Isaya 1 - Udél Dwata: Gna Kesfasad ne Lomi Kesfasad

¹ Nim bok ni gónón nô yóm tehe udél Dwata htugoden ke Isaya ngà Amus. Yóm nô lemen hol gbak ebè yó kem tau menwu bè benwu Juda ne bè syudad Jirusalim. Dê dulék Dwata mudél ebélê le hlanen bè Isaya, nbuten bè yóm tehe kogot Usiya kul efet kól bè yóm kdaw kul kogot benwu le Jutam ne Ahas ne Hisikaya. Hono kem tau hol geta tehe stufì mogot yóm benwu Juda.

Kudél Dwata yó kem tauhen

² Ni se udél Dwata ebélê le yóm Dwata hol gónó mogot, monen, “Ó Tonok, Ó Longit, hnungol ye o dé. Yó kem ngà tehe hbongu deng mom knogol le o.

³ Mom hyu he yó kem safì gotu tngón le yóm fun le. Senged se yó kem kudà gotu tngón le yóm gónón hemken kul yóm kul fun. Bede yó kem dou tau Israél là kô tngón le du kul. Bà udì ke glileb le yóm deng nmou bélê le.”

⁴ Yu kem tau Israél, deng ye golu elem hatay ne yóm kdê ye lemwót bè yóm alì kmò ye sidek. Laen kô dù hyu du yóm gel nmò ye. Deng bong blat yóm salà nô ta ye. Deng mom kenbê ye yóm gónó ye mogot yóm Dwata yó kem tau Israél ne yóm Dwata laen dù belenen. Deng mom knogol ye ne.

⁵ Moen de ke tendo gel knogol ye Dwata? Móyô ye bud tnafak kô? Tey kem tau Israél, bè ktonu kuy lómón ke deng tfeng halì kulu ye. Là buden hyu knawa ye ne kehedem ye.

⁶ Tódô lenwóten bè kulu ye efet kól bè ti ye laen kô hyu du. Tódô hono lebened ne hono mgas ne hono halì. Bà udì ke olò wen hemgifat du, duhen ke wen mulung du, duhen ke wen hmunges du.

⁷ Yóm klamangen benwu ye deng gotu genbà yó kem hohon ye. Ne yó kem syudad gónó ye tehe nô deng gotu ntem le. Igò ye temngel, tódô nled yó kem tólóng tau yóm tonok ye ne gotu hensidek le yóm kdéen nô tahen.

⁸ Tek són Jirusalim dù tebel yóm syudad deng tódô kem senibut le ne laen dù lan ye mofin du. Lómón tô yóm lowig gónó ye nô igò ye mentey yó kem hulu ye, laen kô dù bang kmò kofin ye du.

⁹ Ke là lemwóten bè Dwata yóm Dwata laen dù là gbeken du, deng gotu genbà le ne Jirusalim, balù udì ke wen dù tebel du hol lómón yóm tehe kegbà yó kem syudad Sodom ne Gomora.

¹⁰ Ó Jirusalim, yó kem tau mogot kóm ne yó kem tauhem deng le mkél bè kul alì ksidek nmò yó kem tau tehe menwu bè Sodom ne Gomora. Hol hnungol ye dé yóm kdê ye yóm udél Dwata ebélê ye. Hol kenmón ye dé yóm hdalangen kuy.

¹¹ Yó udélen ebélê ye, monen, “Ofo kuy mon du ke móyóe du yó kem gel dsù ye ebéléu. Kaem là. Denge tmakas du ne yó kem ubiha gel hkekeb ye ebéléu ne yó kem dumu ógóf mabù gel dsù ye. Denge tey tmakas snéen bè yóm litô safì tudu ne ubiha ne kambing gel dsù ye.

¹² Tau du de hedsù du kuy kdê yó kem yó bè yóm gel ktaba ye ebéléu? Tau du de alì mdók kuy segewók mógów lem yóm dou Gónô?

¹³ Laen kô dù ofol ye du yó kem gel nwit ye ebéléu yó. Tey keklitu du yóm insinsu gel ntem ye gel hboo ye ebéléu. Ne tey kekbéu du snéen yóm gel kestifun ye tmaba ebéléu bè ksut yóm Lomi Bulón ne bè yó kem Kdaw Kehegnô ne bè yó kem dumu kdaw ye gel stifun tmaba ebéléu. Yó gónóhu kembê du yóm kdéen ni abay se là kô tenflok ye du yóm kmò ye sidek.

¹⁴ Tey kkutó nawahu du yóm gel kestifun ye yó. Hol lómón ke deng hbô ye do yóm tey blat ne là bud gehbalahu du.

¹⁵ Ke sok gel hdà ye hólól ye bè yóm gel kni ye ebéléu, là kô kenmónu kuy. Balù hilu dulék ye mni ebéléu, là kô naw e hnungol kuy, yakà hónô litô tau deng bnonok ye lem yóm hólól hdà ye.

¹⁶ Hol ye molob dé anì mólós ye. Hol tenflok ye ne yóm sidek gel tonu bélê ye. Hol kó ye ne yóm sidek gel nmò ye

¹⁷ ne hol dnalang ye mò du yóm hyu. Hotu ye gel ye mit du yóm kukum tedeng. Tnóbóng ye yó kem tau gel ndà le elaan. Ne nfi ye yó kem ngà hikit anì guta le yóm kul ólól. Senged se yó kem libun bolu, hol nfi ye lu.”

¹⁸ Bud mon Dwata, “Hendeng tekuy ne yóm sentulón tekuy. Deng tódô hitem ktonu kuy lemwót bè yó kem salà ye, okóm angat nolobu yu anì baling ye hol mólós. Anien he ke lómón khitemen using kuleng yóm salà ye, bè yóm kolobu kuy hol lómón kbukay ye yóm snu.

¹⁹ Ke nimón ye ou angat hyu yóm guta ye bè tonok ye anì tendo wen gel ken ye.

²⁰ Okóm ke là nimón ye dou angat ye matay bè suk. Ou se Dwata nim mudél ni yóm Dwata hol gónó mogot.”

Jirusalim yóm syudad hol gónón smala yóm kdéen sidek

²¹ Tehe yu ekni tey le teneb lemolò ke Dwata yó kem tau menwu bè Jirusalim. Okóm là ne ni, deng tey dê dwata kéng lolò le, hol le mkél bè yóm libun hdóyón. Yó kem tau tehe menwu bè yó hono kem tau tedeng knawa le. Okóm ni, són tau monok tebel du.

²² O Jirusalim, hol lómón ke tehehi blówón bukay. Okóm ni, laen dù bud muhem. Tehehi mkél bè yóm ninum alì mnóm. Okóm ni, lómón ke dengi baling ninum nbol él.

²³ Yó kem tau malak kóm hono tau kmogol ke Dwata, swè le bè yó kem tau mnagaw. Sal gel henmóyô le yóm filak gel blay le kul mò wa nawa le dalang se yó kem dumu gel blay le kul. Ke wen senkukum le, là kô nfi le kul yó kem ngà hikit ne là kô hnungol le du ke wen klamo yó kem libun bolu.

²⁴ Duhen yó, hol hnungol ye yóm udél yóm Dwata hol gónó mogot yóm Dwata laen dù là gbeken du, yóm Dwata kem tau Israél yóm alì mfasang. Yó monen, “Angat bnelesu yu, yu kem tau deng hmohon do ne là bud gehlala ye do ne.

²⁵ Bnalau ne yó kem sidek gel nmò ye. Yó kmou kuy hol lómón yóm tau gel tmógó blówón anì mkó yóm bolen. Lómón yó se yóm angat nmou bélê ye anì gotu mkó yóm bolen sidek yóm gel tonu bélê ye.

²⁶ Angat wen he kem tau tedeng knawa le bud blayu kuy mò malak kuy ne mò hmau kuy, hol lómón yó kem tau gna tehe gel malak kuy. Ne ominen yó he angat bud taba le yóm syudad Jirusalim, Benwu Tedeng Knawa Kem Tauhen, ne Benwu Teneb Klolò Le ke Dwata.”

²⁷ Lemwót bè yóm tey ktedeng nawa Dwata, yó gónón angat lemwà yóm syudad Jirusalim bè yó kem hohonen ne gomong lenwaen yóm kdéen tau deng hegsel nô lemen.

²⁸ Okóm kdê yó kem tau mò sidek, yó kem tau kmogol du angat gotu hfatayen lu.

²⁹ Angat tey sidek khuli sel ye lemwót bè yóm gel ktaba ye bè yó kem koyu ne lemwót bè yóm dê hulu ye hilolen deng hetfing ye bè yó kem dwata kéng gel tnaba ye.

³⁰ Lemwót bè yóm nmò ye yó angat ye tódô menes, mkél ye bè kenes yóm koyu móyón matay, mkél ye bè yó kem hulu laen dù temwél du.

³¹ Yóm bnes ke deng hol mékéng, balù olon kutu ofi mógów edu sana ketomen. Hol lómón yó se kmò keglà le yó kem tau wen kfasangen nim kmoen ni. Tódô lemwót bè kul ksidek nmò gónó le meglà. Ne laen kô dù tau gembek hemseng du bélê le yóm keglà le.