Husiya 14 - Udél Dwata: Gna Kesfasad ne Lomi Kesfasad

Kfasad Dwata yóm bud kehguléken klowil yó kem tau

¹ Ó kem tau Israél, géhél ye bud semfulék ebè yóm sana kuy Dwata hol gónó mogot, yakà deng ye gotu meglà lemwót bè yó kem salà ye.

² Semfulék ye ebè Dwata dé, ne mon ye mò du, “Hol hnifótem kum kdê yó kem sidek deng gel nmò me ne bud henmóyóem mi anì bud dóyón me u. Yóm kdóyón me kóm yó, hol lómón ke wen deng dsù me ebéléem.

³ Là kô gbek Asirya lemwà kum, dalang se yó kem kudà gel snakay me bè gida, là gbek le lemwà kum. Yó kem dwata lennged tehe gel nmò me, là kô bud bnoluy me kul dwata me. Là ne, abay se tek són uu, Dwata, tendo gel kmodu kul yó kem ngà hikit.”

⁴ Yó udél yóm sana Dwata hol gónó mogot, monen, “Lemwót bè yóm deng kehegsel le, angat kóhu bè yó kem dou tau yóm nawa kmogol do. Hotuhu nawahu kembong nawa kul abay se là bud lenbutu kul ne.

⁵ Yó kmou yó kem tau Israél, lómón ke ou yóm amù gotu hnéféen kdéen. Angat le mból lómón bulók. Angat nelem kdolil le lómón kem koyu sidar bè benwu Libanun.

⁶ Wen tey tubeden hlós lemnok. Angat tey tilob, lómón ktilob yó kem koyu ulib. Dalang se yó kem boo le, lómón ktilob boo yóm koyu sidar bè Libanun.

⁷ Na le na bud heklung béléu he yó kem dou tau. Angat tey tilob klowil le, hol lómón ke yóm halay tilob ktowoken ne lómón ke yóm grép tilob kbunguhen. Angat tey któtól le, hol lómón któtól yóm tifas grép nmò le bè Libanun.

⁸ Ó Israél, hol ye hlayuk bè yó kem dwata kéng. Ou se yóm tendo tmanud kuy ne semgifà kuy. Hol lómón ke ou yóm koyu senflósen lemnaw dounen. Ne senflósu bemlay kuy yó kem tey bunguhen.”

⁹ Yó kem tau hulung hedem, gotu tngón le kul yó kem snulat ni. Yó kem tau hulung temnef, tngón le se kul. Tey tedeng yóm kun lan yóm Dwata ne yó kem tau tedeng kmoen yóm gel lemolò du. Okóm yó kem tau gemsalà tlokob le kul, hlós le masà.