Husiya 4 - Udél Dwata: Gna Kesfasad ne Lomi Kesfasad

Yóm kduón Dwata yó kem tau Israél

¹ Ó kem tau Israél, hol hnungol ye udél yóm sana Dwata hol gónó mogot. Deng wen duónen kuy yóm kdê ye nô lem yóm kuy benwu ni, monen, “Là teneb ye béléu, laen dù kesbong nawa nô bélê ye ne laen dù bélê ye deng temngón do bè benwu ye.

² Gel ye hemmulà ne mò kéng ne monok, lel ye mnagaw ne mdà yehen. Tendo wen sfatay bè klamang benwu ye ne tódô sogot tau sbonok.

³ Yó se but gónón laen dù bud kligal yóm tonok ye, gónón là bud tembas. Yóm kdéen tau mowil tahen, hono wen des hlós hatay le. Balù yó kem ógóf lem bnes ne kem onuk koyu ne kem utón él, deng nbut le hlana.”

⁴ Bud mon Dwata, “Bè yóm keglà ye ni, bê ye abay sduón, bê ye abay setdok. Ngem, yu se kem tau gel blóng ebéléu yóm dnuónu ni.

⁵ Yó tafaku kuy, tendo ye tlokob kemdaw lómón yóm gel ketlokob ye ke kifu ne gotu le gomong tlokob bélê ye yó kem tugodu. Angat genlau Israél yóm yê ye.

⁶ Yó gónó le gotu meglà yó kem tauhu abay se là kô tngón le do. Kuy salà se yó yu kem tau gel blóng ebéléu, abay se deng mom yu kembê do. Duhen ni, kenbéu yu se kuy ke tô ye bud semblóng tau ebéléu. Lemwót bè yóm deng kekbê ye yó kem hlauhu kuy, angat bud kenbéu lu se do yó kem ngà ye.

⁷ Ke henwenen temnù kwen yó kem tau gel semblóng tau ebéléu, henwenen se temnù yóm tendo kegsalà le béléu. Yóm tehe kegdóyón ye bè yóm klolò ye do, deng mom tles ye du yóm kyak ye lan ye lemolò yó kem dwata kéng.

⁸ Yó gónó le gel ma ken le yó kem tau gel blóng ebéléu ke sok le gemsalà yó kem tau abay se gel le mit ebélê le yóm dsù mò hkó salà le. Yó gónóm mon tey le hligal yó kem tau gel blóng ebéléu ke gemsalà yó kem tau.

⁹ Yóm ktafaku yó kem tau gemsalà, bud lómón yó se ktafaku yó kem tau gel blóng ebéléu. Gotu hbayadu kul yó kem sidek gel nmò le.

¹⁰ Yó kmò ktafaku kul, igò le se mken, deng le mom bitil. Igò le se smamuk bè yóm ktaba le ebè Baal, là sem wen ngà le abay se monem deng knogol le yóm sana kul Dwata hol gónó mogot lan le tmaba ebè yó kem dumu dwata.

¹¹ Là bud le hulung hedem ne yó kem dou tau lan le tendo gel minum ninum lóbô ne lan le tendo smamuk.

¹² Deng le mom smólók bè yó kem dwata lennged nmò le bè koyu, mò tmulón du kul yóm tô nmò le. Ofo kul mon du ke gbek yóm koyu tmulón du kul yóm angat kmoen elem hulin kdaw. Mlan bè kehdeen le yó kem dwata kéng gónó le deng mom tlas. Hol le mkél bè yóm libun hdóyón abay se deng le mung bè yó kem dwata kéng ne deng knogol le yóm sana kul Dwata.

¹³ Deng le mom demsù ebè yó kem dwata kéng gu ta yó kem bulul. Mneged le eta yó kem bulul lemnek na le e mtem insinsu laan yó kem koyu alì lemimbà hangahen abay se tilob gónó hgolung laan le. Yó se gónó le baling libun hdóyón Baal yó kem ngà ye libun ne gónó le baling smamuk yó kem towu ye libun.

¹⁴ Okóm là kô naw e tnafak kul abay se yu kem logi yóm hol tahu smamuk, gel mit kul yó kem libun hdóyón Baal yó bè yóm gel kedsù ye ebè yó kem dwata kéng. Angat ye gotu meglà, yu kem tau là hulung hedem.

¹⁵ Balù yó ne yóm benwu Israél lómón ke libun hdóyón, là teneben béléu, olon se benwu Juda ne ke hol béen abay gbót mò du kun yóm yó. Bê ye abay mógów ebè Gilgal bè benwu Israél duhen ke bè Bét-abén ke tô tnaba ye o bè yó. Ne bê ye abay gbót smafà ditu ke mon ye, ‘Mlan bè boluy yóm Dwata mowil’ abay se olon te kulit yóm nmò le yó.

¹⁶ Tey mgel kulu le yó kem tau Israél, mkél le bè yóm ngà safì tolo nungel. Angat tódô bayau lu ditu bè gónó le mótób. Angat le mkél bè yó kem ngà ubiha tódô mótób bè gónón lamang bnes ne laen dù mofin kul bè yó kem hohon le.

¹⁷ Deng le tahu gfét bè yó kem dwata kéng yó kem tau Israél. Tódô bayà ye lu ne, hol bê ye abay gbót bè yóm nmò le.

¹⁸ Yó gel nmò yó kem tau Israél, ke deng gotu deng kinum le, timu óyô le mebel libun mò snamuk le. Mom nóyô le yóm gónó le myak senta ke nadat tau lu.

¹⁹ Yó gónón gotu myuf kul yóm lenos bong alì kemgis. Angat tey sidek kyak le ke bud gbel bè nawa le yóm tehe gel kedsù le ebè yó kem dwata kéng.”