Husiya 5 - Udél Dwata: Gna Kesfasad ne Lomi Kesfasad

Angat ktafak Dwata yó kem tau malak bè Israél ne yó kem tau nalak le

¹ “Ni hol hnungol ye, yu kem tau gel blóng ebè Dwata dalang se yóm kdéen tau Israél. Henklingu ye se kuy, kdê yó kem tau tbong tau hol geta hol hnungol ye yóm ukumu kuy ni. Deng ye megtuled ne yóm kdê ye lan ye mit kul gholot tmaba ebè yó kem dwata kéng ditu bè benwu Mispa ne bè benwu Tabur yó kem dumu ye tau Israél.

² Deng wen tey sol nelem nokol ye ditu bè Akasya mò alu ye kul. Okóm hol bê ye abay klifót, angat gotu tafaku kuy yóm kdê yó kem deng nmò ye.

³ Ó kem tau Israél, gotu tngónu yóm kmò ye laen dù gebnos béléu. Deng ye mkél bè yóm libun hdóyón tnagaken yehenen. Deng ye gholu ne kem tau Israél.

⁴ Yó kem sidek tendo gel nmò ye, yó se gel hemseng kuy mulék ebè yóm kuy Dwata. Yóm nawa ye, hol lómón ke nawa yóm libun hdóyón, là bud tngón ye du ne yóm sana kuy Dwata hol gónó mogot.

⁵ Yó deng temksì kul yó kem tau Israél, duhen yóm alì keheklabak le. Gotu le tlokob lemwót bè keblat yó kem salà nbô le. Balù Juda, angat mung tlokob bélê le.

⁶ Nwit le kem ubiha ne kem safì mò dsù le ebè Dwata, okóm deng mom gtufì. Là bud ton le ke Dwata ne, deng tnagaken lu.

⁷ Abay se là kô le henek bè Dwata. Là kô ke Dwata du funen yó kem ngà le, tódô ngà le hkawang. Duhen ni, lemwót bè yóm ktaba le ebè dwata kéng gónó le meglà, gomong tonok le.

⁸ Hgel ye mféw bè benwu Gibya abay se wen gida sut. Bud senged se bè Rama ne bè Bét-abén. Hol tenngel ye tekwang ye, kem sendalù lemwót bè ból Bindyamin.

⁹ Là hewum du kem tau Israél, kesok kól yóm kdaw ktafaku kóm, angat ye meglà.

¹⁰ Yó kem tau malak bè Juda, hol le mkél bè yó kem tau gel mili yóm ilô bè blóng tonok. Yó gónóm mon, koku eta le yóm lebutu kul lómón ksut yóm tey dunuk.

¹¹ Yó kem tau Israél, angat le gotu meglà kesok nukumu lu abay se són nô bè nawa le tmaba ebè yó kem dwata kéng.

¹² Angat genlau yó kem tau Israél, lómón ksék yó kem kuled yóm ógóf deng matay, ne gomong genlau yó kem tau bè Juda, lómon ke lemdak yóm onuk deng matay knuled.

¹³ Bè yóm kton kem tau Israél du yóm alì kwen des le ne ton yó kem tau bè Juda yóm alì kwen halì le, lemwót Israél mógów ebè benwu Asirya ebè yóm tau hol geta bè yó tô htóbóng béléen. Okóm laen se bang tóbóngen mò bulungen kul.

¹⁴ Angat gotu nmou bè yó kem tau Israél ne yó kem tau bè Juda yóm gel nmò liyun. Ou se tódô msék kul. Sok dyolu lu mayuk, laen kô gembek lemwà kul.

¹⁵ Ominu semfulék ebè yóm dou gónó nô ne tódô bayau lu efet dilô le yóm kegsalà le. Ke deng sidek keglayam le angat bud hnebel le o, ne bud le htóbóng béléu.”