Husiya 2 - Udél Dwata: Gna Kesfasad ne Lomi Kesfasad

¹ “Bè yóm kdaw yó, yó angat taba ye yó kem dumu ye setwoli logi Lo-ammi, ‘Dou tau.’ Ne yó angat taba ye yó kem dumu ye setwoli libun Lo-ruhama ‘Yó kem kenbong nawahu.’ ”

Kdà Gumér ke Husiya

² “Okóm ni, kem ngau hol ye hkodu bè yê ye, abay se là bud yehenu du ne là se bud yehenen do se kun. Henkodu ye béléen anì olò tenfloken yóm tendo kehdóyónen. Olò kóhen ne yóm dê suen lem uyóhen dalang se yóm nes hemyak knô gel leseken.

³ Ke là mimónen, tódô gotu kóhu nesen anì tódô mógów laen dù nes lómón yóm hanà ksuten. Tódô tebelu anì heskélu bè yóm benwu là hyu menwu du yóm klowilen ne angat hlós matay bè kleengen.

⁴ Ne yó kem ngaen, là kô kenbong nawahu kul abay se hono le kem ngà gu laan, là dou ngà du.

⁵ Abay se yóm yê le, libun hdóyón deng tódô mlutut hkawang, laen kô dog yaken. Yó tehe gel monen, ‘Mebele kem logi hemdóyón do, hbaluu knóu bélê le mò lanu bè kkenu ne bè kinumu, ne bè knesu yó kem nes mfól ne nes bukay mebtes ne mò lanu bè hnolo ulib.’

⁶ Okóm yó kmou du yóm libun yó, labatu du yóm alì semnual, nmou sengen anì là bud tonen du lanen.

⁷ Ke sok tô bud mlóy kemtes yó kem logi tehe gónóhen mung, là kô bud gafiten kul. Tey tô kebelen kul, okóm là bud tonen kul. Ominen angat mon du, ‘Tumù nawaw bud mulék ebè tum sana dou yehen abay se hyu klowilu bè yóm kdaw yó, olo yóm kmou ni.’

⁸ Là kô dog hendemen du yóm libun yó ou se gónóhen gu lemwót yóm halayen ne tifas grépen ne hnolo uliben dalang se yó kem tey blówón bukayen ne yó kem tahu blówón gel blayen ke sok tmaba ebè Baal.

⁹ Yó gónóm mon bud nwahu yóm halay ne tifas grép tehe gel blayu du ket halay. Bud nwahu snéen yóm nes nmoen gu bè bul ubiha ne yóm nes bukay alì mebtes tehe gel blayu du mò nesen.

¹⁰ Angat tódô hdau là lemwék bè gónón wen, igò le temngel du yó kem tehe gel hemdóyón du. Ne laen kô bang tô gembek lemwà du lem tdoku.

¹¹ Angat nmou sónen yóm kdê kestifun gel nmoen, yóm gel kehligalen ket halay, yóm gel kehligalen ket bulón bè yóm ksut yóm lomi bulón ne yóm gel kehligalen ket fedyan bè Kdaw Kehegnô kkólen bè yó kem dumu kdawen gel hligal, angat lensónu.

¹² Angat gotu hensideku yó kem gónóhen gel mulu grép ne gónón mulu fig, yóm gel monen bayad le du yó kem hemdóyón du. Angat gotu henbalingu bnes mget yóm kdéen ne són kem ógóf lóbô lem bnes mótób du.

¹³ Angat tnafaku bè yóm deng kehtulahen do lanen gel mtem insinsu ebè Baal ne gel leketen yó kem ngom blówónen, ominen mebel kem logi hemdóyón du,” udél yóm sana Dwata hol gónó mogot.

Kbong nawa Dwata yó kem tauhen Israél balù yóm là kimón le du

¹⁴ Yó bud udél Dwata, monen, “Okóm ni, naw bud n-goy sulék, nwitu etu bè yóm benwu là hyu menwu du, naw bud hninggel stulón du.

¹⁵ Ke deng semfulék ebéléu, angat bud huléku ebéléen yó kem tehe gónón mulu grép. Ne yóm benwu boluy le du Datal Gónô Glayam, angat henbalingu benwu gónón lemwót yóm kwen nefet nawahen. Bè yó angat gónón bud semfulék ebéléu lómón yóm tehe nmoen bè yóm hanà kegenen lomi libun bè yóm tehe kehewau du gu bè Idyip.”

¹⁶ Bud mon Dwata, “Ó kem tau Israél bè yóm kdaw yó, yó angat bud taba ye do ‘tuha logihu.’ Là bud tnaba ye do ‘ogotu.’

¹⁷ Là bud htóngu du bè sumóng ye ne yó kem kun boluy Baal ne là se bud bnoluy ye kul ne.

¹⁸ Bè yóm kdaw yó angat wen senfasad me yó kem ógóf lóbô liwà lem bnes ne yó kem onuk koyu ne kdéen mowil manaf talak tonok anì là hensidek le kuy. Bè yóm kuy benwu yó, gotu kóhu bè yó, yó kem ngom sfatay, kdê yó kem sudeng ne kem hanak, abay se laen dù bud gida bè benwu ye, anì yó tódô ye henek laen dù hemen ye.

¹⁹ Ó Israél, uu se nmou mò yehenu laen kô dù tul sónen. Nmou bélê ye yóm hono tedeng, mung du yóm kbong nawahu kuy ne yóm kkoduhu kuy.

²⁰ Htenebe bélê ye, nmou yu mò hol dou nfun ne angat tódô henmung tngón ye ou yóm sana kuy Dwata hol gónó mogot.”

²¹ Bud mudél Dwata, monen, “Bè yóm kdaw yó bnalau yóm kni longit béléu lobun anì kmulón mò balà longit yóm kni tonok béléen.

²² Ne yóm tonok, hnéféen yó kem halay ne yó kem grép ne yó kem koyu ulib alì sidek kékéngen mò balaen yóm kni le béléen. Tódô gungolem yóm tey kesegeng le semngal, yó utóm le, ‘Jisriil.’ Yó lanen, ‘Kun hulu Dwata.’

²³ Bè yóm kdaw yó, hol lómón ke huluhu lu yó kem tau Israél ta yóm dou tonok mò hol dou nfun. Yó kem tau tehe bnoluyu ‘Là kenbong nawa’ hol hegfanu bélê le yóm kbong nawahu kul. Ne yó kem tau tehe bnoluyu ‘Là dou tau du’ yó se angat monu mò kul, ‘Yu se kem dou tau.’ Ne yó se kul balà do, mon le, ‘Uu se yóm kum Dwata.’ ”