él. Là gomongen bè nili yóm bérs 10 kól bè 16. Yó htulón Dwata ke Isaya bè ni kem bérs ni, yóm kmoen bè yóm kdaw deng monen yó koni, yóm gotu bud kógów yóm kdéen but tau talak tonok ebè yóm ból tehe Dabid, duhen yó yóm Misaya, yakà teyen knóón yóm kun benwu. Yó monen bè bérs 11-13, “Bè yóm kdaw yó, ni se yóm gewuhen dulék bud kehfulék Dwata ebè benwu le yó kem tau dù tebel. Gotu bud sentifunen lu yó kem tau Juda deng sekla ebè són tonok. Ominen yó he tódô lana yóm ksélés nawa yó kem tau Israél ne yó kem tau Juda. Là bud le sfatay ne honon lu. Gotu senlomong le yóm kdê sendalù le,” ne gotu nundug le yó kem benwu lenwóten fi dmata kdaw kól desdef. Gotu nwa le kdê kem tonok bè yó kem tau bè Idom ne Muab ne Amun.