Isaya 10 - Udél Dwata: Gna Kesfasad ne Lomi Kesfasad

Yóm angat ktafak Dwata yó kem tau Israél

¹ Deng ye golu elem hatay ne kem tau Israél. Là kóen tedeng yóm kukum nmò ye. Hono kukum hemgnok yó kem dou tau.

² Yóm nmò ye yó mò lan ye hemseng yó kem tau élél anì laen dù kwalis le lemwót bè klaen dù kukum tedeng lem blóng le. Yó se mò lan ye gemwa yó kem kimu yó kem libun bolu ne yó kem ngà hikit.

³ Tedu se kmò ye du du bè yóm angat ktafak Dwata kuy? Tedu tô kmò ye du du yóm kwen glumfak bong angat hwiten ebélê ye lemwót bè dumu benwu mayuk? Gónó ye e tô mlóy mni tóbóng du? Gónó ye e tô bemnos du du yóm tey kendengen ye?

⁴ Yó angat gfà ye, wen se bélê ye matay bè gida ne wen se bélê ye negef le. Baluen se ke lómón yó gfà ye, là kóen deng teflok he yóm kebut Dwata kuy. Sana tolo kuhayen sigelen tmafak kuy.

Kehlan Dwata du bè yóm tau hol geta bè Asirya yóm ktafaken yó kem tau Israél

⁵ Yó udél Dwata, monen, “Yó kmou yó kem tau Asirya, hol lómón ke bogul kulóngu mò bogulu yó kem dou tau Israél lenbutu.

⁶ Hógówu Asirya mò na a mundug yó kem benwu laen dù bud klikò le do, yó kem tau alì hebut do. Hógówu lu mò na a megef ne mò na a mnagaw ne mò mdà kul elaan yó kem tau yó. Yó kmò le kul, hol lómón ke hitok bè lan.”

⁷ Okóm yóm tau hol geta bè Asirya yó, deng eles wen tey sidek atulen se kun. Yó atulen, gotu tô genlaen yó kem dumu benwu.

⁸ Yó udélen heklabak, monen, “Ket tau malak yó kem sendaluu, tey kfasang le lómón ke tau le geta.

⁹ Denge gemmò bè yó kem syudad Kalnu ne Karkimis ne Hamat ne Arpad. Denge gemmò bè yó kem syudad Samarya ne Damaskus snéen.

¹⁰ Gotu tnafaku yó kem benwu wen tau tmaba ebè yó kem dwata lenbù nmò nô du. Tey wen yóm kul dwata lenbù nmò senta yóm dwata kul lenbù nmò yó kem tau bè Jirusalim ne Samarya.

¹¹ Deng gotu genbau Samarya mung du yóm kdê dwata lenbù nmò le bè yó. Senged snéen yóm angat nmou bè Jirusalim ne bè yó kem dwata lenbù nmò gel tnaba le bè yó.”

¹² Okóm yó udél Dwata, monen, “Sok deng yóm nmou bè yó kem dou tau bè bulul Sayun ne bè Jirusalim, angat tnafaku yóm tau hol geta bè Asirya bè yóm alì keheklabaken ne kehegetahen.”

¹³ Yó bud udélen heklabak yóm tau hol geta bè yóm benwu Asirya, monen, “Tek són ou se mò du yóm kdéen ni. Teye kemgis yóm ou ne teye temngón ne teye hulung mò atul. Deng gotu gwahu ne yó kem dumu benwu, laen kô dù bud mdengen blóng le ne deng gotu dou kdéen. Deng gotu gwahu yó kem deng tô sentifun le mò lowil le. Lómón ke ou yóm safì tudu deng gotu ndau lu laan yó kem tau menwu bè yó.

¹⁴ Yóm kdéen benwu talak tonok, hol lómón ke sala onuk koyu kmò le ne tey mahil ma du yó kem ngà onuk lenbotù nô lemen. Lómón yó se klahilu ma du yó kem kendengen bè yó kem benwu monu yó. Balù sotu ke wen kemfa ebéléu ke mò tô gónóhu likò, duhen ke kemyik ebéléu.”

¹⁵ Okóm yó bud udél Dwata, monen, “Gbek yóm beyung kô hegeta bè yóm tau mogot du? Ne yóm legadì, bong muhen kô kun senta yóm tau lemgadì? Ne yóm bogul, gbeken kô kmayang yóm tau mogot du? Là kô yó du. Kaem tau dé kmayang yóm bogul.”

¹⁶ Yó angat nmò yóm Dwata laen dù là gbeken du, angat wen des hwiten ebè yó kem tau mabù tilob kken le mò tmafak kul. Hol lómón ke wen ofi senflós mken lem lówó le.

¹⁷ Yóm Dwata kul layag yó kem tau Israél, du se angat baling ofi. Tódô dmilóf yóm Dwata yó kem tau Israél yóm Dwata laen kô dù belenen. Tek sendawen mken du yóm kdéen. Balù yó kem alì semnual gotu mlób.

¹⁸ Gotu mlób snéen yóm tey dlag lamang alì tilob ne yó kem tey tilob gónó mò hulu. Yóm alì klóben yó, hol lómón yó se kmò yóm des hmatay tau.

¹⁹ Angat là holen bud wen koyu tebel bè yóm benwu yó, balù ngà gbeken msó kul.

Angat wen he bè yó kem tau Israél bud semfulék

²⁰ Angat wen kdawen yó kem dù mowil bè yó kem tau Israél, là bud snalig le du ne yóm benwu Asirya mò tmóbóng kul, yóm benwu tehe gemlà kul. Són Dwata ne hol tahu snalig le yóm kul Dwata laen dù belenen.

²¹ Angat wen he bè yó kem tau Israél bud semfulék ebè yóm kul Dwata laen dù là gbeken du yó.

²² Balù yóm tey kwen yó kem tau Israél nim kmoen ni, lómón kwen le helek bè kilil mohin, okóm là kóen hol wen bélê le bud gesfulék. Angat le gotu meglà yó kem dumu tau Israél ne yó se yóm hol knóón bélê le.

²³ Tahu se, angat genlà Dwata yóm klamangen benwu le, yóm Dwata laen dù là gbeken du yóm hol dandónen geta gónó le mogot. Yó se yóm tehe monen mò kul. Là gomongen bè nili yóm bérs 24 kól bè bérs 34. Yó tulónen yóm kehtugod Dwata ke Isaya ebè yó kem tau dù tebel bud mulék ebè Dwata. Monen mò kul bê le abay likò bè yó kem tau Asirya ke hen-gnok le yu. Là legenen se yó abay se tódô Dwata yóm mógów mò gemlà kul. Mon Isaya bè bérs 33-34, Okóm tenngel ye, nofok yóm Dwata laen dù là gbeken du yóm koyu mtétél. Gotu genlaen yó kem tey sendalù wen bè Asirya, yó kem genlal bélê le ne yó kem gónó le kmulu. Yó kmò yóm Dwata laen dù là gbeken du, yó kem hohonen gotu nofoken lu lómón yóm beyung mofok yó kem koyu dlag bè Libanun.